កីឡាករកូនកាត់ខ្មែរ-បរទេស៣រូបកំពុងចូលរួមជាមួយជម្រើសជាតិកម្ពុជា ៣ឈុតផ្សេងគ្នា
- ភ្នំពេញ
រាជធានីភ្នំពេញ ៖ វិស័យកីឡាបាល់ទាត់ក្នុងប្រទេសកម្ពុជាបច្ចុប្បន្នកំពុងតែមានការអភិវឌ្ឍន៍ឲ្យ
រាជធានីភ្នំពេញ ៖ វិស័យកីឡាបាល់ទាត់ក្នុងប្រទេសកម្ពុជាបច្ចុប្បន្នកំពុងតែមានការអភិវឌ្ឍន៍ឲ្យ
រាជធានីភ្នំពេញ ៖ វិស័យកីឡាបាល់ទាត់ក្នុងប្រទេសកម្ពុជាបច្ចុប្បន្នកំពុងតែមានការអភិវឌ្ឍន៍ឲ្យកាន់តែប្រសើរឡើងតាមការយកចិត្តទុកដាក់ពីថ្នាក់ដឹកនាំជាអាណាព្យាបាល ដូចជាសហព័ន្ធកីឡាបាល់ទាត់កម្ពុជា សមាគម និងបណ្ដាក្លិបទាំងអស់ក្នុងប្រទេស។ ភាគីដែលពាក់ព័ន្ធ បានរួមចំណែកបង្កើតចលនាទ្រទ្រង់គាំទ្រដល់កីឡាមួយនេះ ទាំងការពង្រឹងហេដ្ឋារចនាសម្ព័ន្ធ និងសមត្ថភាពកីឡាករឲ្យកាន់តែមានការអភិវឌ្ឍន៍ឲ្យកាន់តែខ្លាំងខ្លា ដើម្បីបង្កើនកេរ្តិ៍ឈ្មោះជាតិលើឆាកអន្តរជាតិ។
ក្នុងនោះដែរធនធានកីឡាករគឺជាកត្តាដ៏សំខាន់ក្នុងការដំណាងឲ្យជាតិប្រកួតលើឆាកអន្តរជាតិ ដោយបច្ចុប្បន្នក្រុមបាល់ទាត់ជម្រើសជាតិមានទាំងធនធានកីឡាករក្នុងស្រុក និងមានកីឡាករឈាមជ័រខ្មែរ-បរទេស ដែលមានសមត្ថភាព ដែលកំពុងលេងនៅប្រទេសកម្ពុជា និងក្រៅប្រទេស ដើម្បីមកជួយក្រុមជម្រើសជាតិ។
នាពេលបច្ចុប្បន្ននេះ មានកីឡាករកូនកាត់ខ្មែរ-បរទេស ចំនួន ០៣រូបកំពុងចូលរួមជាមួយក្រុមជម្រើសជាតិកម្ពុជា ៣ឈុតផ្សេងគ្នា ដែលកំពុងប្រកួត និងត្រៀមខ្លួនប្រកួតលើឆាកអន្តរជាតិ។
១-កីឡាករកូនកាត់ខ្មែរ-ហ្គាណា ឡេង ណូរ៉ា
បច្ចុប្បន្ននេះយុវជន ឡេង ណូរ៉ា មានវ័យ១៧ឆ្នាំ គាត់ជាកូនកំព្រាដែលបានបាត់បង់ឪពុកជាជនជាតិហ្គាណាតាំងពីគេមានអាយុ៦ឆ្នាំ។ ក្រោយមកយុវជនរូបនេះស្ថិតក្នុងបន្ទុកម្តាយដែលមានកូន៤នាក់ មុនពេលម្តាយយកទៅដាក់នៅមណ្ឌលកុមារកំព្រាមួយក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ នៅក្នុងមណ្ឌលកុមារកំព្រាអង្គការនោះ ឡេង ណូរ៉ា ទទួលបានការមើលថែ រៀនសូត្រ និងផ្តើលេងបាល់ទាត់រហូតវិវត្តខ្លួនមកជាប់ក្រុមយុវជន U15 វិសាខា នាឆ្នាំ ២០១៩។ ឡេង ណូរ៉ា ឈ្នះពានមួយចំនួននៅទីនោះដូចជា ពានជើងឯកវិទ្យាល័យ, Soccer League, ជើងឯកយុវជន FFC, KMH CUP U18 មុនផ្ទេរទៅព្រៃវែងនៅឆ្នាំ២០២១ និងទើបត្រឡប់មកក្រុមធំវិសាខាវិញនៅដើមឆ្នាំ២០២២នេះ។
