កាលពីថ្ងៃទី១ មីនា ប្រទេសកូរ៉េខាងជើងបានចោទប្រកាន់សហរដ្ឋអាមេរិក និងកូរ៉េខាងត្បូងថា ជាអ្នកមួលបង្កាច់ថា ក្រុងព្យុងយ៉ាង ជាអ្នកនៅពីក្រោយការស្លាប់របស់លោកគីម ជុងណាម បងប្រុសម្តាយទីទៃរបស់លោកគីម ជុងអ៊ុន នៅម៉ាឡេស៊ី កាលពីខែ
កាលពីថ្ងៃទី១ មីនា ប្រទេសកូរ៉េខាងជើងបានចោទប្រកាន់សហរដ្ឋអាមេរិក និងកូរ៉េខាងត្បូងថា ជាអ្នកមួលបង្កាច់ថា ក្រុងព្យុងយ៉ាង ជាអ្នកនៅពីក្រោយការស្លាប់របស់លោកគីម ជុងណាម បងប្រុសម្តាយទីទៃរបស់លោកគីម ជុងអ៊ុន នៅម៉ាឡេស៊ី កាលពីខែមុន ហើយចាត់ទុកការអះអាងទាំងនេះថា គ្មានមូលដ្ឋាន ។ ទីភ្នាក់ងារព័ត៌មានផ្លូវការកូរ៉េខាងជើង KCNA គូសបញ្ជាក់ថា សហរដ្ឋអាមេរិក និងអាជ្ញាធរកូរ៉េខាងត្បូងបាននាំគ្នាធ្វើយុទ្ធនាការមួលបង្កាច់កូរ៉េខាងជើង ។
ចំពោះការស្លាប់របស់លោកគីម ជុងណាម នៅព្រលានយន្តហោះក្រុងគូឡាឡាំពួរ កាលពីថ្ងៃទី១៣ កុម្ភៈ រដ្ឋមន្ត្រីសុខាភិបាលម៉ាឡេស៊ី លោក SUBRAMANIAM SATHASIVAM ថ្លែងកាលពីថ្ងៃទី២៦ កុម្ភៈ ថា លោកគីម ជុងណាម ត្រូវសម្លាប់ដោយសារធាតុពុលខ្លាំងបំផុតឈ្មោះ VX ។
KCNA រិះគន់អាជ្ញាធរកូរ៉េខាងត្បូងថា បញ្ចេញពាក្យចចាមអារ៉ាមនានាមុនស្រែកថា បុរសកូរ៉េខាងជើងនេះត្រូវសម្លាប់ដោយសារធាតុពុល ហើយសេចក្តីថ្លែងការណ៍នានាត្រូវបានចេញដោយកូរ៉េខាងត្បូង និងម៉ាឡេស៊ី ។ KCNA ក៏ចោទប្រកាន់កូរ៉េខាងត្បូង និងសហរដ្ឋអាមេរិកផងដែរថា ប្រើប្រាស់រឿងនេះ ក្នុងគោលដៅនយោបាយដើម្បីបំផ្លាញមុខមាត់របស់កូរ៉េខាងជើង ហើយប៉ុនប៉ងផ្តួលរំលំប្រព័ន្ធសង្គមរបស់ខ្លួន ។
KCNA ក៏ព្រមានផងដែរពីការប្រើបណ្តាវិធានការស្វ័យការពារម៉ឺងម៉ាត់នានាសំដៅការពារអធិបតេយ្យភាព និងភាពថ្លៃថ្នូររបស់ប្រទេស ប្រសិនបើក្រុងវ៉ាស៊ីនតោន និងក្រុងសេអ៊ូលបន្តប្រើប្រាស់ល្បិចកលនយោបាយនានា ដើម្បីធ្វើឱ្យប៉ះពាល់ដល់ប្រព័ន្ធដឹកនាំរបស់កូរ៉េខាងជើង ។
ជនសង្ស័យ៣នាក់ គឺនារីឥណ្ឌូណេស៊ីម្នាក់ នារីវៀតណាមម្នាក់ និងបុរសកូរ៉េខាងជើងម្នាក់កំពុងជាប់ការឃុំឃាំងបណ្តោះអាសន្ននៅម៉ាឡេស៊ី ។ ប៉ូលិសប្រទេសនេះក៏ចង់សួរចម្លើយមនុស្ស៧នាក់ទៀត ពិសេសលេខាធិការទី២នៃស្ថានទូតកូរ៉េខាងជើងប្រចាំម៉ាឡេស៊ី ។ ជនសង្ស័យ៤នាក់បានចាកចេញពីម៉ាឡេស៊ីទៅដល់កូរ៉េខាងជើងវិញ ។ នារីទាំង២នាក់ កាលពីថ្ងៃទី១ មីនា ទទួលការចោទប្រកាន់ពីបទសម្លាប់មនុស្សនៅម៉ាឡេស៊ី ហើយពួកគេអាចមានទោសប្រហារជីវិតដោយព្យួរ.ក ។
ចែករំលែកព័តមាននេះ