គ្រូបង្វឹកក្លិបLiverpool លោកJurgen Klopp បាននិយាយថា លោកមិនទាន់ច្បាស់នៅឡើយទេ ជុំវិញអនាគតខ្សែប្រយុទ្ធDaniel Sturridge ថានឹងត្រូវផ្ទេរចេញ ឬនៅបន្តលេងក្នុងក្លិបហង្សក្រហម ។ លោកបានបញ្ជាក់បន្ថែមថា ការសម្រេចយ៉ាងណានោះ នឹងធ្វើឡើងជាផ្លូវការក្រោយពេលបញ្ចប់រដូវកាលនេះ ។
ថ្លែងប្រាប់អ្នកសារព័ត៌មានកាលពីពេលថ្មីៗនេះ លោកJurgen Klopp បានលើកឡើងថា៖ «ខ្ញុំមិនទាន់ហ៊ានធានាថានឹងមានអ្វីកើតឡើងនារដូវក្តៅខាងមុខនេះទេ ។ វាមិនត្រឹមតែបញ្ហាអនាគតរបស់កីឡាករSturridge តែម្នាក់នោះឡើយ គឺនៅមានកីឡាករដទៃជាច្រើនរូបទៀត» ។
គេសង្កេតឃើញថា ខ្សែប្រយុទ្ធវ័យ២៧ឆ្នាំរូបនេះ ទើបតែបានបង្ហាញខ្លួន៥ប្រកួតប៉ុណ្ណោះក្នុងក្របខ័ណ្ឌប្រឺមីញេលីគរដូវកាលឆ្នាំ២០១៦-២០១៧នេះ ដោយគ្រូបង្វឹកក្លិបហង្សក្រហមលោកJurgen Klopp តែងតែដាក់ខ្សែប្រយុទ្ធ Philippe Coutinho, Roberto Firmino និង Sadio Mane ជាជម្រើសដំបូង ។
យ៉ាងណាមិញ លោកJurgen Klopp បាននិយាយថា៖ «Sturridge មិនបានមកហ្វឹកហាត់ប្រមាណជា៨ទៅ៩ថ្ងៃហើយ ដោយសារតែកីឡាកររូបនេះមានជំងឺ ។ យើងនឹងឱ្យគាត់មកហ្វឹកហាត់ជាធម្មតាវិញ នៅពេលដែលគាត់បានជាសះស្បើយ និងជួយឱ្យក្លិបទទួលបានជោគជ័យសម្រាប់រដូវកាលនេះ» ៕
ចែករំលែកព័តមាននេះ