មានកាណូកបូមខ្សាច់ចំនួន០៤គ្រឿង បានមកបូមដីបាតព្រែកទន្លេវ៉ៃគោ យកអាចម៍ដី លប់ចំណីព្រែកទន្លេវ៉ៃគោ និងដឹកដីចាក់ពីលើ កម្ពស់ផ្លូវជាតិលេខ១ មហាជនដាក់ការសង្ស័យថា
ខេត្តស្វាយរៀង ៖ មានកាណូកបូមខ្សាច់ចំនួន០៤គ្រឿង បានមកបូមដីបាតព្រែកទន្លេវ៉ៃគោ យកអាចម៍ដី លប់ចំណីព្រែកទន្លេវ៉ៃគោ និងដឹកដីចាក់ពីលើ កម្ពស់ផ្លូវជាតិលេខ១ មហាជនដាក់ការសង្ស័យថា អាជ្ញាធរចាក់ដីពុះឡូចែកគ្នា ។
ទាក់ទិនករណីនេះដែរ សមត្ថកិច្ចបានប្រាប់ឲ្យដឹងនាព្រឹកថ្ងៃទី៧ ខែកញ្ញា ឆ្នាំ២០២២នេះថា កាណូតបូមខ្សាច់បូមដីបាតព្រែកទន្លេវ៉ៃគោ ចាក់លប់ចំណីព្រែកនេះ នៅចំណុចខាងកើតមន្ទីររៀបចំដែនដីនគរូបនីយកម្មសំណង់ និងសុរិយោដីខេត្តស្វាយរៀង ស្ថិតនៅភូមិសាលា ស្រុកចាស់ សង្កាត់ព្រៃឆ្លាក់ ក្រុងស្វាយរៀង។
ប្រភពបន្តថា ការបូមដីបាតព្រែកទន្លេវ៉ៃគោ យកអាចម៍ដីលប់ចំណីព្រែកនេះកើតឡើងរយៈពេលជាង១ខែមកហើយ គឺចាប់តាំងពីដើមខែសីហា ឆ្នាំ២០២២មកម្ល៉េះ។
មន្ត្រីមន្ទីរធនធានទឹក និងឧតុនិយមខេត្តបានឲ្យដឹងថា ក្រសួងធនធានទឹក និងឧតុនិយម បានដាក់គម្រោងសាងសង់សំណង់ទំនប់ សណ្តរវ៉ៃគោ ១ខ្សែប្រវែង២,៣០០ម៉ែត្រ (ទទឹង៥ម៉ែត្រ ក្រាលក្រួសក្រហមចាប់ពីផ្លូវជាតិលេខ១ទៅជើង) និងសាងសង់សំណង់សិល្បការចំនួន០៤កន្លែង ស្ថិតនៅសង្កាត់ព្រៃឆ្លាក់ ក្រុងស្វាយរៀង ដើម្បីស្តុកទឹកទុកនៅក្នុងអាងព្រែកទន្លេវ៉ៃគោ សម្រាប់អភិរក្សធនធានធម្មជាតិ និងមច្ឆាជាតិក្នុងព្រែកទន្លេវ៉ៃគោ អនុវត្តដោយនាយកដ្ឋានវិស្វកម្ម ប្រើប្រាស់ប្រភពថវិកាជាតិឆ្នាំ២០២០។
ទាក់ទិនករណីកាណូតបូមខ្សាច់ ចំនួន០៤គ្រឿង មកចតបូមដីបាតព្រែកទន្លេវ៉ៃគោ យកអាចម៍ដីលប់ចំណីព្រែកនេះដែរ លោកហែម ពិសិដ្ឋ អភិបាលរងខេត្តស្វាយរៀង បានប្រាប់អ្នកសារព័ត៌មានយើងថា នេះជាគម្រោងចាក់ដីរបស់រដ្ឋបាលខេត្តស្វាយរៀង លើផ្ទៃដីទំហំ៣៣,៧៧៦ម៉ែត្រការ៉េ (ចុះចាប់ពីផ្លូវជាតិលេខ១ ប្រវែង១០០ម៉ែត្រក្បាល២៧,០៨ម៉ែត្រ ក្បាលដី ទទឹង១១៤,៤៩ម៉ែត្រ បណ្តោយ៤០៤,៧៣ម៉ែត្រ ក្បាលក្រោម១០០ម៉ែត្រ)។
លោកហែមពិសិដ្ឋ បន្តថា គម្រោងចាក់ដីរបស់រដ្ឋបាលខេត្តនេះ គឺ៖ ទី១- ស្តារ ព្រែកទន្លេវ៉ៃគោទី២- យកដីទុកសម្រាប់ចែកឲ្យមន្ទីរនានាជុំវិញខេត្តស្វាយរៀង សាងសង់អគារ មន្ទីរថ្មី ។
បើតាមមន្ត្រីសាលាខេត្តម្នាក់បានបង្ហើបឲ្យដឹងថា មន្ទីរនានា ទាំង២៥មន្ទីរ គឺមានទីតាំង និងអគារធ្វើការ គ្រប់មន្ទីរ គ្រាន់តែមន្ទីរមួយចំនួនមានទីធ្លា តូច និងអគារចំណាស់ ត្រូវដោះដូរ ទើបរដ្ឋបាលខេត្តចាក់ដីចំណីព្រែកក្រៅទំនប់សណ្តរវ៉ៃគោ ត្រៀមទុកចែកឲ្យមន្ទីរដែលត្រូវការដី រៀបចំទីតាំងមន្ទីរថ្មី និងសាងសង់អគារថ្មី ។ ហើយរដ្ឋបាលខេត្តក៏បានលើកស្លាកគម្រោងផ្សព្វផ្សាយដល់មហាជនដែរ ក៏ប៉ុន្តែគាត់មិនបានមើលស្លាកគម្រោង បែរជានាំគ្នាដាក់ការសង្ស័យ មិនសមហេតុផលទៅវិញ៕
ចែករំលែកព័តមាននេះ