បន្តចុះរដ្ឋបាល ពិនិត្យទីតាំងកុងស៊ីទទួលបញ្ចាំក្នុងមូលដ្ឋានខណ្ឌច្បារអំពៅ
- ភ្នំពេញ
កម្លាំងគណៈបញ្ជាការឯកភាពខណ្ឌច្បារអំពៅ ដឹកនាំដោយលោកញាណ ច័ន្ទសោភា អភិបាលរងខណ្ឌ តំណាងលោកចេង មុនីរ៉ា អភិបាលខណ្ឌ និងជាប្រធានគណៈបញ្ជាការ
រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌច្បារអំពៅ ដឹកនាំដោយលោកញាណ ច័ន្ទសោភា អភិបាលរងខណ្ឌ តំណាងលោកចេង មុនីរ៉ា អភិបាលខណ្ឌ និងជាប្រធានគណៈបញ្ជាការឯកភាព បានបន្តសកម្មភាពចុះរដ្ឋបាល ត្រួតពិនិត្យទីតាំងកុងស៊ីទទួលបញ្ចាំចំនួន០២ទីតាំង នៅសង្កាត់ចំនួន០២ ស្ថិតក្នុងមូលដ្ឋានខណ្ឌ ដើម្បីពិនិត្យក្រែងមានការលួចលាក់លើការទទួលបញ្ចាំដោយខុសច្បាប់ ឬទទួលផលចោរកម្មជាដើម។
ការចុះពិនិត្យខាងលើនេះធ្វើឡើង នៅវេលាព្រឹកថ្ងៃទី២២ ខែកញ្ញា ឆ្នាំ២០២២ នៅក្នុងសង្កាត់ច្បារអំពៅទី២ និងសង្កាត់ព្រែកប្រា ។ ក្នុងនោះផងដែរ ទីតាំងទី១ ហាងបញ្ចាំយីហោ «ដារ៉ារិទ្ធី ផនសប» ដែលមានម្ចាស់ហាងឈ្មោះ ចាន់ ប៊ុនថេន និងទី២ ហាងបញ្ចាំយីហោ «រ៉ាម៉ាណែត ព្រែកប្រា» មានម្ចាស់ហាងឈ្មោះ ញ៉ក់ ធារ៉ា។
តាមប្រភពព័ត៌មានបានអោយដឹងថា កម្លាំងចម្រុះបានពិនិត្យលើទីតាំងទាំង០២នោះ រកឃើញមានម៉ូតូសរុបចំនួន៩២គ្រឿង ដោយទីតាំងទី១ នៅសង្កាត់ច្បារអំពៅ២ មានចំនួន២៦គ្រឿង និងទីតាំងទី២ នៅសង្កាត់ព្រែកប្រា មានចំនួន៦៦គ្រឿង ដោយម៉ូតូទាំងអស់នោះសុទ្ធតែមានឯកសារត្រឹមត្រូវទាំងអស់ មិនមានអ្វីខុសប្រក្រតីឡើយ។
ទន្ទឹមនឹងនោះដែរ ចំពោះអាជីវកម្មវិញ អាជ្ញាធរពិនិត្យឃើញថា ទីតាំងហាងទាំង០២ ក៏មានប័ណ្ណពន្ធប៉ាតង់ និងអាជ្ញាបណ្ណមានសុពលភាពត្រឹមត្រូវផងដែរ ។
លោកញាណ ច័ន្ទសោភា អភិបាលរងខណ្ឌ បានធ្វើការណែនាំដល់ម្ចាស់ហាងទទួលបញ្ចាំត្រូវមានការប្រុងប្រយ័ត្នខ្ពស់ចំពោះអ្នកដែលយកមធ្យោបាយផ្សេងៗមកដាក់បញ្ចាំ ជាពិសេសត្រូវពិនិត្យទៅលើឯកសារពាក់ព័ន្ធជាមួយមធ្យោបាយទាំងនោះអោយបានហ្មត់ចត់ជាមុនសិន បើត្រឹមត្រូវហើយចាំទទួលបញ្ចាំ។ ហើយក្នុងករណីសង្ស័យថាមិនប្រក្រតី ត្រូវរាយការណ៍ប្រាប់សមត្ថកិច្ចជាបន្ទាន់ ដើម្បីមានវិធានការតាមច្បាប់៕
ចែករំលែកព័តមាននេះ