ក្នុងក្រុមជម្រើសជាតិយុវជនលេងក្នុងតួនាទីស្លាបឆ្វេងរូបនេះ ជាប់តាំងពីឈុត U15, U23 និងក្លាយជាកីឡាករក្មេងជាងគេបង្ហាញខ្លួនឱ្យក្រុមធំ និងកំពុងមានភារកិច្ចចូលរួមជាមួយក្រុមជម្រើសជាតិកម្ពុជាអាយុក្រោម២០ឆ្នាំ ក្នុងការប្រកួតជម្រុះព្រឹត្តិការណ៍អាស៊ី AFC U20 Asian Cup 2023 នៅប្រទេសតាជីគីស្ថាន។
២-កីឡាករកូនកាត់ខ្មែរ-នូវែលសាឡង់ លឹម អារុណ រ៉េយមិន
បច្ចុប្បន្ន លឹម អារុណ រ៉េយមិន មានវ័យ១៩ឆ្នាំ មាន១.៧៨ម៉ែត្រ រូបគេមានឪពុកជាជនជាតិខ្មែរ និងម្ដាយជាជនជាតិនូវែលសាឡង់ ហើយរូបគេបានសិក្សា និងលេងបាល់ទាត់នៅទីនោះតាំងតែពីតូច។ ក្នុងឆ្នាំ២០២០ អារុណ បានចូលរួមជាមួយក្រុមយុវជនថ្នាលបឹងកេតអាយុក្រោម១៨ឆ្នាំ និងបានដំឡើងមកកាន់ក្រុមធំនៅឆ្នាំ២០២១ និងពុំសូវមានឱកាសលេងរូបគេក៏ត្រូវបានក្លិបគីរីវង់សុខសែនជ័យនាំយកក្នុងលក្ខខណ្ឌខ្ចីជើងនៅជើងទី២ លីគកំពូលកម្ពុជាឆ្នាំ២០២២នេះ។
បន្ថែមលើនេះ អារុណ ធ្លាប់ជាប់ក្នុងក្រុមយុវជនជម្រើសជាតិកម្ពុជា អាយុក្រោម១៩ឆ្នាំ ចូលរួមព្រឹត្តិការណ៍បាល់ទាត់នៅប្រទេសជប៉ុន កាលពីដើមឆ្នាំ២០២០ ចូលរួមជម្រុះបាល់ទាត់អាស៊ី AFC U23 Asian Cup នៅប្រទេសជប៉ុនកាលពីចុងឆ្នាំ២០២១ និងជាប់ឈ្មោះជាមួយក្រុមអាយុក្រោម១៩ឆ្នាំប្រកូតជើងឯកយុវជនអាស៊ាន AFF U19 Championship 2022 នៅឥណ្ឌូនេស៊ី កាលពីពេលថ្មីៗនេះ ហើយចុងក្រោយរូបគេកំពុងជាប់ឈ្មោះក្នុង បញ្ជីប្រមូលផ្ដុំចុងក្រោយជាមួយក្រុមជម្រើសជាតិកម្ពុជាអាយុក្រោម ២៣ឆ្នាំ ត្រៀមប្រកួតមិត្តភាពអន្តរជាតិជាមួយជប៉ុន នៅថ្ងៃទី២០ ខែកញ្ញា ឆ្នាំ២០២២នេះ នៅពហុកីឡដ្ឋានជាតិមរតកតេជោ។
៣-កីឡាករកូនកាត់ខ្មែរ-អាមេរិក ថេឡរ ឌីកូឡាស់ ឌឿង (Nick Tylor)
កីឡាករកូនកាត់ខ្មែរ-អាមេរិក
បច្ចុប្បន្ន Nick Tylor មានវ័យ ២៤ឆ្នាំ កើតនៅរដ្ឋតិចសាស សហរដ្ឋអាមេរិក មានម្តាយជាជនជាតិខ្មែរ និងឪពុកជាជនជាតិអាមេរិក។ Nick Taylor មានកម្ពស់១.៧៨ម៉ែត្រ គឺជាថ្នាលយុវជនរបស់ក្រុម Dallas Texans, New Mexico Lobos, SMU Mustangs និង UCF Knights មុនផ្លាស់មកកាន់ Orlando City B នៅដើមឆ្នាំ ២០២២៕
ខ្សែបម្រើស្លាបឆ្វេង Nick Tylor ឬមានឈ្មោះខ្មែរថា ថេឡរ ឌីកូឡាស់ ឌឿង ត្រូវបានកោះហៅឲ្យមកចូលរួមជាមួយក្រុមជម្រើសជាតិឈុតធំលើកដំបូង ក្រុមការដឹកនាំរបស់អ្នកចាត់ការ Keisuke Honda ត្រៀមប្រកួតមិត្តភាពអន្តរជាតិជាមួយក្រុមបង់ក្លាដែស នៅពហុកីឡដ្ឋានជាតិមរតកតេជោ នាថ្ងៃទី២២ ខែកញ្ញា ឆ្នាំ២០២២ខាងមុខនេះ៕
ចែករំលែកព័តមាននេះ