ខេត្តសៀមរាប ៖ លំនៅដ្ឋានថ្មី មានទំហំ៤ម៉ែត្រគុណ៥ម៉ែត្រ សង់ពីឈើប្រក់ស័ង្កសី តម្កល់លើជើងតាងកម្ពស់ពីដី១,៥ម៉ែត្រ ក្រាលក្តារ ជញ្ជាំងក្ដារ ត្រូវបានលោកឧកញ៉ា លី ហុង …
ខេត្តសៀមរាប ៖ លំនៅដ្ឋានថ្មី មានទំហំ៤ម៉ែត្រគុណ៥ម៉ែត្រ សង់ពីឈើប្រក់ស័ង្កសី តម្កល់លើជើងតាងកម្ពស់ពីដី១,៥ម៉ែត្រ ក្រាលក្តារ ជញ្ជាំងក្ដារ ត្រូវបានលោកឧកញ៉ា លី ហុង និងលោកជំទាវ ម្ចាស់សណ្ឋាគារអង្គរ ផាលែស ខេត្តសៀមរាប ផ្តល់តាមរយៈសាខាកាកបាទក្រហមខេត្តសៀមរាប ប្រគល់ជូនក្រុមគ្រូសារក្រីក្រខ្លាំង នៅភូមិដាក់ផ្កា ឃុំតាយ៉ែក ស្រុកសូទ្រនិគម ខេត្តសៀមរាប កាលពីព្រឹកថ្ងៃទី២២ ខែកុម្ភៈ ឆ្នាំ២០១៧ ក្រោមវត្តរបស់លោកជំទាវ គួយ ណាលីន ឃឹម ប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមមរាប ព្រមទាំងគ្រឿងឧបភោគបរិភោគ ដែលជាអំណោយសប្បុរសធម៌របស់សាខាកាកបាទក្រហមកម្ពុជាខេត្តជាច្រើនទៀត ។
បន្ទាប់ពីកិច្ចស្វាគមន៍របស់លោក ម៉ក់ ប្រុស ប្រធានអនុសាខាកាកបាទក្រហមស្រុកសូទ្រនិគម និងតាមសេចក្តីរាយការណ៍របស់លោក ស៊ុំ សំអន នាយកប្រតិបត្តិសាខាកាកបាទក្រហមខេត្ត បានឲ្យដឹងថា ក្រោយពេលដែលឪពុកម្តាយរបស់ក្មួយប្រុស យី បញ្ញា បានស្លាប់ចោលមក ក្មួយ យី បញ្ញា រស់នៅស្ថិតក្នុងភាពឯកការ ហើយត្រូវបានខិតខំទៅធ្វើកម្មករដើម្បីរកប្រាក់មកចិញ្ចឹមប្អូនៗ២នាក់របស់ខ្លួន ព្រមទាំងឲ្យប្អូនស្រីបានចូលសិក្សារៀនសូត្រដែលមានការគាំទ្រពីអាជ្ញាធរឃុំ-ស្រុកផងដែរ ។
ក្រោមការអំពាវនាវរបស់សាខាកាកបាទក្រហមខេត្ត ទើបមានសប្បុរសជនដែលមានលោកឧកញ៉ា លី ហុង និងលោកជំទាវ ម្ចាស់សណ្ឋាគារអង្គរ ផាលែស ខេត្តសៀមរាប បានជួយឧបត្ថម្ភ ទើបបានសាងសង់លំនៅដ្ឋាននេះឡើង ជូនដល់ក្មួយប្រុស យី បញ្ញា ឲ្យបានរស់នៅបានសមរម្យ ហើយក៏ជាផ្ទះទី២ របស់លោកឧកញ៉ា និងជាផ្ទះទី៧ របស់សាខាកាកបាទក្រហមខេត្ត ក៏ដូចជាផ្ទះទី២ ក្នុងឆ្នាំ២០១៧នេះ ត្រូវសាងសង់អស់ថវិកាសរុប១.២០០ដុល្លារ ។
មានប្រសាសន៍ក្នុងឱកាសនោះ លោកជំទាវ គួយ ណាលីន ឃឹម ប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមមរាប ក៏បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតែងតែព្រួយបារម្ភ និងយកចិត្តទុកដាក់ចំពោះប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ។
លោកជំទាវ ក៏បានបន្តថា ដោយមើលឃើញពីទុក្ខលំបាករបស់ក្រុមគ្រួសារប្អូនប្រុស ទើបសាខាកាកបាទក្រហមកម្ពុជា ខេត្តសៀមរាប បានសម្រេចសាងសង់ផ្ទះមួយខ្នងជូនក្រុមគ្រួសារប្អូននាពេលនេះ ក្រោមការជួយឧបត្ថម្ភ របស់លោកឧកញ៉ា លី ហុង និង លោកជំទាវ ជាសប្បុរសជនក្នុងខេត្ត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលបានលើកឡើងថា កាកបាទក្រហមកម្ពុជាមានគ្រប់ទីកន្លែងសម្រាប់គ្រប់ៗគ្នា ហើយទីណាមានទុក្ខលំបាកទីនោះមានកាកបាទក្រហម កម្ពុជា ។
លោកជំទាវ គួយ ណាលីន ឃឹម ប៊ុនសុង ក៏បានបន្តថា សូមប្អូនកុំអស់សង្ឃឹម ត្រូវមើលប្អូនៗបន្តឲ្យគាត់បានរៀនសូត្រ ទោះបីជាយ៉ាងណាយើងអាចធ្វើអ្វីៗបានច្រើនណាស់សម្រាប់ខ្លួនឯង និងគ្រួសារ ហើយសង្គមក៏មិនបោះបង់ចោលប្អូនឡើយ ។
សូមបញ្ជាក់ថា អំណោយសង្កត់ផ្ទះនាពេលនោះ រួមមាន មុង១ ភួយ១ សារុង១ ក្រមា១ កន្ទេល១ អង្ករ៥០គីឡូក្រាម មី១កេស ត្រីខ១យួរ ទឹកត្រី១យួរ និងទឹកបរិសុទ្ធ៥យួរ ចានស្រាក់១ស្រាក់ ឆ្នាំង២ ខ្ទះ១ វែកឆា១ វែកបាយ១ ចាន៥ ស្លាបព្រា៥ ឡាំងទឹក២ ផ្តិលជ័រ១ កញ្ច្រែង១ កំសៀវ១ ចានដែក២ និងថវិកា២០ម៉ឺនរៀល ៕
ចែករំលែកព័តមាននេះ