ខំគេចខ្លួនទៅក្រៅប្រទេសជាង២ឆ្នាំ ទីបំផុតព្ររលឹងសង្សារអន្ទងនាំមកពន្ធនាគារ
- ភ្នំពេញ
លោក ប្លង់ សុផល ព្រះរាជអាជ្ញារង និងជាអ្នកនាំពាក្យនៃអយ្យការអមសាលាដំបូងរាជធានីភ្នំពេញ បានឲ្យដឹងថា
រាជធានីភ្នំពេញ ៖ លោក ប្លង់ សុផល ព្រះរាជអាជ្ញារង និងជាអ្នកនាំពាក្យនៃអយ្យការអមសាលាដំបូងរាជធានីភ្នំពេញ បានឲ្យដឹងថា លោក សាយ ណូរ៉ា ព្រះរាជអាជ្ញារង កាលពីរសៀលថ្ងៃទី១៧ ខែកញ្ញា ឆ្នាំ២០២២ បានសម្រេចចេញដីកាបញ្ជូនជនសង្ស័យឈ្មោះ យឹម វ៉ាន់ដេត ជាឃាតករបាញ់សម្លា.ប់គូដណ្តឹងទៅឃុំខ្លួនពន្ធនាគារ PJ តាមអំណាចសាលក្រមកំបាំងមុខ ដែលបានផ្តន្ទាទោសជនជាប់ចោទ ដាក់ពន្ធនាគារកំណត់១៥ឆ្នាំ ពីបទឃា.តកម្ម តែត្រូវរង់ចាំបើកសវនាការឡើងវិញ លើបណ្តឹងទាស់របស់ពិរុទ្ធជនរូបនេះ ។
សូមរំលឹកថា ជនបាតដៃប្រឡាក់ឈា.មរូបនេះមានឈ្មោះ យឹម វ៉ាន់ដេត អតីតជាមន្ត្រីយោធា ពាក់សក្តិ៤កន្លះ ដែលបានបាញ់ផ្តាច់ជីវិតនាងជាគូដណ្តឹងមុនថ្ងៃចូលរោងការជាង១ខែទៀតប៉ុណ្ណោះ ហើយបានរត់គេចខ្លួនអស់រយៈពេលជាង២ឆ្នាំ ទើបត្រូវបានចាប់ខ្លួនកាលពីថ្ងៃទី១៥ កញ្ញាកន្លងមក នៅខេត្តច័ន្ទបូរី ប្រទេសថៃ ។
ករណីខាងលើនេះ ជនជាប់ពិរុទ្ធមានសាលក្រមរួចរាល់ហើយ ប៉ុន្តែមិនទាន់ជាស្ថាពរ ពោលគឺសម្រេចកំបាំងមុខ ដោយទុកសិទ្ធិឲ្យប្តឹងទាស់ និងប្តឹងឧទ្ធរណ៍ ។ ចំណែកសាលក្រមដែលមាននោះ គឺសម្រេចដោយលោក ទិត្យ សុធីបូរ៉ាឆាត ជាប្រធានក្រុមប្រឹក្សាជំនុំជម្រះ លោក ចៅក្រម គី ឫទ្ធិ និងលោក ឆឹម រិទ្ធី ជាចៅក្រមប្រឹក្សា សម្រេចផ្តន្ទាទោសជនជាប់ចោទដាក់គុក១៥ឆ្នាំ ពីបទឃា.តកម្មតាមមាត្រា១១៩ មានន័យថា កំណត់អតិបរិមាខ្ពស់បំផុត ។
សាលក្រមនោះបានសម្រេចចេញដីកាឲ្យចាប់ខ្លួនជនជាប់ចោទ តាមមាត្រា ៣៥៣ ក្នុងក្រមនិតិវិធីព្រហ្មទណ្ឌ នៅចៅក្រមស៊ើបសួរមានដីកាចាប់ម្តង ដល់ចៅក្រមជំនុំជម្រះមានដីកាចាប់ខ្លួនបន្ថែម។ ពេលនេះជនជាប់ចោទត្រូវបានសមត្តកិច្ច ទើបនឹងចាប់ខ្លួនពីប្រទេសថៃមកវិញ ដូច្នេះតំណាងអយ្យការអមសាលាដំបូង សម្រេចឃុំខ្លួនជនជាប់ចោទដាក់ពន្ធនាគារ PJ រាជធានីភ្នំពេញ ជាបណ្តោះអាសន្ន ដើម្បីរង់ចាំចៅក្រមជំនុំជម្រះ បើកសវនាការលើអង្គសេចក្តីក្នុងពេលឆាប់ៗបំផុតនេះ ។
សំណុំរឿងនេះ បានធ្វើឱ្យមានការលើកទៅដល់ទំនុកច្រៀងរបស់លោក ស៊ីន ស៊ីសាមុត ដែលច្រៀងថា «ឈា.មក្រហមខ្មៅ ប្រឡាក់ដៃខ្ញុំ ឈា.មនេះឈា.មអ្វី គឺជាឈា.មស្រីដែលខ្ញុំប្រ.ហារ…» ។ ទោះបីជាបែបណា ក៏នៅតែមានសំណួរសួរថា តើមូលហេតុអ្វីដែលជននេះបាញ់ប្រ.ហារនាងជាគូដណ្តឹងបែបនេះ ដែលនាងមានទាំងរូបសម្បត្តិល្អឯក និងវិជ្ជាសម្បត្តិជាគ្រូពេទ្យ តើទៅរកឯណាបាន ?
ចែករំលែកព័តមាននេះ