ADផ្ទាំងផ្សព្វផ្សាយពាណិជ្ជកម្ម

Picture

ចង់​ឈ្នះ​មេដាយមាស​ស៊ីហ្គេ​ម សហព័ន្ធ​កីឡាបាល់ទះ​កម្ពុជា​សម្រេច​ចុះ​កិច្ចសន្យាផ្លូវការ​ជាមួយ​គ្រូបង្វឹក​គុយ​បា​២​រូប

2 អាទិត្យ មុន
  • ភ្នំពេញ

រាជធានី​ភ្នំពេញ ៖ សហព័ន្ធ​កីឡាបាល់ទះ​កម្ពុជា បាន​សម្រេច​ចុះ​កិច្ចសន្យាផ្លូវការ​ជាមួយ​គ្រូបង្វឹក​

រាជធានី​ភ្នំពេញ ៖ សហព័ន្ធ​កីឡាបាល់ទះ​កម្ពុជា បាន​សម្រេច​ចុះ​កិច្ចសន្យាផ្លូវការ​ជាមួយ​គ្រូបង្វឹក​បាល់ទះ​ជនជាតិ​គុយ​បា​ទាំង​២​រូប​ហើយ ក្រោយ​ពី​បាន​មើលឃើញ​ពី​បច្ចេកទេស និង​ការ​បង្ហាត់​ដល់​ក្រុម​បាល់ទះ​ជម្រើសជាតិ​កម្ពុជា ទាំង​ក្នុង​សាល និង​ឆ្នេរ​ខ្សាច់ អស់​មួយ​រយៈ​រួច​មក ។

ការ​ចុះ​កិច្ចសន្យា​នេះ ធ្វើ​ឡើង​នា​រសៀល​ថ្ងៃ​ទី​១៦ ខែកញ្ញា ឆ្នាំ​២០២២ នៅ​ទីស្នាក់ការ​របស់​សហព័ន្ធ​កីឡាបាល់ទះ​កម្ពុជា ស្ថិត​ក្នុង​វិមាន​ពហុ​កីឡដ្ឋាន​ជាតិ​អូ​ឡាំ​ពិ​ក រាជធានី​ភ្នំពេញ ។ ជាមួយ​គ្នា​នេះ​ដែរ ក៏​មានការ​ចូលរួម​ជា​សាក្សី​ពី​សំណាក់​មន្ត្រី​របស់​សហព័ន្ធ ក្រុម​គ្រូបង្វឹក និង​កីឡាករ​ជម្រើសជាតិ​កម្ពុ​ជាមួយ​ចំនួន ជា​ពិសេស មានការ​ចូលរួម​របស់​លោក​ជំទាវ Liurka Rodríguez Barrios ឯកអគ្គរដ្ឋទូត​គុយ​បា ប្រចាំ​នៅ​កម្ពុជា​ផង​ដែរ​។

លោក Leonid Abum Castillo និង​កញ្ញា Natyelis Riol Cardenas ដែល​ជា​អ្នកគ្រប់គ្រង​របស់​គ្រូបង្វឹក​ទាំង​២ សុទ្ធតែ​តាំងចិត្ត​ចូលរួម​ជា​ធ្លុង​មួយ​ជាមួយ​ក្រុម​បាល់ទះ​ជម្រើសជាតិ​កម្ពុជា ដើម្បី​ប្រជែង​យកជ័យ​ជម្នះ​ក្នុង​ការ​ប្រកួត​លើ​ឆាក​អន្តរជាតិ​នានា ជា​ពិសេស​គឺ​ដណ្តើម​មេដាយ​ក្នុង​ព្រឹត្តិការណ៍​កីឡា​ស៊ី​ហ្គេ​ម ឆ្នាំ​២០២៣ ខាង​មុខ​។ ភាគី​គុយ​បា បាន​ថ្លែងអំណរគុណ​ដល់​ថ្នាក់ដឹកនាំ​សហព័ន្ធ ដែល​បាន​ជួយ​សម្រប​សម្រួលការ​រស់នៅ និង​ការ​ធ្វើការ​របស់​ខ្លួន​នៅ​លើ​ទឹកដី​កម្ពុជា ជា​ពិសេស តាម​រយៈ​ការ​ប្រឹងប្រែង​លើ​ឆាក​អន្តរជាតិ របស់​ឯកឧត្តម ជា ពៅ អគ្គលេខាធិការ​រង​សហព័ន្ធ​។

ជាមួយ​គ្នា​នេះ​ដែរ លោក​បណ្ឌិត អាំង សិរី​ពិសិដ្ឋ អគ្គលេខាធិការ​សហព័ន្ធ​កីឡាបាល់ទះ​កម្ពុជា បាន​លើក​ឡើង​ក្រោយ​បន្ថែម​ក្បាលម៉ាស៊ីន ក្នុង​ក្រុម​បាល់ទះ​ជម្រើសជាតិ​កម្ពុជា​ថា​៖«​តាម​រយៈការ​​ជួយ​ជ្រោមជ្រែង​ពី​សំណាក់​លោក​ជំទាវ​អគ្គ​រដ្ឋទូត​គុយ​បា ប្រចាំ​នៅ​កម្ពុជា ពេល​នេះ យើង​បាន​សម្រេច​ចុះ​កិច្ចសន្យា ជាមួយនឹង​លោក Karell Pena Ventoza ជា​គ្រូបង្វឹក​បាល់ទះ​ឆ្នេរ​ខ្សាច់​បុរស ហើយ​លោក Berto Friol Barrios ជា​គ្រូ​ជំនួយ​ក្រុម​បាល់ទះ​ក្នុង​សាល​បុរស​»​។

