លើកទី២ ! បាក់ស្ពានដែកស្ទឹងកោះស្លាដោយសារឡានដឹកឈើ
ខេត្តកំពត ៖ សេចក្តីរាយការណ៍បានឲ្យដឹងថា កាលពីវេលាម៉ោង១២ និង៣០នាទីរំលងអាធ្រាត្រ ឈានចូលថ្ងៃទី១៥ ខែកុម្ភៈ ឆ្នាំ២០១៧ មានរថយន្តយីឌុបម៉ាកហ៊ីយ៉ាន់ដាយ …
ខេត្តកំពត ៖ សេចក្តីរាយការណ៍បានឲ្យដឹងថា កាលពីវេលាម៉ោង១២ និង៣០នាទីរំលងអាធ្រាត្រ ឈានចូលថ្ងៃទី១៥ ខែកុម្ភៈ ឆ្នាំ២០១៧ មានរថយន្តយីឌុបម៉ាកហ៊ីយ៉ាន់ដាយ១គ្រឿង ពណ៌ស ចំណុះ៨តោន ពាក់ស្លាកលេខភ្នំពេញ 3B-5745 បានដឹកឈើពេញទ្រុង ឆ្លងកាត់ស្ពានដែកស្ទឹងកោះស្លា ស្ថិតក្នុងភូមិស្រការនាគ ឃុំតាកែន ស្រុកឈូក ខេត្តកំពត បណ្តាលឲ្យបាក់ស្ពានទៅមុខលែងរួចនៅជាប់គាំងលើស្ពាន ។
សេចក្តីរាយការណ៍បានឲ្យដឹងទៀតថា រហូតមកដល់វេលាម៉ោង៩ព្រឹក ថ្ងៃទី១៥ ខែកុម្ភៈ កម្លាំងសមត្ថកិច្ចជំនាញខាងរដ្ឋបាលព្រៃឈើកំពត កំពុងរើឈើដែលនៅលើរថយន្តដើម្បីស្ទូចយករថយន្តបង្កចេញពីលើស្ពាននាំយកមកកាន់រដ្ឋបាលព្រៃឈើកំពត ដែលឈើផ្ទុកលើរថយន្តតាមការប៉ាន់ប្រមាណពីសមត្ថកិច្ចជំនាញរដ្ឋបាលព្រៃឈើថា ប្រមាណជា៣០ម៉ែត្រគូប ។
ប្រភពព័ត៌មានពីប្រជាពលរដ្ឋនៅតំបន់កើតហេតុបានខ្សឹបប្រាប់អ្នកព័ត៌មានយើងដោយមិនឲ្យបញ្ចេញឈ្មោះថា មុនពេលកើតហេតុគេឃើញរថយន្តធំៗដឹកឈើចេញទៅមុនអស់២គ្រឿងទៅហើយបានឆ្លងផុតពីស្ពានដែកនេះដោយសុវត្ថិភាព ហើយបន្ទាប់មកទើបរថយន្ត១គ្រឿងមកតាមក្រោយ ដោយមានមន្ត្រីរដ្ឋបាលព្រឈើម្នាក់នាំផ្លូវផងដែរ ។ លុះមកដល់ចំណុចស្ពានដែកស្រាប់តែស្រុតស្ពានទៅមុខលែងរួច ទើបមន្ត្រីមេព្រៃរូបនោះប្រកូសប្រកាសថា បានចាប់រថយន្តដឹកឈើខុសច្បាប់បាន១គ្រឿងដែលដឹកបង្កឲ្យបាក់ស្ពានដែកនៅចំណុចខាងលើ ។
ពាក់ព័ន្ធករណីខាងលើនេះ «កោះសន្តិភាព»បានភ្ជាប់ទូរសព្ទ័ទៅលោក ជួន សារ៉ា ដើម្បីសុំឲ្យបំភ្លឺ ហើយលោកជួន សារ៉ា នាយរងខណ្ឌ បានប្រាប់ថា លោកជាប់ប្រជុំ មិនបានបំភ្លឺជូនទេ សុំឲ្យទាក់ទងទៅលោក កង គឹមលី នាយខណ្ឌរដ្ឋបាលព្រៃឈើ តែទូរស័ព្ទខលចូលជាច្រើនដងតែគ្មានមនុស្សលើកសោះ ។
គួររម្លឹកថា កន្លងមកករណីបាក់ស្ពានដោយសារតែរថយន្តឈ្មួញរកស៊ីដឹកឈើខុសច្បាប់នៅលើផ្លូវលំមួយខ្សែនេះធ្លាប់បាក់ស្ពានដែកអស់១ខ្សែរួចមកហើយកាលពីពេលថ្មីៗកន្លងទៅនេះ រហូតមកដល់ពេលនេះ ជាលើទី២ហើយដែលបាក់ស្ពានដោយសារឈ្មួញរកស៊ីឈើខុសច្បាប់ផ្ទុកឈើលើសចំណុះបែបនេះ ។
ប្រជាពលរដ្ឋចាំមើលថា តើសមត្ថកិច្ចជំនាញមានវិធានការយ៉ាងណាចំពោះជនល្មើសដែលធ្វើឲ្យខូចខាតស្ពានសាធារណៈរបស់រដ្ឋដោយសារតែការរកស៊ីខុសច្បាប់នេះ ៕
ចែករំលែកព័តមាននេះ