អតីតគ្រូបង្វឹកក្រុមជម្រើសជាតិអង់គ្លេសលោកRoy Hodgson កំពុងចាប់អារម្មណ៍មកដឹកនាំក្លិបLeicester បន្ទាប់ពីរូបលោកបានជួបពិភាក្សាជាមួយក្រុមអ្នកតំណាងក្លិបLeicester រួចមក ។ ការពិភាក្សាចង់តែងតាំងគ្រូបង្វឹកថ្មីនេះ ធ្វើឡើងក្រោយពីក្លិបLeicester បានសម្រេចដកលោកClaudio Ranieri ចេញពីតំណែងគ្រូបង្វឹកកាលពីពេលថ្មីៗកន្លងទៅ ។ ទោះបីយ៉ាងណា កីឡាករទាំងអស់បានទាមទារឱ្យលោកCraig Shakespeare ដែលបច្ចុប្បន្នជាអ្នកចាត់ការទូទៅបណ្ដោះអាសន្នក្នុងក្លិបLeicester កាន់កាប់តំណែងនេះយ៉ាងហោចណាស់រហូតដល់បញ្ចប់រដូវកាលសិន ។
គេសង្កេតឃើញថា បន្ទាប់ពីបានដកតំណែងលោកClaudio Ranieri រួចមក ក្លិបLeicester ហាក់ផ្លាស់ប្តូរយុទ្ធសាស្ត្រថ្មីក្រោមការដឹកនាំបណ្តោះអាសន្នរបស់លោកCraig Shakespeare ព្រមទាំងធ្វើឱ្យក្លិបនេះបានយកឈ្នះLiverpool ៣-១ផងដែរក្នុងជំនួបកាលពីថ្ងៃចន្ទកន្លងទៅ ។
ជុំវិញការនាំយកលោកRoy Hodgson មកកាន់តំណែងគ្រូបង្វឹកថ្មីនេះ ក្លិបLeicester មិនទាន់បញ្ជាក់ជាផ្លូវនៅឡើយទេ ។ ចំពោះការសម្រេចនានានឹងធ្វើឡើងដោយលោកKhun Vichai Srivaddhanaprabha (ប្រធានក្លិប), លោកKhun Aiyawatt Srivaddhanaprabha (អនុប្រធាន), លោកស្រីSusan Wheeler (នាយកប្រតិបត្តិ) និងលោកJon Rudkin (នាយកផ្នែកកីឡាបាល់ទាត់) តែប៉ុណ្ណោះ ៕
ចែករំលែកព័តមាននេះ