«​ក្រោយ​យើង​ធ្វើតេស្ត​សាកល្បង​ពិនិត្យ​លើ​ការ​ផ្តល់​តិច​និ​ច និង​ទស្សនវិស័យ​មួយ​ចំនួន ស្រប​តាម​អ្វី​ដែល​ឯកឧត្តម​សន្តិ​បណ្ឌិត នេ​ត សា​វឿ​ន ប្រធាន​សហព័ន្ធ និង​ឯកឧត្តម ស សុខា អនុប្រធាន​សហព័ន្ធ​ចង្អុលបង្ហាញ ។ ក្នុង​ន័យ​តែ​មួយ​គត់ គឺ​យើង​ចង់បាន​មេដាយមាស ពេល​កម្ពុជា​ធ្វើ​ជា​ម្ចាស់
ផ្ទះ​កីឡា​ស៊ី​ហ្គេ​ម ប៉ុន្តែ​ការ​ប្រកួត​លើ​ទីលាន​វា​មិន​ស្រួល​យើង​និយាយ​នោះ​ទេ ។ តើ​ជាក់ស្តែង​យើង​ធ្វើ​បាន​កម្រិត​ណា? ​ហើយ​ខ្ញុំ​ជឿជាក់​ថា ការ​បន្ថែម​គ្រូបង្វឹក​ទាំង​២​នាក់​នេះ មក​ជួយ​យើង​ឱ្យ​មាន​សង្ឃឹមកាន់តែ​ធំ ក្នុង​ការ​ប្រជែង​យក​មេដាយមាស​»​។ លោកអគ្គលេខាធិការ​បន្ថែម​។

ថ្នាក់ដឹកនាំ​សហព័ន្ធ​កីឡាបាល់ទះ​កម្ពុជា ខាងលើបន្ត​ថា​៖«​បច្ចុប្បន្ន​នេះ ទេព​កោសល្យ​របស់​កីឡាករ
យើង​មាន​ហើយ ប៉ុន្តែ​យើង​ត្រូវ​បន្ថែម​លើ​បច្ចេកទេស និង​របៀប​មួយ​ចំនួន ពេល​ខ្លះ អ្វី​ដែល​គ្រូ​ចិន (Li Jun) ជា​គ្រូធំ​មាន ខាង​គ្រូខ្មែរ ឬ​គ្រូ​គុយ​បា អត់​មាន ហើយ​រឿង​ខ្លះ អ្វី​ដែល​គ្រូ​គុយ​បា​មាន គ្រូ​ចិន ឬ​គ្រូខ្មែរ​អត់​មាន ហើយ​អ្វី​ដែល​គ្រូ​ទាំង​២​អត់​មាន តែ​គ្រូខ្មែរ​មាន​។ ដូច្នេះ​ហើយ យើង​ជឿជាក់​ថា សមត្ថភាព​គ្រូ​ទាំង​៣​ដាក់​បញ្ចូល​គ្នា យើង​ជឿជាក់​ថា ចន្លោះ​ប្រហោង​របស់​កីឡាករ​យើង មើលឃើញ​កាន់តែ​តូច​ៗ​ទៅ​ហើយ ព្រោះថា ចំណុច​ខ្វះខាត​បាន​បំពាក់បំប៉ន​បន្ថែម ។ អ៊ីចឹង រយៈពេល​៨ ឬ ៩​ខែ​ចុង​ក្រោយ​នេះ ខ្ញុំ​ជឿជាក់​ថា លោកគ្រូ​ៗ​អាច​ពង្រឹង​គុណ​ផល​កីឡាករ បាន​ដូច​អ្វី​ដែល​ថ្នាក់ដឹកនាំ​សហព័ន្ធ​យើង​ចង់បាន​»​។

ក្រៅពី​នាំ​យក​គ្រូបង្វឹក​មក​ពី​ប្រទេស​គុយ​បា សហព័ន្ធ​កីឡាបាល់ទះ​កម្ពុជា កំពុង​តែ​ទាក់ទង តាម​រយៈ​លោក​ជំទាវ​ឯកអគ្គរដ្ឋទូត​គុយ​បា ឱ្យ​មានការ​រៀបចំ​ការ​ប្រកួត​មិត្តភាព​រវាង​ក្រុម​មក​ពី​គុយ​បា ជាមួយ​ក្រុម​បាល់ទះ​ជម្រើសជាតិ​កម្ពុជា នៅ​អំឡុង​ខែតុលា ខាង​មុខ ពោល​គឺ​ស្រប​ពេល​នឹង​ការ​រៀបចំ​ពានរង្វាន់​បាល់ទះ​សម្តេច​អគ្គមហាសេនាបតី​តេ​ជោ ហ៊ុន សែន ឆ្នាំ​២០២២ បន្ថែម​ពីលើ​ការ​ប្រកួត​មិត្តភាព​អន្តរជាតិ ជាមួយ​ក្រុម​ជម្រើសជាតិ​សិង្ហ​បុរី ផង​ដែរ ៕

Picture
Picture
Picture