រៀបរាប់ប្រាប់អ្នកសារព័ត៌មាន និងសមត្ថកិច្ច ស្ត្រីវ័យកណ្តាលមួយរូបបានរៀបរាប់ទាំងទឹកភ្នែកហូររហាម ក្រោយកូនៗបានបដិសេធមិនព្រមចេញពីដីចម្ការមួយកន្លែងនៅជើងភ្នំគូលែន ស្រុកបន្ទាយស្រី ដែលជាទីកន្លែងមនុស្សរាប់ពាន់ម៉ឺននាក់ បានចូលមកប្រមូលផ្តុំគ្នា ក្រោយ
ខេត្តសៀមរាប ៖ រៀបរាប់ប្រាប់អ្នកសារព័ត៌មាន និងសមត្ថកិច្ច ស្ត្រីវ័យកណ្តាលមួយរូបបានរៀបរាប់ទាំងទឹកភ្នែកហូររហាម ក្រោយកូនៗបានបដិសេធមិនព្រមចេញពីដីចម្ការមួយកន្លែងនៅជើងភ្នំគូលែន ស្រុកបន្ទាយស្រី ដែលជាទីកន្លែងមនុស្សរាប់ពាន់ម៉ឺននាក់ បានចូលមកប្រមូលផ្តុំគ្នា ក្រោយលោក ខឹម វាសនា ប្រធានគណបក្សសម្ព័ន្ធ ដើម្បីប្រជាធិបតេយ្យ និងបរិវាររបស់លោក បានឃោសនាបែបប្រជាភិថុតិថា ពិភពលោកនឹងលិចទឹក ហើយមានតែតំបន់ភ្នំគូលែនមួយគត់ ដែលមិនលិចលង់។
ប្រាកដណាស់ ថ្ងៃទី១១ ខែកញ្ញា ឆ្នាំ២០២២នេះ គឺជាថ្ងៃកាន់បិណ្ឌទី១ នៃពិធីបុណ្យភ្ជុំបិណ្ឌខ្មែរ តែបងស្រីមួយរូបដែលជាកម្មការិនីកាត់ដេរ បែរជាស្រក់ទឹកភ្នែករហាម ក្រោយពីកូនជឿលង់លើលោក ខឹម វាសនា ថា នឹងមានទឹកលិចលង់ ហើយមិនព្រមចេញពីដីចម្ការនោះទាល់តែសោះ។
បងស្រីដដែលបានបញ្ជាក់ថា កូននោះ គឺរស់នៅជា «កូនខ្ញុំវានិយាយថា ខ្លាចទឹកលិច។ គឺគេឃោសនា ផ្តោតទឹកលិចនេះតែម្តង»។ នេះជាការបញ្ជាក់របស់បងស្រីដែលពោលបណ្តើរស្រក់ទឹកភ្នែកបណ្តើរ ព្រោះគាត់ទើបតែបានដឹងថា កូនត្រូវប្តីរបស់គាត់យកមក ដែលកន្លងមកនាងបានធ្វើការនៅរោងចក្រ និងទុកកូននៅជាមួយជីដូន។
ចំណែកបងប្រុសមួយរូបទៀត មានឈ្មោះថា បេន វេន អាយុ៤៥ឆ្នាំ មកពីខេត្តព្រៃវែង បានប្រាប់សារព័ត៌មានកោះសន្តិភាពថា លោកបានសុំសមត្ថកិច្ចជូនទៅក្នុងចម្ការ តែកូនស្រីអាយុ១៨ឆ្នាំមិនព្រមចេញពីចម្ការទេ គឺនាងក្រាញ់ននៀលថា នៅក្នុងដីចម្ការ អ៊ីចឹងនាងសុំបន្តនៅក្នុងចម្ការ២ខែទៀត។ «ខ្ញុំលឺអ៊ីចឹង ក៏មិនហ៊ានបង្ខំកូនដែរ ខ្លាចទាញទៅវាមានបញ្ហាតាមផ្លូវ នាំមានបញ្ហាកាន់តែឈឺចាប់ទៀត»។ នេះជាការពោលបញ្ជាក់របស់បងប្រុស បេន វេន ដែលបានផ្តល់សម្ភាសន៍ដល់អ្នកសារព័ត៌មាននៅជើងភ្នំគូលែន ក្រោយបរាជ័យមិនអាចលួងលោមកូនស្រីឱ្យចេញពីចម្ការលោក ខឹម វាសនា ដើម្បីត្រឡប់ទៅផ្ទះវិញ។
