រាជធានីភ្នំពេញ ៖ យោងតាមសេចក្ដីជូនដំណឹងចុះថ្ងៃទី១ មីនា ឆ្នាំ២០១៧ របស់គណៈកម្មាធិការជាតិអូឡាំពិកកម្ពុជា(NOCC)ឱ្យដឹងថា គណៈកម្មាធិការជាតិអូឡាំពិកកម្ពុជា និងសហភាពសហព័ន្ធយុវជនកម្ពុជា សហការជាមួយសហព័ន្ធកីឡាអុកចត្រង្គកម្ពុជានឹងរៀបចំការប្រកួតអុក«ចត្រង្គ»ខ្មែរដើម្បីស្វែងរកស្ដេចអុកចត្រង្គអង្គរសង្ក្រាន្តប្រចាំឆ្នាំ២០១៧ ខាងមុខនេះ ។
មុននឹងឈានទៅដល់ការប្រកួតវគ្គផ្ដាច់ព្រ័ត្រនៅលើទឹកដីនៃខេត្តសៀមរាប គឺត្រូវឆ្លងកាត់ការប្រកួតវគ្គជម្រុះនៅទីស្នាក់ការគណៈកម្មាធិការជាតិអូឡាំពិកកម្ពុជាជាមុនសិន ។ ការប្រកួតវគ្គជម្រុះក្នុងជុំទី១នេះ ចាប់ផ្ដើមធ្វើឡើងនៅថ្ងៃទី១៥ដល់ថ្ងៃទី១៨ មីនា ឆ្នាំ២០១៧ ដើម្បីចម្រាញ់រកអ្នកដែលមានសមត្ថភាព និងជំនាញពិតប្រាកដចំនួន៨នាក់ឡើងទៅប្រកួតវគ្គផ្ដាច់ព្រ័ត្រនៅខេត្តសៀមរាប ចាប់ពីថ្ងៃទី១៣ដល់ថ្ងៃទី១៥ មេសា ។
ក្នុងសេចក្ដីជូនដំណឹងនេះបានឱ្យដឹងទៀតថា អ្នកដែលមានបំណងចូលរួមប្រកួតអាចមកចុះឈ្មោះចាប់ពីថ្ងៃជូនដំណឹងនេះ រហូតដល់ថ្ងៃទី១៣ មីនា នៅទីស្នាក់ការគណៈកម្មាធិការជាតិអូឡាំពិកកម្ពុជា ។ ការប្រជុំចាប់ឆ្នោតប្រកួតនៅថ្ងៃទី១៤ មីនា វេលាម៉ោង៨និង៣០នាទីព្រឹកនៅទីស្នាក់ការគណៈកម្មាធិការជាតិអូឡាំពិកកម្ពុជា ចំពោះបេក្ខជនអវត្តមានត្រូវបានចាត់ទុកថាបោះបង់ការប្រកួត ។ ព័ត៌មានលម្អិតសូមទំនាក់ទំនងតាមទូរស័ព្ទលេខ ០៧៨ ៦៦៨ ៣៦៦ និង ០៦៩ ៩០៨ ៣៨៤ ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានប្រកូកប្រកាសដល់មហាជនគ្រប់ស្រទាប់ឱ្យមកចុះឈ្មោះចូលរួមប្រកួតឱ្យបានច្រើន ជាពិសេសលោកអ៊ំចាស់ៗនៅតាមបណ្ដាខេត្តមួយចំនួនគួរតែមកបញ្ចេញស្នាដៃឱ្យបានគ្រប់គ្នា ព្រោះការប្រកួតនេះមិនមានការបែងចែកអាយុ ឬវណ្ណៈអ្វីឡើយ ៕
ចែករំលែកព័តមាននេះ