រាជធានីភ្នំពេញ ៖ យោងតាមការប្រកាសព័ត៌មានរបស់ស្ថានទូតសហរដ្ឋអាមេរិកថ្ងៃទី២៧ កញ្ញា ឱ្យដឹងថា រដ្ឋាភិបាលសហរដ្ឋអាមេរិក និងរាជរដ្ឋាភិបាលកម្ពុជា នឹងចុះហត្ថលេខាលើវិសោធនកម្ម នៃកិច្ចព្រមព្រៀងទ្វេភាគី ចំនួនពីរ នៅថ្ងៃទី២៨ ខែកញ្ញា លើការផ្ដល់ថវិកាចំនួន៣៥,១០លានដុល្លារ សហរដ្ឋអាមេរិក ជាជំនួយថវិកាសំរាប់ឆ្នាំ២០១០ពីទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្ដរជាតិ (USAID) ដើម្បីជួយនិងពង្រឹងវិស័យសុខាភិបាលនិង វិស័យអប់រំ ដែលជាវិស័យអភិវឌ្ឍជាអាទិភាព នៅកម្ពុជា ។
លោកស្រី Carol A. Rodley ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា នឹងអញ្ជើញចូលរួមនៅក្នុងពិធី និងចុះហត្ថលេខាជាសាក្សី ។ លោកឡុង វិសាលោ រដ្ឋមន្ដ្រីស្ដីទីក្រសួងការបរទេស និងសហប្រតិបត្ដិការអន្ដរជាតិ និងលោក Flynn Fuller នាយកបេសកកម្មនៃទីភ្នាក់ងារសហរដ្ឋអាមេរិកដើម្បីអភិវឌ្ឍអន្ដរជាតិ នឹងចុះហត្ថលេខាក្នុងនាមរដ្ឋាភិបាលរបស់ខ្លួន ។ ចំនួនថវិកាសរុបដែលUSAID សន្យាផ្ដល់ឱ្យនៅក្នុងវិស័យសុខាភិបាល និងវិស័យអប់រំតាមរយៈកិច្ចព្រមព្រៀងទ្វេភាគីនេះ គឺមានជាង២៧៧លានដុល្លារសហរដ្ឋអាមេរិក ។
វិសោធនកម្មលើកិច្ចព្រមព្រៀងវិស័យសុខា ភិបាលផ្ដល់ថវិកាជំនួយចំនួន៣៣,៥៥លាន ដុល្លារសហរដ្ឋអាមេរិក ជាជំនួយដែលជួយ ដល់ការសំរេចគោលដៅសុខភាពថ្នាក់ជាតិរបស់ កម្ពុជា។ ជំនួយនេះត្រូវប្រើសំរាប់លើកកំពស់ និងគាំទ្រដល់រាល់សកម្មភាពដែលកំពុងដំណើរ ការដើម្បីកាត់បន្ថយអត្រាឆ្លង និង ផលប៉ះពាល់ នៃជំងឺអេដស៍ ការពារនិងកំចាត់ជំងឺឆ្លងធំៗ ដូចជាជំងឺរបេង ធ្វើឱ្យប្រសើរឡើងនូវការគាំពារ សុខភាពរបស់មាតា កុមារ និងសុខភាពបន្ដពូជ ដោយពង្រឹងប្រព័ន្ធសុខភាពសាធារណៈ និង អាទិភាពនានាថ្នាក់ជាតិក្នុងផ្នែកសុខភាព របស់រដ្ឋាភិបាលកម្ពុជា។
វិសោធនកម្មលើកិច្ចព្រមព្រៀងក្នុងវិស័យ អប់រំផ្ដល់ថវិកាចំនួនជាង១,៥៥លានដុល្លារ សហរដ្ឋអាមេរិក ដើម្បីគាំទ្រគោលដៅអប់រំ របស់រាជរដ្ឋាភិបាលកម្ពុជា។ ជំនួយថវិកានេះ ប្រើសំរាប់គាំទ្រដល់កម្មវិធីផ្នែកអប់រំដែលកំពុង ដំណើរការក្នុងគោលបំណងធ្វើឱ្យប្រសើរឡើង នូវគុណភាព និងប្រយោជន៍ទាក់ទងនៃការអប់រំ ជាមូលដ្ឋាន និងពង្រីកលទ្ធភាពចូលសាលារៀន ឱ្យកាន់តែច្រើនឡើងសំរាប់កុមារទាំងអស់ រួមទាំងជនជាតិភាគតិច អ្នកបាត់បង់លទ្ធភាពពលកម្ម និងកុមារក្រីក្រខ្លាំង ។ សកម្មភាពទាំងអស់ ថែមទាំងផ្ដោតទៅលើការកាត់បន្ថយអត្រាបោះ បង់ចោលសាលារៀន និងអត្រារៀនត្រួតថ្នាក់ តាមរយៈការបង្កើនគុណភាពនៃការបង្រៀន ការបណ្ដុះបណ្ដាលពីការគ្រប់គ្រងសាលារៀន និងការវាយតំលៃលទ្ធផលនៃការសិក្សារបស់សិស្ស ។
ដោយបន្ថែមទៅលើសកម្មភាពក្នុងវិស័យ សុខាភិបាលនិងអប់រំ USAID ក៏ថែមទាំងជួយ ដល់កម្មវិធីជាច្រើនទៀត សំរាប់ជាប្រយោជន៍ ដល់ប្រជាជនកម្ពុជាទាំងអស់ ដូចជាកម្មវិធីសិទ្ធិ មនុស្ស នីតិរដ្ឋ អភិបាលកិច្ចមូលដ្ឋាន និងវិមជ្ឈការ ការប្រឆាំងអំពើពុករលួយ ការគ្រប់គ្រង ធនធានធម្មជាតិ និងកំណើនសេដ្ឋកិច្ច និងការ ប្រឆាំងការជួញដូរមនុស្ស ។ USAID រំពឹងផ្ដល់ ថវិកាសរុបចំនួន៦៩លានដុល្លារសហរដ្ឋអាមេ រិកជាជំនួយឧបត្ថម្ភដល់កម្ពុជា ក្នុងឆ្នាំ២០១០ ។ ពិធីចុះហត្ថលេខានឹងប្រព្រឹត្ដទៅនៅថ្ងៃនេះនៅក្រសួងការបរទេសនិងសហប្រតិបត្តិការអន្តរជាតិ ៕
ចែករំលែកព័តមាននេះ