ប្រទេសឥណ្ឌូណេស៊ី ៖ ការផ្គត់ផ្គង់ទង់ដែងនៅលើទីផ្សារពិភពលោក អាចកើនឡើង ខណៈក្រុមហ៊ុនឥណ្ឌូណេស៊ីនឹងបន្តការនាំចេញទៅក្រៅប្រទេស បន្ទាប់ពីទទួលបានលិខិតអនុញ្ញាតសម្រាប់នាំចេញ ។
ក្រុមហ៊ុន Amman Mineral Nusa Tenggara (AMNT) ជាផ្នែកមួយនៃក្រុមហ៊ុនថាមពលអន្តរជាតិ Medco បានទទួលលិខិតអនុញ្ញាតសម្រាប់ការនាំចេញទង់ដែងកែច្នៃរួច ៦៧ម៉ឺន៥ពាន់តោនពីក្រសួងពាណិជ្ជកម្មឥណ្ឌូណេស៊ី ។ នេះបើតាមក្រុមហ៊ុនបានឱ្យដឹងក្នុងសេចក្តីថ្លែងការណ៍កាលពីថ្ងៃសុក្រ ។
ក្រុមហ៊ុននេះក៏ទទួលបានអនុសាសន៍ពីក្រសួងធនធានរ៉ែ និងថាមពល កាលពីថ្ងៃទី១៧ កុម្ភៈ ដើម្បីនាំចេញទង់ដែងផងដែរ ។
នាយកក្រុមហ៊ុនAMNT លោក Rachmat Makkasau ថ្លែងថា ៖ « យើងនឹងបន្តសកម្មភាពនាំចេញភ្លាម និងបន្តប្រតិបត្ដិការនៅតំបន់ Batu Hijau ជាធម្មតា គឺសំដៅលើខេត្ត East Nusa Tenggara ភាគកណ្តាលនៃប្រទេសឥណ្ឌូណេស៊ី » ។
ការផ្គត់ផ្គង់ទង់ដែងទូទាំងពិភពលោក ត្រូវបានផ្អាកមួយផ្នែកក្នុងប្រទេសស៊ីលី និងឥណ្ឌូណេស៊ី ដោយសារការធ្វើកូដកម្ម និងជម្លោះរវាងរដ្ឋាភិបាល និងក្រុមហ៊ុនរុករករ៉ែ ។
ការធ្វើកូដកម្មក្នុងប្រទេសស៊ីលីបានផ្អាកដំណើរការរុករកអណ្តូងរ៉ែទង់ដែងធំជាងគេបំផុតរបស់ពិភពលោក ចាប់តាំងពីថ្ងៃទី១០ កុម្ភៈ ដែលនាំឲ្យតម្លៃទង់ដែងកើនឡើងដល់កម្រិតខ្ពស់បំផុតក្នុងរយៈពេល២០ខែ នៅថ្ងៃទី ១៣ កុម្ភៈ ។
ក្រុមហ៊ុន PT Freeport ឥណ្ឌូណេស៊ី ជាបុត្រសម្ព័ន្ធរបស់ក្រុមហ៊ុន Freeport McMoran ដែលមានមូលដ្ឋាននៅសហរដ្ឋអាមេរិក បានផ្អាកការផលិតចាប់តាំងពីថ្ងៃទី១០ កុម្ភៈ មកម្ល៉េះ ៕
ចែករំលែកព័តមាននេះ