បើយោងតាមប្រភពពីសមត្ថកិច្ចបានប្រាប់ឱ្យដឹងនៅព្រឹកថ្ងៃទី១១ ខែកញ្ញា ឆ្នាំ២០២២នេះថា ចំពោះបងប្អូន និងសកម្មជនគណបក្ស LDP ដែលមកស្នាក់នៅក្នុងជំរុំដី ចម្ការ លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ តាំងពីថ្ងៃទី២៣ ដល់ថ្ងៃទី៣១ ខែសីហានោះ មានប្រមាណជា១ម៉ឺន៥ពាន់នាក់ ក្រោយពីកម្លាំងការិយាល័យនគរបាលជំនាញបានធ្វើការស្រង់ស្ថិតិ និងដាក់ប្រកាសតាមមេក្រូរួចមក ក្នុងនោះប្រជាពលរដ្ឋបានយល់ដឹងច្រើនក៏នាំគ្នាសម្រុកចាកចេញត្រឡប់ទៅផ្ទះវិញជាបន្តបន្ទាប់ ខណៈនៅសល់ប្រមាណជាង១ពាន់នាក់ទៀត ដែលជាសកម្មជនគណបក្ស LDP ប៉ុណ្ណោះ។
ប្រភពបានប្រាប់ទៀតថា ចំពោះបងប្អូនក្រុមគ្រួសារស្វែងរកសាច់ញាតិនោះ ខ្លះចេញមក ខ្លះទៀតមិនបានចេញមក ថែមទាំងហ៊ានដៀលឪពុកម្តាយផងដែរ ធ្វើឱ្យឪពុកម្តាយខ្លះលុតជង្គង់ ខ្លះអង្គុយសំពះកូន ដើម្បីសុំអង្វករឱ្យកូនចេញទៅផ្ទះវិញ ប៉ុន្តែពួកគេដៀលត្មះឱ្យអ្នកមានគុណថា មិនដឹងខ្យល់អីទេ ទឹកជំនន់ជិតលិចស្លា.ប់អស់ហើយ នៅមិនដឹងខ្លួនទៀត បើឪពុកម្តាយមកតាមខ្ញុំ និងបានរស់នៅយ៉ាងសប្បាយ មិនខ្វល់ពីទឹកលិច មានតែដីលោក ពូ ទេ។
ប្រភពពីសមត្ថកិច្ចបានបញ្ជាក់ទៀតថា ចំពោះឪពុកម្តាយវិញ ពេលចូលតាមសមត្ថកិច្ចទៅជួបកូនបានត្រឹមតែយំសោកស្តាយយ៉ាងខ្លាំង ដែលកូនចាត់ទុកលោក ខឹម វាសនា ជាឪពុកល្អបំផុតជាងឪពុកម្តាយបង្កើតប្រហែលពួកនេះប្រើមន្តអាគមគាថា ធ្វើឱ្យកូនចៅរបស់ពួកគាត់ និងបងប្អូនប្រជាពលរដ្ឋជឿធ្លុងរកអ្វីមកប្រៀបធៀបគ្មាន សូម្បីតែព្រះសង្ឃឪពុកម្តាយរបស់ពួកវាក៏ហ៊ានជេរដែរ កុំថា ពួកយើងប៉ុណ្ណឹងនោះ។ ចំពោះទឹកពួកគាត់ប្រើប្រាស់តាមអណ្តូងស្នប់ និងភ្លើង មានភ្លើងរដ្ឋ និងម៉ាស៊ីនភ្លើងរបស់ពួកគាត់ ចំណែកស្បៀងអាហារវិញ ប្រហែលជិតអស់ហើយ ប្រសិនបើអស់ ទោះបីពួកគេបើករថយន្តចេញពីក្នុងចម្ការនោះ ក៏ចេញមិនរួចដែរ ពួកកម្លាំងយើងបិទខ្ទប់ជិតអស់ហើយគ្មានឱ្យចេញរួចទេ។
