រាជធានីភ្នំពេញ ៖ នាព្រឹកព្រលឹមថ្ងៃទី២៣ ខែកញ្ញា ឆ្នាំ២០២០នេះ បងប្អូនប្រជាពលរដ្ឋបាននាំគ្នាសម្រុកទៅជិះរថយន្តក្រុងសាធារណៈ ដែលរដ្ឋបាលរាជធានីភ្នំពេញ បានរៀបចំជូនទៅតាមបណ្ដាខេត្តនានា ដើម្បីទៅស្រុកកំណើតក្នុងឱកាសបុណ្យភ្ជុំបិណ្ឌនេះ។
ជាក់ស្តែងនៅព្រលឹមអុលលោក ឃួង ស្រេង បានអញ្ជើញចុះទៅពិនិត្យ និងជូនដំណើរប្រជាពលរដ្ឋឡើងជិះរថយន្ដក្រុង ទៅតាមបណ្ដាខេត្ត ក្នុងឱកាសបុណ្យភ្ជុំបិណ្ឌ នៅទីតាំងសួនច្បារ ទៅលានប្រជាធិបតេយ្យឬស្សីកែវ។ បងប្អូនប្រជាពលរដ្ឋយើងមានទឹកមុខញញឹមស្រស់ស្រាយត្រេកអរ និងសប្បាយរីករាយ និងថ្លែងអំណរគុណយ៉ាងជ្រាលជ្រៅដល់រាជរដ្ឋាភិបាល ដែលមានសម្តេចតេជោ ហ៊ុន សែន ជាប្រមុខដឹកនាំ និងរដ្ឋបាលរាជធានីភ្នំពេញ ដែលបានផ្តល់ជូនពួកគាត់បានជិះរថយន្តក្រុងទៅលេងស្រុកកំណើត ដោយឥតគិតថ្លៃ ព្រមទាំងផ្ដល់ជូនទឹកបរិសុទ្ធក្នុងពេលធ្វើដំណើរទៀតផង។
គួររំលឹកថា រដ្ឋបាលរាជធានីភ្នំពេញ កាលពីថ្ងៃទី១២ ខែកញ្ញា ឆ្នាំ២០២២នេះ បានជូនដំណឹងដល់សាធារណជនទាំងអស់ឱ្យបានជ្រាបថា អនុវត្តតាមប្រសាសន៍ដឹកនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្តី នៃព្រះរាជាណាចក្រកម្ពុជា ដើម្បីជួយសម្រួលបន្ទុកចំណាយរបស់បងប្អូនប្រជាពលរដ្ឋជាមន្ត្រីរាជការ កងកម្លាំងប្រដាប់អាវុធ កម្មករ កម្មការិនី សិស្ស និស្សិតទាំងអស់ ដែលនឹងធ្វើដំណើរទៅលេងស្រុកកំណើត ជួបជុំបងប្អូនក្រុមគ្រួសារ ប្រកបដោយសេចក្ដីសប្បាយរីករាយ ក្នុងឱកាសពិធីបុណ្យភ្ជុំបិណ្ឌខាងមុខនេះ រដ្ឋបាលរាជធានីភ្នំពេញនឹងរៀបចំរថយន្តក្រុងចំនួន១៧៥គ្រឿង សម្រាប់បម្រើសេវាដឹកជញ្ជូនសាធារណៈ រយៈពេល០៥ថ្ងៃ ពីថ្ងៃទី២៣ ដល់ថ្ងៃទី២៧ ខែកញ្ញា ឆ្នាំ២០២២ ដោយមិនបង់ប្រាក់ ក្នុងនោះ ៖
១- សម្រាប់ប្រជាពលរដ្ឋនៅក្នុងរាជធានីភ្នំពេញ ៖ រដ្ឋបាលរាជធានីភ្នំពេញ ប្រើប្រាស់រថយន្ត ក្រុង៥៥គ្រឿង។
២- សម្រាប់ប្រជាពលរដ្ឋដែលនឹងធ្វើដំណើរទៅតាមបណ្ដាខេត្ត និងត្រឡប់មករាជធានីភ្នំពេញវិញ ៖ រដ្ឋបាលរាជធានីភ្នំពេញបានរៀបចំរថយន្តក្រុងចំនួន១២០គ្រឿង ដោយចេញដំណើរចាប់ពីម៉ោង៥និង៣០នាទីព្រឹក។
ឆ្លៀតក្នុងឱកាសនេះ រដ្ឋបាលរាជធានីភ្នំពេញ សូមអំពាវនាវដល់ម្ចាស់ក្រុមហ៊ុន និងម្ចាស់រថយន្តដឹកជញ្ជូនអ្នកដំណើរទាំងអស់ ឱ្យរក្សាតម្លៃដឹកជញ្ជួននៅដដែល ដោយពុំតម្លើងថ្លៃក្នុងឱកាសពិធីបុណ្យភ្ជុំបិណ្ឌខាងមុខនេះ ដើម្បីរួមចំណែកជាមួយរាជ័រដ្ឋាភិបាល និងរដ្ឋបាលរាជធានីភ្នំពេញ ក្នុងការជួយសម្រួលដល់ជីវភាពរស់នៅរបស់បងប្អូនប្រជាពលរដ្ឋ។ អាស្រ័យហេតុនេះ សូមប្អូនប្រជាពលរដ្ឋទាំងអស់មេត្តាជ្រាប និងចូលរួមធ្វើដំណើរតាមរថយន្តក្រុង (City Bus) របស់រដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញ ប្រកបដោយសុវត្ថិភាព និងផាសុកភាព៕
ចែករំលែកព័តមាននេះ