រាជធានីភ្នំពេញ ៖ សមាសភាពគូប្រកួតប្រដាល់នៅលើសង្វៀនទូរទស្សន៍ស៊ីអិនស៊ី ថ្ងៃអាទិត្យ ទី១៩ កុម្ភៈ ខានស្អែកនេះ មានចំនួន៦គូ ក្នុងនោះគូអន្តរជាតិមានចំនួន២គូដែលគេចាប់អារម្មណ៍ជាងគេ ។
គូអន្តរជាតិទី១ កីឡាករ ផាន់ សារុន មកពីក្លិបពន្លឺណេអុង ដែលមានកម្ពស់១,៦៥ម៉ែត្រ ធ្លាប់ប្រកួត៤០ដង ឈ្នះ២៨ដង ចាញ់៨ដង ស្មើ៤ដង ត្រូវជួបប្រកួតជាមួយកីឡាករថៃឈ្មោះ ចេមសឹកខាន ស.សុឆាត ក្នុងប្រភេទទម្ងន់៦០គីឡូក្រាម ។ កីឡាករថៃដែលមិនធ្លាប់មកប្រកួតនៅស្រុកខ្មែរពីមុនមករូបនេះ មានកម្ពស់១,៦៥ម៉ែត្រ ធ្លាប់ប្រកួត៧១ដង ឈ្នះ៥៦ដង ចាញ់១៣ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៨ដង ។ តាមពិត ផាន់ សារុន គ្រាន់ តែជាអ្នកប្រដាល់ជើងថ្មីមួយរូបដែលមានវិជ្ជាគុនមិនទាន់ខ្លាំងណាស់ណាទេ ដូច្នេះសម្រាប់ការប្រកួតលើកនេះពិបាកសង្ឃឹមបន្តិចហើយ ។
គូអន្តរជាតិទី២ កីឡាករ ផៃ គឹមហឿត មកពីក្លិបគីសែមានឫទ្ធិ ដែលមានកម្ពស់១,៦៥ម៉ែត្រ ធ្លាប់ប្រកួត៨៩ដង ឈ្នះ៥២ដង ចាញ់២៨ដង ស្មើ៩ដង និងធ្លាប់ផ្ដួលគូប្រកួតឱ្យសន្លប់បាន៩ដង ត្រូវជួបប្រកួតជាមួយកីឡាករថៃឈ្មោះ កៅម៉ាំងកន វ៉តែងវិសេតយីម ក្នុងប្រភេទទម្ងន់៦០គីឡូក្រាម ។ កីឡាករថៃរូបនេះមានកម្ពស់១,៧២ម៉ែត្រ ធ្លាប់ប្រកួត៨៣ដង ឈ្នះ៦៦ដង ចាញ់១៥ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន១០ដង ។ គូនេះបើធ្វើការប្រៀបធៀបទៅលើប្រវត្តិប្រកួតអាចស៊ីសងគ្នាបាន ។
ចំណែកគូប្រកួតមិត្តភាពធម្មតាវិញមានកីឡាករ យ៉ន ពិសី មកពីក្លិបសាលវ័ន្តកីឡា ប្រកួតជាមួយកីឡាករ ទេស សុខហេង មកពីក្លិបកងពលតូចលេខ៧០ ។ កីឡាករ អេ សារ័ត្ន មកពីក្លិបអេភូថងកីឡា ប្រកួតជាមួយកីឡាករ ឡុង ខេត្ត មកពីក្លិបខ្លារខិនមានឫទ្ធិ ។ កីឡាករ ភិន សុទី មកពីក្លិបទីបញ្ជាការកងទ័ពជើងទឹកប្រកួតជាមួយកីឡាករ ផន ប៊ុនម៉ៅ មកពីក្លិបពុទ្ធសិរីវង្សកីឡា និងគូចុងក្រោយកីឡាករ សៅ សេងហុង មកពីក្លិបឃ្លាំងមឿងកីឡា ប្រកួតជាមួយកីឡាករ លីន សុវណ្ណារ៉ា មកពីក្លិបបុរីរាជសីហ៍មានឫទ្ធិ៕
ចែករំលែកព័តមាននេះ