រាជធានីភ្នំពេញ ៖ សហព័ន្ធកីឡាបាល់បោះកម្ពុជា កាលពីថ្ងៃទី១៦ កុម្ភៈ កន្លងមកនេះ បានរៀបចំធ្វើមហាសន្និបាតបញ្ចប់អាណត្តិទី៦ និងបោះឆ្នោតជ្រើសសមាជិកប្រតិបត្តិអាណត្តិថ្មីសម្រាប់ឆ្នាំ២០១៧-២០២០ជាបន្តទៀត ។
សហព័ន្ធកីឡាបាល់បោះកម្ពុជាអាណត្តិចាស់មានសមាជិក១៩រូប ដែលមានលោក ស៊ាន បូរ៉ាត ជាប្រធានសហព័ន្ធ ប៉ុន្តែក្រោយមកមានសមាជិកប្រតិបត្តិចំនួន៣រូបបានដកខ្លួនចេញ ។
សម្រាប់ការបោះឆ្នោតជ្រើសរើសសមាជិកគណៈកម្មការប្រតិបត្តិអាណត្តិថ្មីនេះ អង្គមហាសន្និបាតបានសម្រេចមិនជ្រើសរើសសមាជិកបំពេញបន្ថែមឡើយ ដោយរក្សាឱ្យនៅត្រឹម១៦រូបដដែល ។ ហើយអ្នកដែលមានសិទ្ធិចូលរួមបោះឆ្នោតទាំង៣៧រូបបានយល់ព្រមបោះឆ្នោតឱ្យទាំងអស់ ។ ដូច្នេះសមាជិកប្រតិបត្តិទាំង១៦រូបដែលសល់ពីការលាលែងបានជាប់ឆ្នោតជាសមាជិកគណៈកម្មការប្រតិបត្តិអាណត្តិថ្មីឆ្នាំ២០១៧-២០២០ជាបន្តទៀត ។
មហាសន្និបាតបានសម្រេចជ្រើសតាំងលោក ស៊ាន បូរ៉ាត ជាប្រធានសហព័ន្ធ លោក អ៊ុក សិទ្ធិជាតិ អនុប្រធានទី១ និងអនុប្រធាន៣រូបទៀតមានលោក ឈី សម្បតិ្ត លោក ស៊ាន បូរិន្ទ និងលោក គឹម រ័ត្ននារុន ។ លោក កៅ កាន់ណាលី អគ្គលេខាធិការ លោក ប៉ុន សុខ អគ្គហិរញ្ញឹក ។ ចំណែកសមាជិកប្រតិបត្តិ៩រូបទៀតមានលោក ឯក សុគន្ធ, លោក ហ៊ុន សាមុត, លោក ដួង មាសចំរើន, លោក ឃុន សមបូរ ,លោក ម៉ក់ចាន់ភិរុណ, លោក ជា កុកទ្រី, លោក ថៀង សុខេង, លោក អ៊ុំ ចាន់តារ៉ា និងលោក នាក់ ច័ន្ទភិវឌ្ឍន៍ ៕
Like our Page
