កូនស្រីវ័យក្មេងចេញពីផ្ទះច្រើនខែ ពេលឃើញព័ត៌មានផ្សាយទើបដឹង
រាជធានីភ្នំពេញ ៖ បន្ទាប់ពីគេហទំព័រ«កោះសន្តិភាព»បានចេញផ្សារអត្ថបទមួយក្រោមចំណងជើងថា «ជិះម៉ូតូដើរលេងថ្ងៃបុណ្យនៃសេចក្តីស្រឡាញ់ ស្រាប់តែ…
រាជធានីភ្នំពេញ ៖ បន្ទាប់ពីគេហទំព័រ«កោះសន្តិភាព»បានចេញផ្សារអត្ថបទមួយក្រោមចំណងជើងថា «ជិះម៉ូតូដើរលេងថ្ងៃបុណ្យនៃសេចក្តីស្រឡាញ់ ស្រាប់តែ…» ធ្លាក់ពីលើម៉ូតូត្រូវរថយន្តសាំយ៉ុងកិនធ្លាយខ្ទេចក្បាលស្លាប់យ៉ាងអាណោចអាធ័មរួចមក ស្រាប់តែកាលពីវេលាម៉ោង៩យប់ ថ្ងៃទី១៥ ខែកុម្ភៈ មានស្ត្រីម្នាក់ទៅមើលនៅវត្តតាំងកសាងខាងត្បូង ហើយអះអាងថាជាកូនស្រីរបស់គាត់ដែលបានបានចេញពីផ្ទះជាច្រើនខែមកហើយ ។
គួររម្លឹកថា នារីវ័យក្មេងម្នាក់ខណៈជិះម៉ូតូជាមួយមិត្តភក្តិដើរលេងថ្ងៃបុណ្យនៃសេចក្តីស្រឡាញ់ ស្រាប់តែធ្លាក់ពីលើម៉ូតូត្រូវរថយន្តសាំយ៉ុងកិនធ្លាយខ្ទេចក្បាលស្លាប់យ៉ាងអាណោចអាធ័ម បង្កឲ្យមានការភ្ញាក់ផ្អើលកាលពីវេលាម៉ោង១២ និង៥៣នាទីរំលងអាធ្រាត្រ ឈានចូលថ្ងៃទី១៥ ខែកុម្ភៈ ឆ្នាំ២០១៧ ចំណុចមុខគ្រឹះស្ថានមីក្រូហរិញ្ញវត្ថុប្រាសាក់ តាមបណ្តោយផ្លូវជាតិលេខ៤ ស្ថិតក្នុងភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញនារីរងគ្រោះជិះម៉ូតូ១គ្រឿងមិនចាំម៉ាក មានគ្នា៣នាក់ ប្រុសម្នាក់ជាអ្នកបើកម៉ូតូឌុបស្រី២នាក់ ដោយនារីរងគ្រោះអង្គុយក្រោយគេ សង្ស័យថាមកពីដើរលេងជាមួយមិត្តភក្តិ ឬសង្សារ នៅថ្ងៃទិវានៃក្តីស្រឡាញ់ ដោយធ្វើដំណើរតាមបណ្តោយផ្លូវជាតិលេខ៤ ទិសដៅពីកើតទៅលិចក្នុងល្បឿនលឿន ស្របគ្នាជាមួយរថយន្តសាំយ៉ុង១គ្រឿង ពណ៌ស មិនចាំស្លាកលេខ ក្នុងល្បឿនលឿនដូចគ្នា ខណៈមកដល់ចំណុចកើតហេតុ ស្រាប់តែនារីរងគ្រោះធ្លាក់ពីលើម៉ូតូ ក៏ត្រូវរថយន្តសាំយ៉ុងដែលបើកមកពីក្រោយកិនចំក្បាលធ្លាយខួរខ្ទេចមុខ ស្លាប់យ៉ាងអណោចអាធ័ម ហើយរថយន្តបង្កបើកគេចទៅបាត់ ចំណែកម៉ូតូដែលឌុបនារីរងគ្រោះបានបត់ត្រឡប់ក្រោយមកមើលនារីរងគ្រោះមួយភ្លែតដែរ ឃើញស្លាប់ក៏បានជិះម៉ូតូចេញទៅបាត់ ។
ប្រភពព័ត៌មានបានឲ្យដឹងថា នៅយប់ថ្ងៃទី១៥ កុម្ភៈ ស្ត្រីម្នាក់ឈ្មោះ ផាត សារិត ហៅស្រីម៉ៅ អាយុ៣៧ឆ្នាំ មុខរបរលក់ធូរ៉េន ស្នាក់នៅភូមិខ្ពបវែង ឃុំកំពង់សំណាញ់ ក្រុងតាខ្មៅ ខេត្តកណ្តាល បានអះអាងថា សពនារីរងគ្រោះជាកូនស្រីរបស់គាត់មានឈ្មោះ រ៉ា លក្ខិណា អាយុ១៧ឆ្នាំ ។
ស្ត្រីខាងលើបានអះអាងថា កូនរបស់គាត់បានចេញពីផ្ទះជាច្រើនខែមកហើយតាំងពីមុនរដូវភ្ជុំបិណ្ឌម្ល៉េះ ដោយដើរលេងជាមួយមិត្តភក្តិស្រីប្រុសហើយមិនហ៊ានចូលផ្ទះព្រោះខ្លាចឪពុក និងយកម៉ូតូទៅជាមួយ១គ្រឿងផង ប៉ុន្តែគាត់គ្រាន់តែដឹងថា កាលពីមុនកូនស្រីធ្លាប់ប្រាប់ថាជួលផ្ទះនៅម្តុំអូដឹម សង្កាត់ចោមចៅ ខណ្ឌពោធិ៍សែនជ័យ ប៉ុន្តែថ្មីៗនេះកូនស្រីគាត់បានប្រាប់ថា នាងបានជួលផ្ទះនៅម្តុំដីហុយ សង្កាត់ទឹកថ្លា ខណ្ឌសែនសុខ វិញ ។
ស្ត្រីជាម្តាយបានឲ្យដឹងថា ដឹងតាំងពីកូនស្រីចេញពីផ្ទះមកនៅខាងក្រៅជាមួយមិត្តភក្តិ នាងធ្លាប់ទៅលេងផ្ទះម្តង និងប្រាប់ថា បាត់ម៉ូតូហើយ ព្រមទាំងមានស្នាមឆូតកដៃទៀតផង ដោយនាងប្រាប់ថាខឹងសង្សារបែកចិត្ត ។
ទោះបីជាយ៉ាងណាស្ត្រីខាងលើអះអាងថា សពនេះជាកូនស្រីរបស់គាត់៩០ភាគរយហើយ រង់ចាំព្រឹកនេះគាត់ពិនិត្យម្តងទៀត ព្រោះយប់ហើយមើលមិនសូវច្បាប់ ៕
ចែករំលែកព័តមាននេះ