ប្រភពពីឪពុកម្តាយដែលមកស្វែងរកកូន បានរៀបរាប់ប្រាប់ភ្នាក់ងារកោះសន្តិភាពនៅល្ងាចថ្ងៃទី១០ នេះថា ពួកគាត់ពេលចូលទៅជួបកូនស្រីសុំអង្វរឱ្យកូនចេញមកទៅផ្ទះវិញ បែរជាកូនស្រី និយាយថា ដាច់ខាតរូបគេមិនត្រឡប់ទៅផ្ទះវិញទេ បើចង់ឱ្យកូនទៅផ្ទះវិញចាំទទួលស.ពទៅ។ដូច្នេះធ្វើឱ្យគាត់យំស្ទើរគាំងបេះដូងស្លា.ប់នៅចំពោះមុខកូនស្រី ក៏ប៉ុន្តែរូបគាត់ទប់ចិត្តបាន រួចក៏ដើរចេញពីរបស់គណបក្សនោះ ដើម្បីទៅផ្ទះវិញ។ ប៉ុន្តែកម្លាំងសមត្ថកិច្ចរបស់យើងនៅតែយាមបិទខ្ទប់យ៉ាងតឹងរឹងនៅជុំវិញបរិវេណចម្ការម្រេច ដើម្បីបន្តឃ្លាំមើលពីសកម្មភាពរបស់លោក ខឹម វាសនា ប្រធានគណ បក្សLDP នៅដដែល។ចំពោះការដកកម្លាំងចេញនៅពេលណានោះ ពួកលោកមិនបានដឹងទេ រង់ចាំបទបញ្ជាពីថ្នាក់លើតែប៉ុណ្ណោះ។
ប្រភពដដែលបន្ថែមទៀតថា ចំពោះបងប្អូន ឬសកម្មជនចេញបាន ប៉ុន្តែចូលទៅក្នុងវិញ គឺសមត្ថកិច្ចមិនអនុញ្ញាតឱ្យចូលទេ ។ ប្រភពពីសមត្ថកិច្ចបានបញ្ជាក់ឱ្យដឹងទៀតថា នៅល្ងាចថ្ងៃទី១០ ខែកញ្ញា ឆ្នាំ២០២២ ឃើញមានសកម្មជន LDP បានទំនាក់ទំនងតាមទូរស័ព្ទទៅអាជ្ញាធរខេត្ត ដើម្បីសុំជួយអន្តរាគមន៍ឱ្យពួកគេបានចេញទៅទិញ សម្ភារៈ ម្ហូប អាហារ យកមកផ្គត់ផ្គង់ស្បៀងជូនបងប្អូនរបស់ពួកគេ ខណៈពេលនោះត្រូវបានអាជ្ញាធរខេត្តបដិសេធមិនយល់ព្រមឱ្យចេញមកទិញស្បៀងឡើយ ធ្វើឱ្យពួកគេខឹងសម្បាយ៉ាងខ្លាំងចំពោះអាជ្ញាធរ ជាពិសេសសមត្ថកិច្ចយើង ដែលប្រចាំនៅទៅនោះ។
សូមបញ្ជាក់ថា សកម្មជន LDP ជាង១០០០នាក់ នៅបន្តស្ម័គ្រចិត្តរស់នៅក្នុងចំការម្រេចលោកខឹម វាសនា ទោះបីហួសថ្ងៃឱសានវាទយ៉ាងណាក៏ដោយ។ សូមរំលឹកផងដែរថា ការឃោសនារបស់លោក ខឹម វាសនា ថា មានលិចលង់ភពផែនដី ដោយអះអាងថា មានតែចំការម្រេចរបស់លោកនៅជិតភ្នំគូលែនទេ ដែលអាចឲ្យពលរដ្ឋចៀសផុតពីសេចក្តីស្លា.ប់បាន។
ការលើកឡើងរបស់លោក ខឹម វាសនា នៅក្នុងបណ្ដាញសង្គមហ្វេសប៊ុក បែបនេះបានធ្វើឱ្យពលរដ្ឋទាំងក្នុង និងក្រៅប្រទេសនាំគ្នាសម្រុកមករស់នៅក្នុងចំការម្រេចលោក ខឹម វាសនា ប្រមាណជាជិត២ម៉ឺននាក់ ហើយបច្ចុប្បន្ននេះ ពលរដ្ឋបានយល់ព្រមចាកចេញទៅវិញជិតអស់ហើយនៅសល់តែជាងមួយពាន់នាក់តែប៉ុណ្ណោះ ដែលនៅក្រាញននៀលមិនព្រមចាកចេញ ។
ចែករំលែកព័តមាននេះ