រាជធានីភ្នំពេញ ៖ នារីវ័យក្មេងម្នាក់ខណៈជិះម៉ូតូជាមួយមិត្តភក្តិដើរលេងថ្ងៃបុណ្យនៃសេចក្តីស្រឡាញ់ ស្រាប់តែធ្លាក់ពីលើម៉ូតូត្រូវរថយន្តសាំយ៉ុងកិនធ្លាយខ្ទេចក្បាលស្លាប់យ៉ាងអាណោចអាធ័ម ។ ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង១២ និង៥៣នាទីរំលងអាធ្រាត្រ ឈានចូលថ្ងៃទី១៥ ខែកុម្ភៈ ឆ្នាំ២០១៧ ចំណុចមុខគ្រឹះស្ថានមីក្រូហរិញ្ញវត្ថុប្រាសាក់ តាមបណ្តោយផ្លូវជាតិលេខ៤ ស្ថិតក្នុងភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ។
នារីរងគ្រោះដែលស្លាប់នៅមិនទាន់គេស្គាល់អត្តសញ្ញាណនៅឡើយទេ មានអាយុប្រមាណ១៨ឆ្នាំ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញនារីរងគ្រោះជិះម៉ូតូ១គ្រឿងមិនចាំម៉ាក មានគ្នា៣នាក់ ប្រុសម្នាក់ជាអ្នកបើកម៉ូតូឌុបស្រី២នាក់ ដោយនារីរងគ្រោះអង្គុយក្រោយគេ សង្ស័យថាមកពីដើរលេងជាមួយមិត្តភក្តិ ឬសង្សារ នៅថ្ងៃទិវានៃក្តីស្រឡាញ់ ដោយធ្វើដំណើរតាមបណ្តោយផ្លូវជាតិលេខ៤ ទិសដៅពីកើតទៅលិចក្នុងល្បឿនលឿន ស្របគ្នាជាមួយរថយន្តសាំយ៉ុង១គ្រឿង ពណ៌ស មិនចាំស្លាកលេខ ក្នុងល្បឿនលឿនដូចគ្នា ខណៈមកដល់ចំណុចកើតហេតុ ស្រាប់តែនារីរងគ្រោះធ្លាក់ពីលើម៉ូតូ ក៏ត្រូវរថយន្តសាំយ៉ុងដែលបើកមកពីក្រោយកិនចំក្បាលធ្លាយខួរខ្ទេចមុខ ស្លាប់យ៉ាងអណោចអាធ័ម ហើយរថយន្តបង្កបើកគេចទៅបាត់ ចំណែកម៉ូតូដែលឌុបនារីរងគ្រោះបានបត់ត្រឡប់ក្រោយមកមើលនារីរងគ្រោះមួយភ្លែតដែរ ឃើញស្លាប់ក៏បានជិះម៉ូតូចេញទៅបាត់ ។
ប្រភពព័ត៌មានបានឲ្យដឹងទៀតថា នារីរងគ្រោះអាចមកពីដើរលេងជាមួយមិត្តភក្តិស្រីដែលមានសង្សារជាអ្នកឌុប ហើយសង្ស័យផឹកស៊ីស្រវឹងផង ពេលដែលម៉ូតូជិះលឿនបន្តិចធ្វើឲ្យនារីរងគ្រោះតោងមិនជាប់ បណ្តាលឲ្យធ្លាក់ពីលើម៉ូតូត្រូវរថយន្តកិនស្លាប់តែម្តង ។
ក្រោយពេលកើតហេតុ សមត្ថកិច្ចជំនាញចរាចរណ៍ខណ្ឌឆែករកមើលមិនឃើញមានអត្តសញ្ញាណនៅជាប់នឹងខ្លួន មិនដឹងទាក់ទៅបងប្អូនតាមវិធីណា ក៏រៀបចំដឹកសពទៅរក្សាទុកនៅវត្តតាំងកសាងខាងត្បូង ដើម្បីរង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