រាជធានីភ្នំពេញ ៖ ព្រឹត្តិការណ៍ប្រកួតកីឡាវាយកូនបាល់អន្តរជាតិក្របខ័ណ្ឌយុវជនអាយុក្រោម១៩ឆ្នាំ នៅក្នុងសប្ដាហ៍ទី១ កីឡាករ-កីឡាការិនីកម្ពុជាធ្លាក់ទាំងអស់ទាំងការប្រកួតវាយទោល និងការប្រកួតវាយគូ ។
លោក ជា ពៅ គ្រូបង្ហាត់កីឡាករថ្នាល់កម្ពុជាបានឱ្យដឹងថា នេះគឺជាលើកទី២ហើយដែលកម្ពុជា ទទួលធ្វើជាម្ចាស់ផ្ទះរៀបចំការប្រកួតដែលមានប្រទេសចំនួន១៩ចូលរួម ក្នុងនោះមានកម្ពុជាជាម្ចាស់ផ្ទះ ចិនតៃប៉ិ ហុងកុង ជប៉ុន ម៉ាឡេស៊ី ប៉ាគីស្ថាន ថៃ ឥណ្ឌា ហ្វីលីពីន កូរ៉េ ឥណ្ឌូណេស៊ី អូស្ត្រាលី សិង្ហបុរី សហរដ្ឋអាមេរិក វៀតណាម ចក្រភពអង់គ្លេស រុស្ស៊ី វេណេហ៊្សុយអេឡា និងម៉ាកាវ ។ កម្ពុជាបានដាក់កីឡាករ-កីឡាការិនីថ្នាលចូលរួមប្រកួតចំនួន១១នាក់ទាំង២វិញ្ញាសាគឺប្រកួតវាយទោលនិងប្រកួតវាយគូ ។
ប៉ុន្តែសម្រាប់ការប្រកួតនៅក្នុងសប្ដាហ៍ទី១ដែលធ្វើឡើងចាប់ពីថ្ងៃទី១១ កុម្ភៈ មកដល់ថ្ងៃទី១៥ កុម្ភៈ កីឡាករ-កីឡាការិនីកម្ពុជាធ្លាក់ទាំងអស់តាំងពីក្នុងវគ្គជម្រុះវិលជុំមកម្ល៉េះ ខណៈការប្រកួតនៅក្នុងសប្ដាហ៍ទី១ត្រូវបញ្ចប់នៅត្រឹមថ្ងៃទី១៩ កុម្ភៈ ។ ការប្រកួតសប្ដាហ៍ទី២នឹងត្រូវធ្វើឡើងចាប់ពីថ្ងៃទី១៨ដល់ថ្ងៃទី២៦ កុម្ភៈ ។
លោក ទេព រិទ្ធីវិទ អគ្គលេខាធិការសហព័ន្ធកីឡាវាយកូនបាល់កម្ពុជា បានមានប្រសាសន៍ថា បើទោះជាយើងចាញ់នៅក្នុងការប្រកួតនេះមែន ប៉ុន្តែយើងទទួលបានផលចំណេញច្រើន ហើយមិនយូរទេប្រហែល២-៣ឆ្នាំខាងមុខ កីឡាវាយកូនបាល់កម្ពុជានឹងខ្លាំងមិនចាញ់បណ្ដាប្រទេសទាំងនោះឡើយ ។ ការប្រកួតនេះពិតជាមានសារសំខាន់ខ្លាំងណាស ព្រោះថាវាជាពេលវេលាមួយសម្រាប់ឱ្យកីឡាករថ្នាលរបស់យើងមានឱកាសបានប្រកួតជាមួយដៃគូខ្លាំងៗក្នុងការស្វែងរកបទពិសោធន៍និងបច្ចេកទេសសម្រាប់អភិវឌ្ឍខ្លួនឯងបន្ថែមទៀត ។ លោកបានឱ្យដឹងទៀតថា គោលដៅសំខាន់របស់យើង មិនមែននៅក្នុងពេលនេះទេ គឺសម្រាប់ត្រៀមប្រកួតកីឡាស៊ីហ្គេមដែលកម្ពុជាទទួលធ្វើជាម្ចាស់ផ្ទះនៅក្នុងឆ្នាំ២០២៣ ។ ដូច្នេះលោកគិតថា នេះគឺជាពេលវេលាដែលល្អបំផុតសម្រាប់កីឡាករថ្នាលកម្ពុជា ក្នុងការស្វែងរកបទពិសោធន៍ឱ្យបានច្រើន ៕
ចែករំលែកព័តមាននេះ