រាជធានីភ្នំពេញ ៖ ទីផ្សារការិយាល័យនៅតែមានតម្រូវការល្អប្រសើរនៅឡើយ ដែលបានធ្វើឲ្យតម្រូវការបន្តកើនឡើង ។ ជាក់ស្តែង នៅឆ្នាំនេះគេរំពឹងថា ការិយាល័យទំហំ៦,៥ម៉ឺនម៉ែត្រការ៉េបន្ថែមទៀត
រាជធានីភ្នំពេញ ៖ ទីផ្សារការិយាល័យនៅតែមានតម្រូវការល្អប្រសើរនៅឡើយ ដែលបានធ្វើឲ្យតម្រូវការបន្តកើនឡើង ។ ជាក់ស្តែង នៅឆ្នាំនេះគេរំពឹងថា ការិយាល័យទំហំ៦,៥ម៉ឺនម៉ែត្រការ៉េបន្ថែមទៀតនឹងដាក់ចូលទីផ្សារ ។
យោងតាមការសិក្សារបស់ក្រុមហ៊ុន CBRE Cambodia ដែលបានបញ្ចប់កាលពីដំណាច់ឆ្នាំមុនឲ្យដឹងថា សម្រាប់រយៈពេល១២ខែបន្ទាប់នៃឆ្នាំនេះ ទីផ្សារការិយាល័យកម្ពុជានឹងមានកំណើនបន្ថែមទៀត ដោយទំហំការិយាល័យថ្មីនឹងកើនដល់៦,៥ម៉ឺនម៉ែត្រការ៉េ ក្នុងនោះគម្រោងក្រុមហ៊ុន Hongkong Land ដែលវិនិយោគលើអគារ Exchange Square មានទំហំ១២ពាន់ម៉ែត្រការ៉េ ។ ការសិក្សាដដែលបានរកឃើញដែរថា គិតត្រឹមដំណាច់ត្រីមាសទី៤ឆ្នាំមុន មានអគារការិយាល័យតិចតួចប៉ុណ្ណោះបានដាក់ចូលទីផ្សារ គឺមានអគារការិយាល័យកម្រិតC តែ៤.០០០ម៉ែត្រការ៉េប៉ុណ្ណោះ ។
ក្នុងអំឡុងត្រីមាសទី៤ឆ្នាំមុន ទីផ្សារការិយាល័យកម្រិតB បានកើនឡើងនូវការជួល២,២% ហើយរហូតដល់ដំណាច់ឆ្នាំមុនបានកើនដល់១១,២% បើធៀបនឹងរយៈពេលដូចគ្នាកាលពីឆ្នាំ២០១៥ ។
ការសិក្សាដដែលបានរកឃើញថា ទីផ្សារការិយាល័យកម្រិតA មានតម្លៃ២៨ដុល្លារក្នុងមួយម៉ែត្រការ៉េ ហើយអគារការិយាល័យកម្រិតB មានតម្លៃចន្លោះពី១០ទៅ១៨ដុល្លារ និងកម្រិតC មានតម្លៃចន្លោះពី៥ទៅ១០ដុល្លារក្នុងមួយម៉ែត្រការ៉េ ។
លោក ប៉ែន ភិរុន នាយកគ្រប់គ្រងទូទៅនៃអគារវិមានកាណាឌីយ៉ា បានថ្លែងថា តម្រូវការអគារការិយាល័យកាលពីចុងឆ្នាំមុន ហាក់មានសភាពស្ងប់ស្ងាត់ធៀបនឹងអំឡុងដើមឆ្នាំ ប៉ុន្តែបើគិតពីដើមឆ្នាំរហូតមកទល់ពេលនេះ តម្រូវការអគារការិយាល័យមានកំណើន១០% ធៀបរយៈពេលដូចគ្នាកាលពីឆ្នាំមុន ។ ទន្ទឹមនឹងនេះ លោកនៅតែមានសុទិដ្ឋិនិយមថា ក្នុងឆ្នាំ២០១៧តម្រូវការនឹងកើនខ្ពស់ ដោយសារវិនិយោគិនមកពីប្រទេសចិនបានចូលមកកម្ពុជាច្រើន ។
លោកបន្តថា ៖ « អគារការិយាល័យក្នុងវិមានកាណាឌីយ៉ា មានទំហំប្រមាណ១៧ពាន់ម៉ែត្រការ៉េ ហើយអត្រាប្រើប្រាស់រហូតមកទល់ពេលនេះ បានគ្របដណ្តប់ប្រមាណ៩០%ហើយ។ អគារការិយាល័យនៅវិមានកាណាឌីយ៉ា គិតចាប់ពីជាន់ទី១៦ ដល់២៧ និងជាន់ខាងក្រោមមួយចំនួនទៀត » ។
អគារការិយាល័យនេះបានដាក់ជួលក្នុងតម្លៃ២៥ បូក៥ដុល្លារក្នុងមួយម៉ែត្រការ៉េ ។
នាយកគ្រប់គ្រងផ្នែកអចលនទ្រព្យនៃក្រុមហ៊ុន VTRUST PROPERTY Co, Ltd លោក ហុន ម៉េងហៀង បានថ្លែងស្រដៀងគ្នាថា តម្រូវការអគារការិយាល័យនៅចុងឆ្នាំ ពិតជាមានកំណើនយឺតធៀបនឹងដើមឆ្នាំ ប៉ុន្តែបើគិតពីដើមឆ្នាំរហូតមកដល់ពេលនេះ តម្រូវការអគារការិយាល័យនៅ VTRUST TOWER មានកំណើនប្រមាណ១៥% ធៀបនឹងរយៈពេលដូចគ្នាកាលពីឆ្នាំមុន ។
លោកបន្តថា ៖ « លោកមានសុទិដ្ឋិនិយមអំពីតម្រូវការអគារការិយាល័យនៅឆ្នាំនេះ ដោយសារអត្រាប្រើប្រាស់អគារនេះ និងការិយាល័យទូទៅកើនឡើង និងការចូលមកដល់នូវក្រុមហ៊ុនបរទេសកាន់តែច្រើន » ៕
ចែករំលែកព័តមាននេះ