រាជធានីភ្នំពេញ ៖ អ្នកប្រដាល់ជើងខ្លាំងកម្ពុជា៣រូបដែលត្រូវបានផ្គូផ្គងឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ ទី២៥ កុម្ភៈ ស្អែកនេះ មានកីឡាករ ចាន់ សំអាត មកពីក្លិបអប់រំកាយស្រុកអន្លង់វែង កីឡាករ យ៉េន ឌីណា មកពីសមាគមកីឡាប្រដាល់ក្រសួងកសិកម្ម និងកីឡាករ ពុធ ឆាយរិទ្ធី មកពីក្លិបពុទ្ធសិរីវង្សកីឡា ។
គូអន្តរជាតិទី១ កីឡាករ ចាន់ សំអាត ត្រូវជួបប្រកួតជាមួយកីឡាករថៃឈ្មោះណងដួង ស៊ីតផេអេវ ក្នុងប្រភេទទម្ងន់៦០គីឡូក្រាម ។ ចាន់ សំអាត កម្ពស់១,៦៥ម៉ែត្រ ធ្លាប់ប្រកួតបាន៤៦ដង ឈ្នះ២៨ដង ចាញ់១៧ដង ស្មើ១ដង និងធ្លាប់ផ្ដួលគូប្រកួតឱ្យសន្លប់បាន១៥ដង ក្នុងពេលកីឡាករថៃមានកម្ពស់១,៦៥ម៉ែត្រ ធ្លាប់ប្រកួត៦៤ដង ឈ្នះ៥០ដង ចាញ់១២ដង ស្មើ១ដង ។ ដោយសារកីឡាករថៃរូបនេះ មិនធ្លាប់មកប្រកួតនៅស្រុកខ្មែរពីមុនមកនោះ គេមិនទាន់ដឹងថា អ្នកណាខ្លាំងជាងអ្នកណានោះទេ ។
គូអន្តរជាតិទី២ កីឡាករ យ៉េន ឌីណា ត្រូវជួបប្រកួតជាមួយកីឡាករថៃឈ្មោះ ហ្វានិមិត្ត វិរិយៈហ្វាម ក្នុងប្រភេទទម្ងន់៦១គីឡូក្រាម ។ កីឡាករ យ៉េន ឌីណា កម្ពស់១,៧០ម៉ែត្រ ធ្លាប់ប្រកួត៦៩ដង ឈ្នះ៦០ដង ចាញ់៨ដង ស្មើ១ដង និងធ្លាប់ផ្ដួលគូប្រកួតឱ្យសន្លប់បាន១៣ដង ។ ចំណែកកីឡាករថៃមានកម្ពស់១,៧៥ម៉ែត្រ ធ្លាប់ប្រកួត១៨៤ដងឈ្នះ១៣១ដង ចាញ់៥១ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បានរហូតដល់ទៅ៤០ដងឯណោះ ។ ដូច្នេះកីឡាករថៃរូបនេះពិតជាមិនធម្មតានោះទេ ម្យ៉ាងវិញទៀត កីឡាករថៃរូបនេះធ្លាប់មកប្រកួតនៅស្រុកខ្មែរជាច្រើនលើករួចមកហើយទើបគេគិតថា យ៉េន ឌីណា មិនអាចធ្វេសប្រហែសបានឡើយ ។
គូអន្តរជាតិទី៣ កីឡាករ ពុទ្ធ ឆាយរិទ្ធី ត្រូវជួបប្រកួតជាមួយកីឡាករថៃឈ្មោះអាឡិចស៊ីត នឹងត្រាកាន់ ក្នុងប្រភេទទម្ងន់៦៩គីឡូក្រាម ។ គូនេះ ពុទ្ធ ឆាយរិទ្ធី មានកម្ពស់១,៧៥ម៉ែត្រ ធ្លាប់ប្រកួត៧៥ដង ឈ្នះ៥៥ដង ចាញ់១៧ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន១៦ដង ។ ចំណែកកីឡាករថៃវិញមានកម្ពស់១,៦៨ម៉ែត្រ ធ្លាប់ប្រកួត៤០ដង ឈ្នះ៣០ដង ចាញ់៨ដង ស្មើ២ដង ។ គូនេះប្រហែលជាមិនអាចទៅរួចជាមួយ ពុទ្ធ ឆាយរិទ្ធី បានទេ ព្រោះក្នុងចំណោមអ្នកប្រដាល់ប្រភេទទម្ងន់ធ្ងន់នៅស្រុកខ្មែរអត់មានអ្នកណាស៊ូរួចជាមួយអ្នកប្រដាល់មកពីក្លិបពុទ្ធសិរីវង្សកីឡារូបនេះបានឡើយ ។
ចំណែកគូប្រកួតមិត្តភាពធម្មតាវិញ កីឡាករ ជ័យ វណ្ណៈ មកពីក្លិបឃ្លាំងមឿងកីឡា ប្រកួតជាមួយកីឡាករ ចាត ស៊ីចាន់ មកពីក្លិបអប់រំកាយ ស្រុកអន្លង់វែង ។
សម្រាប់ថ្ងៃអាទិត្យ ទី២៦ កុម្ភៈ ខានស្អែកវិញ នៅលើសង្វៀនដដែល ក៏មានការប្រកួតប្រដាល់លក្ខណៈមិត្តភាពដែលប្រជុំដោយកីឡាករខ្លាំងៗក្នុងស្រុកជាច្រើននាក់ដូចជា កីឡាករ កេត ចាន់ឌី មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ ឡុង រ៉ាម មកពីក្លិបខ្លារខិនមានរិទ្ធ ។
កីឡាករ សំខាន់ ប៉ាវចិន មកពីក្លិបរ៉ាហាប់ស្វាយប៉ាក ប្រកួតជាមួយកីឡាករ លឺត ពិសិត មកពីក្លិបកងពលតូចលេខ៧០ ។ កីឡាករ ផាន រះ មកពីក្លិបតាព្រហ្មមានជ័យ ប្រកួតជាមួយកីឡាករ ពុទ្ធ សំបូរ មកពីក្លិបពុទ្ធសិរីវង្សកីឡា ។
កីឡាករ ចាត សីហា មកពីក្លិបអប់រំកាយស្រុកអន្លង់វែង ប្រកួតជាមួយកីឡាករ ឈុន បញ្ញា មកពីក្លិបរ៉ាហាប់ស្វាយប៉ាក ។ កីឡាករ ទី ពន្លែត មកពីក្លិបអង្គរមានជ័យ ខេត្តសៀមរាប ប្រកួតជាមួយកីឡាករ រិទ្ធ មុន្នី មកពីក្លិបមកុដរាជសីហ៍ និងគូចុងក្រោយកីឡាករ ឈាង វ៉ែ មកពីក្លិបសាលវ័ន្តកីឡា ប្រកួតជាមួយកីឡាករ យ៉ាម រ៉េត មកពីក្លិបរស្មីកុមារកំព្រា ៕
ចែករំលែកព័តមាននេះ