ខេត្តកំពត ÷ ដើម្បីកាត់បន្ថយនូវហានិភ័យគ្រោះថ្នាក់ចរាចរណ៍នៅលើដងផ្លូវសាធារណៈដែលតែងតែកើតមានឡើងលើយានយន្តគ្រប់ប្រភេទជារៀងរាល់ថ្ងៃ នៅក្នុងទឹកដីនៃខេត្តកំពតទាំងមូល។
លោកឧត្តមសេនីយ៍ទោម៉ៅ ចន្ទ័ធុរិទ្ធ ស្នងការខេត្តបានចង្អុលបញ្ជាដល់កម្លាំងការិយាល័យចរាចរណ៍សណ្តាប់ធ្នាប់ផ្លូវគោកខេត្តដែលដឹកនាំដោយលោកវីរៈសេនីយ៍ទោស៊ូ វណ្ណាតនាយរងការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តកំពត បានដឹកនាំកំលាំងចុះអនុវត្ត នៅព្រឹកថ្ងៃទី 10 ខែកុម្ភៈឆ្នាំ 2026 ចុះអនុវត្តគោលដៅធំមុនគេគឺនៅរង្វង់មូលទុរេនមុខពហុកីឡដ្ឋានខេត្តកំពត។
យោងតាមប្រភពព័ត៌មានពីលោកនាយរងការិយាល័យចរាចរណ៍ផ្លូវគោកបានប្រាប់កោះសន្តិភាពនាព្រឹកនេះថា ការអនុវត្តរឹតបន្តឹងច្បាប់ចរាចរណ៍ផ្លូវគោកនេះមិនមែនធ្វើតែមួយថ្ងៃឬពីរថ្ងៃទេគឺចុះអនុវត្តជាបន្តបន្ទាប់ ហើយព្រឹកនេះផងដែរក៏មិនមែនអនុវត្តតែគោលដៅរង្វង់មូលមួយនេះទេគឺចុះអនុវត្តរឹតបន្តឹងគ្រប់គោលដៅនៅក្នុងក្រុងកំពត។ រីឯការត្រួតពិនិត្យនិងផាកពិន័យគឺ: ម៉ូតូដែលមិនបំពាក់កញ្ចក់ហៅមកធ្វើការអប់រំឲ្យទៅទិញកញ្ចក់។
ម៉ូតូដែលគ្មានផ្លាកលេខត្រូវពិន័យជាប្រាក់, អ្នកបើកបរម៉ូតូមិនពាក់មួកសុវត្ថិភាពត្រូវពិន័យជាប្រាក់។
លោកក៏បានបញ្ជាក់ប្រាប់ថា:គ្រាន់តែរយៈពេលមួយម៉ោងម៉ូតូដែលល្មើសមិនគ្រប់លក្ខណៈនិងមិនពាក់មួកសុវត្ថិភាពរាប់រយ គ្រឿងទៅហើយនេះមិនទាន់បូកសរុបតួលេខត្រឹមត្រូវផង។
លោកបានសំណូមពរដល់បងប្អូនដែលបើកបរប្រើប្រាស់យានយន្តគ្រប់ប្រភេទទាំងអស់ត្រូវចូលរួមគោរពច្បាប់ចរាចរទាំងអស់គ្នាដើម្បីកាត់បន្ថយហានិភ័យនៃការគ្រោះចរាចរដែលតែងតែកើតមានឡើងជាហូរហែរបង្កឲ្យរងរបួសនិងស្លាប់នៅលើដងផ្លូវសាធារណ:នាពេលកន្លងមកផងដែរ៕
ចែករំលែកព័តមាននេះ