រាជធានីភ្នំពេញ ៖ បុរសពីនាក់ទើបតែចេញពីក្លឹបកម្សាន្តមួយកន្លែងបានជិះម៉ូតូមួយគ្រឿងបោះពួយយ៉ាងលឿន ខណៈពេលមកដល់ចំណុចផ្លូវកោងប្រឹងបត់ខ្លាំងពេក បណ្តាលឱ្យរអិលដួលបោកក្បាល…
រាជធានីភ្នំពេញ ៖ បុរសពីនាក់ទើបតែចេញពីក្លឹបកម្សាន្តមួយកន្លែងបានជិះម៉ូតូមួយគ្រឿងបោះពួយយ៉ាងលឿន ខណៈពេលមកដល់ចំណុចផ្លូវកោងប្រឹងបត់ខ្លាំងពេក បណ្តាលឱ្យរអិលដួលបោកក្បាលទៅនិងបង្កាន់ដៃស្ពានរងរបួសធ្ងន់ម្នាក់ ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង២និង៤០នាទីរំលងអធ្រាត្រ ថ្ងៃទី២ មីនា ឆ្នាំ២០១៧ ត្រង់ចំណុចខាងលើស្ពានអាកាសស្ទឹងមានជ័យ ស្ថិតក្នុងសង្កាត់ស្ទឹងមានជ័យ ខណ្ឌមានជ័យ ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញបុរសពីនាក់បើបរម៉ូតូមួយគ្រឿងម៉ាកអាយខន ពណ៌ខ្មៅលាយផ្កាឈូក ពាក់ស្លាកលេខភ្នំពេញ 1AA-4597 ទើបតែចេញមកពីក្លឹបកម្សាន្តបំណងជិះត្រឡប់ទៅផ្ទះវិញនៅម្តុំវិទ្យាល័យជាស៊ីមសាមគ្គី និងបានធ្វើដំណើររួមជាមួយមិត្តភក្តិប្រមាណ៦ទៅ៧ម៉ូតូទៀត តាមបណ្តោយផ្លូវ២៧១ ក្នុងល្បឿនយ៉ាងលឿនទិសដៅពីត្បូងទៅជើង លុះមកដល់ចំណុចកើតហេតុដោយសារតែផ្លូវមានស្ថានភាពកោងខ្លាំងពេក ខណៈពេលដែលបុរសដែលជាអ្នកបើកបរម៉ូតូខាងលើបានងាកក្រោយរកមើលគ្នីគ្នាដែលធ្វើដំណើរជាមួយ ហើយបានកាច់ចង្កូតបត់ខ្លាំងពេកក៏រអិលដួលបណ្តាលឱ្យបុរសដែលបើកបរម៉ូតូខ្ទាតចេញពីម៉ូតូបោកក្បាលទៅនឹងបង្គាន់ដៃស្ពានរងរបួសធ្ងន់ រីឯម៉ូតូរងការខូចខាត់បន្តិចបន្តួច ភ្លាមៗនេះបុរសម្នាក់ទៀតដែលជាអ្នករួមដំណើរពីក្រោយបានឡើងជិះម៉ូតូមួយគ្រឿងទៀតជិះចេញទៅបាត់ទៅ ។
ក្រោយពេលកើតហេតុជនរងគ្រោះត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅឯមន្ទីរពេទ្យព្រះកុសុមៈ ចំណែកម៉ូតូត្រូវបានសមត្ថកិច្ចប៉ុស្តិ៍នគរបាលរដ្ឋបាលស្ទឹងមានជ័យយកទៅរក្សាទុករងចាំសាច់ញាតិមកទទួលយកត្រលប់ទៅវិញ ៕
ចែករំលែកព័តមាននេះ