ខេត្តកណ្ដាល ៖ កម្លាំងនគរបាលព្រហ្មទណ្ឌស្រុកអង្គស្នួលសហការជាមួយកម្លាំងនគរបាលប៉ុស្ដិ៍បែកចាន និងនគរបាលប៉ុស្ដិ៍ព្រៃពួច បានចុះទៅធ្វើការបង្ក្រាបក្រុមជួញដូរគ្រឿងញៀន២ថ្ងៃជាប់គ្នាដោយធ្វើការចាប់ខ្លួនមុខសញ្ញាជួញដូរគ្រឿងញៀន និងប្រើប្រាស់គ្រឿងញៀនបានចំនួន៤នាក់
ខេត្តកណ្ដាល ៖ កម្លាំងនគរបាលព្រហ្មទណ្ឌស្រុកអង្គស្នួលសហការជាមួយកម្លាំងនគរបាលប៉ុស្ដិ៍បែកចាន និងនគរបាលប៉ុស្ដិ៍ព្រៃពួច បានចុះទៅធ្វើការបង្ក្រាបក្រុមជួញដូរគ្រឿងញៀន២ថ្ងៃជាប់គ្នាដោយធ្វើការចាប់ខ្លួនមុខសញ្ញាជួញដូរគ្រឿងញៀន និងប្រើប្រាស់គ្រឿងញៀនបានចំនួន៤នាក់ ។
ប្រតិបត្តិការខាងលើនោះធ្វើឡើងលើកទី១នៅវេលាម៉ោង១១និង៣០នាទីថ្ងៃត្រង់ ថ្ងៃទី២៨ កុម្ភៈ ឆ្នាំ២០១៧ នៅចំណុចដីឡូត៌ ស្ថិតនៅក្នុងភូមិកៅ ឃុំបែកចាន ស្រុកអង្គស្នួល ។ ដោយកម្លាំងនគរបាលឃាត់ខ្លួនជនសង្ស័យបាន២នាក់ក្នុងនោះម្នាក់ឈ្មោះ ហាយ បញ្ញា អាយុ២៥ឆ្នាំ ជនជាតិខ្មែរ ជាជាងសំណង់ ស្នាក់នៅក្នុងភូមិគល់ សង្កាត់កន្ទោក ខណ្ឌពោធិ៍សែនជ័យ ជាអ្នកជួញដូរ និងម្នាក់ទៀតឈ្មោះ មឿ ថេត អាយុ២០ឆ្នាំ ជនជាតិខ្មែរជាកម្មករសំណង់ស្នាក់នៅក្នុងភូមិត្រាចទោល ឃុំបែកចាន ស្រុកអង្គស្នួល ជាអ្នកប្រើប្រាស់ ។
ក្នុងប្រតិបត្តិការចុះបង្ក្រាបនេះកម្លាំងសមត្ថកិច្ចដកហូតបានគ្រឿងញៀនប្រភេទម៉ាទឹកកកចំនួន៦កញ្ចប់ ឧបករណ៍ប្រើប្រាស់ ថង់ច្រកថ្នាំញៀនមួយចំនួន, ទូរសព្ទដៃ១គ្រឿងម៉ាក Sintel ពណ៌ស រួមជាមួយសម្ភារប្រើប្រាស់គ្រឿងញៀនផងដែរ ។ ចំណែកប្រតិបត្តិការទី២គឺនៅវេលាម៉ោង១៥និង៣០នាទីល្ងាចថ្ងៃទី១ មីនា ឆ្នាំ២០១៧ នៅចំណុចមាត់ស្ទឹងព្រែកត្នោត ស្ថិតនៅក្នុងភូមិស្វាយ ឃុំព្រៃពួច ស្រុកអង្គស្នួល ដែលកម្លាំងនគរបាលបានឃាត់ខ្លួនជនសង្ស័យ២នាក់ក្នុងនោះម្នាក់ឈ្មោះ វឿន ធំ អាយុ២៨ឆ្នាំ ជាកម្មករទឹកស្អាត ស្នាក់នៅក្នុងភូមិស្វាយ ឃុំព្រៃពួច ស្រុកអង្គស្នួល ។ ចំណែកឯម្នាក់ទៀតឈ្មោះ រ៉ុម ណុន អាយុ៣៦ឆ្នាំជាកម្មករនៅការដ្ឋានខ្សាច់ ស្នាក់នៅក្នុងភូមិគោកពពេល ឃុំលំហាច ស្រុកអង្គស្នួល ។ នគរបាលបានដកហូតបានគ្រឿងញៀនប្រភេទម៉ាទឹកកក២កញ្ចប់ ឧបករណ៍ប្រើប្រាស់ និងថង់ច្រកថ្នាំមួយចំនួន ។ ដោយជនសង្ស័យបានសារភាពថា ខ្លួនបានទិញពីឈ្មោះ សេត ស្រីពៅ ភេទស្រី អាយុ២៦ឆ្នាំ ស្នាក់នៅក្នុងភូមិយសមេត្រី ឃុំលំហាច ស្រុកអង្គស្នួល និងឈ្មោះ លីម ឡាង ភេទប្រុស អាយុ៣៤ឆ្នាំ មានទីលំនៅក្នុងភូមិស្វាយ ឃុំព្រៃពួច ស្រុកអង្គស្នួល ហើយក៏ជាអ្នកផ្ដល់ទីតាំងដើម្បីលក់ និងប្រើប្រាស់គ្រឿងញៀនផងដែរ ។
នគរបាលបានឲ្យដឹងថា ការចុះបង្ក្រាបនិងចាប់ខ្លួនក្រុមជនជួញដូរ និងប្រើប្រាស់គ្រឿងញៀនខាងលើនោះ ក្រោយពេលដែលកម្លាំងទទួលបានព័ត៌មានពីប្រជាពលរដ្ឋនៅក្នុងមូលដ្ឋាន ដែលបានផ្ដល់ព័ត៌មាននិងចង្អុលបង្ហាញពីទីតាំងដែលជនទាំងនោះកំពុងធ្វើសកម្មភាព ហើយក្រោយពេលចាប់ខ្លួនពួកគេត្រូវបានបញ្ជូនទៅកាន់អធិការដ្ឋានស្រុកដើម្បីសួរនាំ និងកសាងសំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