មកដឹងពីប្រវត្តិលោក គីម ភក្ដី ធ្លាប់មានក្ដីស្រមៃ ចង់ឈ្នះថៃ និងវៀតណាម
- ភ្នំពេញ
រាជធានីភ្នំពេញ ៖ លោក គីម ភក្ដី ជាអតីតកីឡាករបាល់ទាត់ក្រុមទ័ពជើងទឹក និងធ្លាប់ជាគ្រូបង្វឹក
រាជធានីភ្នំពេញ ៖ លោក គីម ភក្ដី ជាអតីតកីឡាករបាល់ទាត់ក្រុមទ័ពជើងទឹក និងធ្លាប់ជាគ្រូបង្វឹកក្រុមឆ្លាមសមុទ្រនាអំឡុងឆ្នាំ២០១០-២០១១។
ចុងឆ្នាំ២០១៣ដល់ចុងឆ្នាំ២០១៨ លោកបានធ្វើជាមន្ត្រីបច្ចេកទេសនៅសាលាបាល់ទាត់ជាតិបាទី ដែលពេលនោះលោកបានរួមចំណែកបណ្ដុះធនធានកីឡាករល្អៗជាច្រើន ដូចជា ហ៊ុល គឹមហ៊ុយ សៀង ចន្ធា ទេស សម្បត្តិ និងយុវជនជាច្រើនទៀត។
ជាក់ស្ដែង កាលឆ្នាំ២០១៦ ក្រុម U16 កម្ពុជាបានលេខ៤ ក្នុងការចូលរួមប្រកួតដណ្ដើមពានបាល់ទាត់យុវជនអាយុក្រោម១៦ឆ្នាំអាស៊ីអាគ្នេយ៍ AFF U16 Championship។
ដើមឆ្នាំ២០១៩ លោកបានចូលរួមជាមួយក្លិបបឹងកេត ទទួលបន្ទុកជានាយកផ្នែកអភិវឌ្ឍន៍បាល់ទាត់ ។ នៅពាក់កណ្ដាលឆ្នាំ២០២០ ក្រោយការចាកចេញរបស់គ្រូបង្គោលជនជាតិថៃ Apisit Im Amphai ក្លិបបឹងកេត បានតែងតាំងលោកគីម ភក្ដី ជាគ្រូបង្គោលបណ្ដោះអាសន្ន និងបានឈ្នះជើងឯកលីគកំពូលនៅឆ្នាំដដែល។
ដើមរដូវកាល២០២២ លោកនៅអាចដឹកនាំក្រុមបាន តែចប់ជុំទី១ លោកបានធ្លាក់ខ្លួនឈឺ ដែលតាមដឹងមកថា ជាជំងឺក្រពះធ្ងន់ធរ រហូតត្រូវបានបញ្ជូនទៅមន្ទីរពេទ្យនៅវៀតណាមទៀតផង។ ក្រោយមក លោកក៏ត្រូវបានបញ្ជូនមកព្យាបាលនៅភ្នំពេញវិញ ។ ប៉ុន្មានថ្ងៃចុងក្រោយនេះ ដោយស្ថិតក្នុងស្ថានភាពអស់សង្ឃឹម លោកត្រូវបានក្រុមគ្រួសារបញ្ជូនត្រឡប់ទៅផ្ទះវិញ មុនលោកចែកឋាននៅវេលាម៉ោង៩និង១០នាទីព្រឹក ថ្ងៃទី១០ ខែកញ្ញា ក្នុងជន្មាយុ៤១ឆ្នាំ ។
គួររំលឹកផងដែរថា កាលនៅរស់រានមានជីវិត លោក គីម ភក្ដី អតីតគ្រូបង្គោលក្លិបបឹងកេតបានបង្ហើបប្រាប់សារព័ត៌មានក្នុងស្រុកថា ជ័យជម្នះពីការប្រកួតបាល់ទាត់លើក្រុមថៃ និងវៀតណាម គឺជាអ្វីដែលលោកតែងតែស្រមៃចង់បានក្នុងអាជីពលើវាលស្មៅរបស់ខ្លួនតាំងពីនៅជាកីឡាកររហូតដល់ពេលធ្វើជាគ្រូបង្វឹក។
លោក គីម ភក្ដី យល់ឃើញថា ប្រសិនបើកម្ពុជាមានសមត្ថភាពឈ្នះក្រុមទាំងពីរនេះ នោះក៏នឹងមានលទ្ធភាពក្លាយជាក្រុមកំពូលមួយនៅតំបន់អាស៊ានផងដែរ។ ដូច្នេះហើយបានជាលោកតែងតែព្យាយាមអភិវឌ្ឍ និងជំរុញកីឡាករកម្ពុជា ជាពិសេសកូនក្រុមឈានទៅសម្រេចក្ដីស្រមៃនេះ៕
ចែករំលែកព័តមាននេះ