រាជធានីភ្នំពេញ ៖ កាលពីថ្ងៃទី២៨ កុម្ភៈកន្លងមកនេះ នៅទីស្នាក់ការគណៈកម្មាធិការជាតិអូឡាំពិកកម្ពុជា មានបើកកិច្ចប្រជុំមួយជាមួយសហព័ន្ធកីឡាជាតិចំនួន២៤ ដែលត្រូវត្រៀមខ្លួនទៅចូលរួមប្រកួតកីឡាស៊ីហ្គេម
រាជធានីភ្នំពេញ ៖ កាលពីថ្ងៃទី២៨ កុម្ភៈកន្លងមកនេះ នៅទីស្នាក់ការគណៈកម្មាធិការជាតិអូឡាំពិកកម្ពុជា មានបើកកិច្ចប្រជុំមួយជាមួយសហព័ន្ធកីឡាជាតិចំនួន២៤ ដែលត្រូវត្រៀមខ្លួនទៅចូលរួមប្រកួតកីឡាស៊ីហ្គេមលើកទី២៩នៅប្រទេសម៉ាឡេស៊ី ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាដែលជាប្រធានដឹកនាំកិច្ចប្រជុំបានមានប្រសាសន៍ឱ្យដឹងថា សម្រាប់ការប្រកួតកីឡាស៊ីហ្គេមលើកទី២៩ឆ្នាំ២០១៧ នៅប្រទេសម៉ាឡេស៊ីលើកនេះ កម្ពុជាបានកំណត់យក២៤ប្រភេទកីឡាដែលសុទ្ធសឹងជាកីឡាមានសក្ដានុពលក្នុងការដណ្ដើមយកមេដាយត្រឡប់មកវិញ ។ ក្នុងចំណោមកីឡាទាំង២៤ប្រភេទនោះមាន អត្តពលកម្ម, វាយសី,បាល់បោះ,ប្រដាល់សាកល, ជិៈសេះ, ទោចក្រយាន,បាល់ទាត់,កាយសម្ព័ន្ធ,ហុកគី, ហែលទឹក, វាយកូនឃ្លីលើតុ, តេក្វាន់ដូ, ទ្រីយ៉ាត្លុង, បាល់ទះ, វាយកូនគោល, វាយកូនបាល់, ស្គីទឹកកក, ទូកក្ដោង, ប៊ូលនិងប៉េតង់, សីប៉ាក់តាក្រ, វ៉ូស៊ូ, ការ៉ាតេដូ, ប្រដាល់គុនខ្មែរ និងគុនដាវ ។
លោក វ៉ាត់ ចំរើន បានបន្តថា ក្នុងចំណោម២៤ប្រភេទកីឡានេះមានតែ៤ប្រភេទកីឡាប៉ុណ្ណោះដែលយើងមានសង្ឃឹមក្នុងការដណ្ដើមយកមេដាយមកជូនជាតិបានច្រើនជាងគេ គឺប្រភេទកីឡាប៊ូលនិងប៉េតង់, តេក្វាន់ដូស្ទីល WTF, វាយកូនបាល់ផ្នែកនារី និងកីឡាវ៉ូស៊ូដែលធ្លាប់ដណ្ដើមបានមេដាយមាស ប្រាក់ និងសំរឹទ្ធជាច្រើនគ្រឿងនាពេលកន្លងមក ។ ប៉ុន្តែសម្រាប់លើកនេះ គេនៅមិនទាន់ដឹងថាអាចដណ្ដើមបានមេដាយមាស ប្រាក់ និងសំរឹទ្ធប៉ុន្មានគ្រឿងនោះទេ ។ លោកក៏មានការព្រួយបារម្ភផងដែចំពោះប្រដាល់គុនខ្មែរ (ប្រដាល់សេរី)ដែលជាប្រភេទកីឡាថ្មីសុទ្ធទើបតែឈានជើងទៅចូលរួមប្រកួតនៅក្នុងព្រឹត្តិការណ៍កីឡាស៊ីហ្គេមជាលើកទី១ប៉ុណ្ណោះ។ អ្វីដែលធ្វើឱ្យមានការព្រួយបារម្ភបំផុតនោះគឺផ្នែកបច្ចេកទេស និងបទបញ្ជានៃការប្រកួត ព្រោះថាកាលណាយើងប្រព្រឹត្តខុសទៅនឹងលក្ខខណ្ឌនៃការប្រកួតរបស់គេៗនឹងអាចឱ្យចាញ់ក៏មានដែរ ។
ដូច្នេះលោកសំណូមពរដល់គ្រប់សហព័ន្ធកីឡាទាំងអស់ត្រូវរៀបចំខ្លួនឱ្យបានល្អចាប់ពីពេលនេះទៅ ។ ជាងនេះទៅទៀត សារធាតុដូពីនក៏ត្រូវគិតគូរឱ្យមែនទែនដែរ ព្រោះថា ការប្រកួតកីឡាស៊ីហ្គេមនៅប្រទេសម៉ាឡេស៊ីលើកនេះខុសពីការប្រកួតណាៗទាំងអស់ ។ លោកគ្រូណា ឬកីឡាករណា ដែលពិសាបារីអាចបញ្ឈប់ពីពេលនេះឱ្យហើយទៅ បើពុំនោះទេអាចនឹងជួបផលវិបាកនៅថ្ងៃក្រោយ ។ លោកបានបញ្ជាក់ច្បាស់ថា ការប្រកួតកីឡាស៊ីហ្គេមនៅប្រទេសម៉ាឡេស៊ីលើកនេះស្ថិតនៅក្រោមប្រធានបទ«ការប្រកួតកីឡាគ្មានសារជាតិដូពីន»។ រីឯចំណុចសំខាន់មួយទៀតលោកចង់ឱ្យសហព័ន្ធកីឡាជាតិទាំងអស់ត្រូវយកចិត្តទុកដាក់ក្នុងការហ្វឹកហាត់ឱ្យមែនទែន ត្រូវតែមានសមត្ថភាពពិតក្នុងការដណ្ដើមយកមេដាយ ។
យើងដឹងហើយថា កាលពីប្រកួតកីឡាស៊ីហ្គេមនៅប្រទេសសិង្ហបុរី យើងទទួលបានចំណាត់ថ្នាក់នាំមុខប្រទេសឡាវ ដូច្នេះលោកចង់ឱ្យកម្ពុជាយើងរក្សាឱ្យបាននូវចំណាត់លើប្រទេសឡាវដដែល ។
គួរបញ្ជាក់ថា ការប្រកួតកីឡាស៊ីហ្គេមនៅប្រទេសម៉ាឡេស៊ីលើកនេះគេកំណត់យក៣៨ប្រភេទកីឡា និងមាន៤០៥វិញ្ញាសា និងមានមេដាយសរុប១.៣៣៩គ្រឿង ក្នុងនោះមេដាយមាស៤០៥គ្រឿង មេដាយប្រាក់៤០៥គ្រឿង និងមេដាយសំរឹទ្ធ៥២៩គ្រឿងដាក់ឱ្យអត្តពលិកមកពីប្រទេសអាស៊ានដណ្ដើមគ្នា ៕
ចែករំលែកព័តមាននេះ