ស្ងាត់ៗ! Floyd ប្រកាសគ្រោងប៉ះ McGregor សារជាថ្មីម្តងទៀតនៅឆ្នាំក្រោយ
អាមេរិក ៖ កំពូលអ្នកប្រដាល់អាមេរិក Floyd Mayweather Jr. បានបង្ហើបថា រូបគេចង់ប៉ះកំពូលអ្នក
អាមេរិក ៖ កំពូលអ្នកប្រដាល់អាមេរិក Floyd Mayweather Jr. បានបង្ហើបថា រូបគេចង់ប៉ះកំពូលអ្នកលេងគុនចម្រុះ UFC សញ្ជាតិអៀរឡង់ Conor McGregor សារជាថ្មីម្តងទៀតនៅឆ្នាំក្រោយ នៅក្នុងការប្រកួតមិត្តភាព (ក្រៅផ្លូវការ)។ នេះបើយោងតាមប្រភពពី BBC ចេញផ្សាយកាលពីថ្ងៃទី២១ ខែកញ្ញា។
អ្នកស្នេហាវិស័យប្រដាល់សកលនៅទូទាំងពិភពលោក នៅតែចង់ចាំមិនភ្លេចនោះទេ នៅជំនួបលើកទី១ រវាងកំពូលអ្នកប្រយុទ្ធទាំង២ កាលពីថ្ងៃទី២៦ ខែសីហា ឆ្នាំ២០១៧ ដែលត្រូវបានប្រសិទ្ធនាមថា «The Money Fight» ដោយគ្រានោះ Mayweather បានបញ្ឈប់ McGregor នៅត្រឹមទឹកទី១០ ហើយបានប្រកាសចូលនិវត្តន៍ពីអាជីព ក្រោយបញ្ចប់ការប្រកួតដ៏កក្រើកជាប្រវត្តិសាស្ត្រមួយនេះតែម្តង។
ដោយឆ្លងកាត់ការប្រកួតមិត្តភាពជាច្រើនចាប់តាំងពីចូលនិវត្តន៍ Mayweather បាននិយាយថា គេកំពុងពិភាក្សាជាមួយក្រុមការងារ ដើម្បីរៀបចំការប្រកួតតទល់នឹង McGregor សារជាថ្មីម្ដងទៀត។ ដោយអ្នកប្រដាល់កម្ពស់១,៧៣ម៉ែត្រវ័យ៤៥ឆ្នាំរូបនេះ បានថ្លែងប្រាប់កាសែត Daily Mail ថា «យើងមិនដឹងថា តើវានឹងជាក្លាយការប្រកួតមិត្តភាព ឬការប្រកួតពិតប្រាកដនោះទេ? ប៉ុន្តែសម្រាប់ខ្ញុំគឺចូលចិត្តការប្រកួតលក្ខណៈមិត្តភាពជាង»។
Mayweather ដែលកំពុងកាន់កាប់កំណត់ត្រាមិនទាន់ស្គាល់ចាញ់ក្នុងអាជីពរបស់ខ្លួន ៥០-០ បានស្នើយកកីឡដ្ឋាន Allegiant នៅទីក្រុងឡាសវេហ្គាស (Las Vegas) ជាកន្លែងដ៏មានសក្តានុពលបំផុតសម្រាប់ការប្រកួតជាមួយនឹង McGregor។
ទោះយ៉ាងណា ក្រោយមក McGregor បានបង្ហោះរូបភាពនៅលើបណ្តាញសង្គម Instagram របស់ខ្លួនពីការប្រកួតលើកមុនរវាងពួកគេ ដោយភ្ជាប់ជាមួយចំណងជើងថា #notinterested ដែលមានន័យថា «មិនចាប់អារម្មណ៍»។ ប៉ុន្តែលទ្ធភាពនៃការជួបជាគ្នាម្តងទៀតរវាងអ្នកទាំង២ត្រូវបានគេជឿថា នឹងអាចកើតឡើងសារជាថ្មីម្តងទៀត ដោយអាស្រ័យលើការចរចាតម្លៃប្រាក់លាភត្រូវរ៉ូវរវាងគ្នា៕ (ប្រភពពី BBC)
ចែករំលែកព័តមាននេះ