ខេត្តបន្ទាយមានជ័យ ៖ នៅវេលាម៉ោង១០និង៣០នាទីព្រឹកថ្ងៃទី២៣ ខែកញ្ញា ឆ្នាំ២០២២ កម្លាំងអន្តរាគមន៍ដឹកនាំដោយលោកវរសេនីយ៍ទោ នៅ សុខា នាយសេនាធិការរងកងពល បានចេញប្រតិបត្តិការជួយសង្គ្រោះទាន់ពេលវេលា ករណីក្មេងប្រុសអាយុ០៨ឆ្នាំម្នាក់ ឈ្មោះ វ័ន ឆានុន បានលង់ទឹកពេលទឹកហូរខ្លាំងហើយគួចនាំទៅផ្នែកខាងក្រោម នៃសំណង់ទ្វារទឹកធំ ចម្ងាយ៤០០មែត្រ ដែលស្ថិតនៅភូមិគោកចារ ឃុំស្ពានស្រែង ស្រុកភ្នំស្រុក ខេត្តបន្ទាយមានជ័យ ។
សូមបញ្ជាក់ថា លោកឧត្តមសេនីយ៍ត្រី សឹង្ហ ទុំ មេបញ្ជាការកងពលតូចថ្មើរជើងលេខ៥១ បានចាត់តាំងកម្លាំងអន្តរាគមន៍ អោយនៅប្រចាំការនៅគោលដៅតំបន់រងគ្រោះ ងាយស្រួលជួយសង្គ្រោះ និងជម្លៀសប្រជាពលរដ្ឋទៅកាន់ទីទួលសុវត្ថិភាព ។ ស្របពេលទទួលបានសេចក្តីរាយការណ៍ថាមានក្មេងប្រុសលង់ទឹក កងកម្លាំងអន្តរាគមន៍ ក៏បានចេញប្រតិបត្តិការភ្លាមៗជួយសង្គ្រោះ ក្មេងប្រុសខាងលើបានទាន់ពេលវេលា និងបានប្រគល់ជូនឪពុកម្តាយវិញផងដែរ ៕
ចែករំលែកព័តមាននេះ