រាជធានីភ្នំពេញ ៖ ការប្រកួតប្រដាល់ដណ្ដើមខ្សែក្រវាត់គោជល់នៅលើសង្វៀនទូរទស្សន៍ភីអិនអិន ថ្ងៃអាទិត្យ ទី៥ មីនា ខាងមុខនេះ ឈានចូលដល់វគ្គជម្រុះចុងក្រោយ
ហើយ ។ អ្នកនិយមទស្សនាកីឡាប្រដាល់ភាគច្រើនកំពុងទន្ទឹងរង់ចាំមើលថា តើកីឡាករកម្ពុជា យុគ យក្សផ្លែ និងម៉ន សាម៉េត ដែលត្រូវជួបកីឡាករថៃក្នុងវគ្គជម្រុះលើកចុងក្រោយនេះអាចស្ដារការអាម៉ាស់របស់ខ្លួនដែលប្រកួត៣លើកចាញ់ទាំង៣លើកកន្លងមកបានដែរឬទេបើទោះជាការប្រកួតលើកនេះធ្វើឡើងដើម្បីបង្គ្រប់កិច្ចតែប៉ុណ្ណោះ។
យុគ យក្សផ្លែ មកពីក្លិបបុរីរាជសីហ៍មានរិទ្ធ ត្រូវជួបប្រកួតជាមួយកីឡាករថៃឈ្មោះភុន សាវ៉ាត ។ អ្នកទាំង២រូបនេះមានវាសនាមិនខុសគ្នាទេ ថ្វីដ្បិតតែ ភុន សាវ៉ាត ប្រកួត៣លើកកន្លងមកនេះឈ្នះ២លើក ចាញ់១លើកមែន ប៉ុន្តែគេគ្មានឱកាសឡើងទៅប្រកួតនៅវគ្គផ្ដាច់ព្រ័ត្រឡើយ ។ ចំណែក យុគ យក្សផ្លែ រឹតតែលែងនិយាយកើត ព្រោះប្រកួត៣លើកចាញ់ទាំង៣លើក ។ ដូច្នេះសម្រាប់ការជួបគ្នារវាងពួកគេទាំង២លើកនេះធ្វើឡើងដើម្បីបង្គ្រប់កិច្ចប៉ុណ្ណោះ ។
រីឯ ម៉ន សាម៉េត មកពីក្លិបការិយាល័យទី៥កងទ័ពជើងគោក និងកីឡាករថៃឈ្មោះ ផេត សិលា ដែលត្រូវជួបគ្នាលើកនេះក៏មានវាសនាមិនខុសគូប្រកួតខាងលើដែរ ។ ម៉ន សាម៉េត ប្រកួត៣លើកកន្លងមកមិនដែលឈ្នះទាល់តែសោះ ក្នុងពេលផេត សិលា ប្រកួត៣លើកដូចគ្នាចាញ់តែ១លើកប៉ុណ្ណោះ ប៉ុន្តែគេនៅតែបាត់ឱកាសឡើងទៅប្រកួតនៅវគ្គផ្ដាច់ព្រ័ត្រដដែលបើទោះជាគេយកឈ្នះការប្រកួតលើកនេះក៏ដោយ ។ និយាយរួមនៅក្នុងពូលថៃគឺមានតែ ផេត ងិនថង ម្នាក់ប៉ុណ្ណោះដែលត្រូវឡើងទៅប្រកួតជាមួយពេជ្រ ម្ទេសខ្មាំង មកពីក្លិបអរុណរះកីឡានៅវគ្គផ្ដាច់ព្រ័ត្រដណ្ដើមយកខ្សែក្រវាត់គោជល់ក្នុងប្រភេទទម្ងន់៥៧គីឡូក្រាម ។
ចំណែកគូប្រកួតមិត្តភាពធម្មតាវិញមាន កីឡាករ ពុទ្ធ សំអាន់ មកពីក្លិបពុទ្ធសិរីវង្សកីឡាប្រកួតជាមួយកីឡាករ ប៊ិត ប៊ុនធឿន មកពីក្លិបតាព្រហ្មមានជ័យ និងកីឡាករ សុខទូ មកពីក្លិបឃ្លាំងមឿងកីឡា ប្រកួតជាមួយកីឡាករ ម៉ន ភារម្យ មកពីក្លិបការិយាល័យទី៥កងទ័ពជើងគោក ៕
ចែករំលែកព័តមាននេះ