រាជធានីភ្នំពេញ ៖ សហព័ន្ធកីឡាប៉េតង់កម្ពុជា ត្រៀមបញ្ជូនអត្តពលិកជម្រើសជាតិចំនួន៤រូប ទៅចូលរួមប្រកួតនៅក្នុងព្រឹត្តិការណ៍ពិភពលោក Cub Dumon លើកទី១ នៅប្រទេសបែលហ្ស៊ិក ដែលព្រឹត្តិការណ៍នេះ
រាជធានីភ្នំពេញ ៖ សហព័ន្ធកីឡាប៉េតង់កម្ពុជា ត្រៀមបញ្ជូនអត្តពលិកជម្រើសជាតិចំនួន៤រូប ទៅចូលរួមប្រកួតនៅក្នុងព្រឹត្តិការណ៍ពិភពលោក Cub Dumon លើកទី១ នៅប្រទេសបែលហ្ស៊ិក ដែលព្រឹត្តិការណ៍នេះនឹងចាប់ផ្តើមធ្វើឡើងនៅថ្ងៃទី១៣ មេសា ខាងមុខនេះ ។
លោក សុខ ម៉ុង គ្រូជំនួយរបស់សហព័ន្ធកីឡាប៉េតង់កម្ពុជា បានឱ្យដឹងថា អត្តពលិកកម្ពុជាទាំង៤រូប ដែលសហព័ន្ធធ្វើការជ្រើសរើសឱ្យទៅចូលរួមប្រកួតពានរង្វាន់ពិភពលោកលើកនេះមាន កីឡាករ សុខ ចាន់មាន កីឡាករ ញ៉ែម បូរ៉ា កីឡាការិនីស្រ៊ាង សុរ៉ាឃីម និងកីឡាការិនី អ៊ុក ស្រីមុំ ។ ចំណែកប្រតិភូដឹកនាំមានលោក សូម៉ៃ សុគា អគ្គលេខាធិការរងសហព័ន្ធកីឡាប៉េតង់កម្ពុជា លោក ហ៊ុន សាមុត ប្រធាននាយកដ្ឋានអប់រំកាយ និងកីឡា និងគ្រូបង្វឹក២រូបទៀត មានលោក អឹុម ផាត គ្រូធំ និងលោក សុខ ម៉ុង គ្រូជំនួយ ។ ចំពោះវិញ្ញាសាដែលត្រូវដាក់ឱ្យប្រកួតវិញនោះ មានការខុសប្លែកពីការប្រកួតដទៃទៀត ដែលលើកនេះ មិនមានវិញ្ញាសាវាយយកពិន្ទុនោះទេ គឺមានតែវិញ្ញាសា
វាយទោល១ទល់និង១បុរស វិញ្ញាសា វាយទោល១ទល់និង១នារី វិញ្ញាសាវាយគូបុរស វិញ្ញាសាវាយគូនារី និងវិញ្ញាសាវាយគូចម្រុះបុរស-នារី ។
លោក អឹុម ផាត បានមានប្រសាសន៍ថា ព្រឹត្តិការណ៍នេះមិនសូវមានអត្តពលិកអាស៊ីចូលរួមទេ ភាគច្រើនសុទ្ធតែជាអត្តពលិកមកពីអឺរ៉ុប ។ ទោះបីជាយ៉ាងណា លោកនៅតែមានជំនឿលើអត្តពលិកកម្ពុជាក្នុងការដណ្ដើមយកមេដាយពីការប្រកួតលើកនេះ ព្រោះថាពួកគេសុទ្ធតែបានឆ្លងកាត់ការធ្វើតេស្តសមត្ថភាពយ៉ាងត្រឹមត្រូវមុននឹងសម្រេចជ្រើសរើសយកមកហ្វឹកហាត់ ហើយពេលវេលានៃការហ្វឹកហាត់ក៏រាងយូរក្រែលដែរ ដូច្នេះលោកគិតថា ប៉ុនហ្នឹងគ្រប់គ្រាន់ហើយ ។
លោក សូម៉ៃ សុគា បានមានប្រសាសន៍ថា ទោះបីជាយ៉ាងណាយើងមិនអាចធ្វេសប្រហែសបានឡើយ ព្រោះអត្តពលិកគេក៏ខ្លាំងដែរ ទើបយើងមានសង្ឃឹមដណ្ដើមមេដាយត្រឡប់មកវិញ ៕
ចែករំលែកព័តមាននេះ