រាជធានីភ្នំពេញ ៖ សហព័ន្ធកីឡាប្រដាល់កម្ពុជា កាលពីថ្ងៃទី១ ខែកុម្ភៈ ឆ្នាំ២០១៧ កន្លងមកនេះ បានរៀបចំធ្វើមហាសន្និបាតបូកសរុបលទ្ធផលការងារឆ្នាំ២០១៦ និងលើកទិសដៅបន្ត ដោយផ្ដោតទៅលើផែនការកែទម្រង់ឆ្ពោះទៅកាន់ការប្រកួតកីឡាស៊ីហ្គេមលើកទី៣២ ឆ្នាំ២០២៣ ក្រោមអធិបតីភាពលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា។
លោកឧត្តមសេនីយ៍ឯក តែម ម៉ឺន ប្រធានសហព័ន្ធកីឡាប្រដាល់កម្ពុជា បានមានប្រសាសន៍ថា ឥឡូវនេះដល់ពេលត្រូវធ្វើកំណែទម្រង់ហើយ បើមិនដូច្នោះទេ យើងមិនមានកីឡាករប្រកបដោយគុណភាពសម្រាប់ការប្រកួតកីឡាស៊ីហ្គេម ឆ្នាំ២០២៣ បានឡើយ ។ ការធ្វើកំណែទម្រង់ធ្វើយ៉ាងណាឱ្យស្របទៅនឹងទិសដៅរបស់គណៈកម្មាធិការជាតិអូឡាំពិកកម្ពុជា ក៏ដូចជាក្រសួងអប់រំ យុវជន និងកីឡាបានកំណត់ ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា មានប្រសាសន៍ឱ្យដឹងពីផែនការកំណែទម្រង់ថា បើសហព័ន្ធណាមិនធ្វើកំណែទម្រង់ មិនទាន់ដោះស្រាយបញ្ហាផ្ទៃក្នុងឱ្យបានទាន់ពេលវេលាទេ សហព័ន្ធនោះនឹត្រូវព្យួរសមាជិភាពមិនឱ្យធ្វើសកម្មភាពឡើយ ។ នៅឆ្នាំ២០២០ សហព័ន្ធទាំងអស់ត្រូវតែសម្រេចគោលដៅរបស់ខ្លួនឱ្យបាន ហើយបើសហព័ន្ធណានៅតែបង្ហាញពីភាពទន់ខ្សោយរបស់ខ្លួននោះ នឹងមិនត្រូវបានដាក់ចូលក្នុងបញ្ជីប្រកួតទេ ។ រយៈពេល៤ឆ្នាំនេះ គឺជាពេលវេលាដែលយើងត្រូវកសាងសមត្ថភាពអត្តពលិកឱ្យមានគុណភាពខ្ពស់ ។
លោកបន្តថា ដោយឡែកប្រដាល់សាកល គឺជាសហព័ន្ធមួយ ឯគុនបុរាណខ្មែរគឺជាសហព័ន្ធមួយ លែងឱ្យនៅជាមួយគ្នាទៀតហើយ ។ នេះជាប្រវត្តិសាស្ត្រហើយដែលសហព័ន្ធកីឡាប្រដាល់បានបំបែកខ្លួនជា២ ប៉ុន្តែលោកសូមសំណូមពរដល់សហព័ន្ធទាំង២ ត្រូវជួយគ្នាធ្វើការរួមគ្នា គ្រាន់តែមិនឱ្យលូកដៃជ្រៀតជ្រែកកិច្ចការរដ្ឋបាលគ្នាប៉ុណ្ណោះ ។
សហព័ន្ធកីឡាប្រដាល់កម្ពុជា ដែលប្ដូរឈ្មោះមកជាសហព័ន្ធប្រដាល់គុនខ្មែរនោះ មានសមាជិកគណៈកម្មការប្រតិបត្តិចំនួន១៣រូប គឺលោកឧត្តមសេនីយ៍ឯក តែម ម៉ឺន ជាប្រធានសហព័ន្ធ លោក វ៉ា ស៊ិនភារម្យ អនុប្រធានទី១ លោក វេជ្ជបណ្ឌិតឆឹង យ៉ៅយ៉េន អនុប្រធាន លោក ម៉ិល កាដូ អគ្គលេខាធិការ លោកស្រី ប៉ឹង សំអាង អគ្គហិរញ្ញឹក លោកឧត្តមសេនីយ៍ ងិន ភារម្យ សមាជិក លោកឧត្តមសេនីយ៍ គឹម ឡាវី សមាជិក លោក ចាន់ សុទ្ធ សមាជិក លោក មាស សុខគ្រី សមាជិក លោក ទេស សូ សមាជិក លោកឧត្តមសេនីយ៍ រាជ សុផែន សមាជិក លោក ថុក ប៊ុនធឿន សមាជិក និងលោក គួន សុវណ្ណឌី ជាសមាជិក ។
ចំណែកសហព័ន្ធកីឡាប្រដាល់សាកលវិញនោះ មានសមាជិកគណៈកម្មការប្រតិបត្តិចំនួន១៥រូបគឺ លោកវេជ្ជបណ្ឌិត ឆឹង យ៉ៅយ៉េន ត្រូវបានជ្រើសតាំងជាប្រធានសហព័ន្ធ លោក វ៉ា ស៊ិនភារម្យ អនុប្រធាន លោក ម៉ិល កាដូ អនុប្រធាន លោក មាស វុទ្ធី អនុប្រធាន លោក បួយ សោភ័ណ្ឌ អគ្គលេខាធិការ និងលោក ងិន វ៉ាន់ដា អគ្គហិរញ្ញឹក ព្រមទាំងសមាជិកគណៈកម្មការប្រតិបត្តិចំនួន៩រូបទៀត ។
លោក វ៉ាត់ ចំរើន បានឱ្យដឹងទៀតថា សហព័ន្ធមួយដែលខ្លាំងត្រូវតែមានអគ្គលេខាធិការជាសេនាធិការចេះរៀបចំផែនការយុទ្ធសាស្ត្រនៅក្នុងសហព័ន្ធឱ្យបានល្អ ។ ជាមួយគ្នានេះដែរ ប្រធានសហព័ន្ធទាំង២ សុទ្ធតែបានប្ដេជ្ញាចិត្តក្នុងការរូបរួមគ្នាធ្វើការដឹកនាំហ្វឹកហាត់ឱ្យបានល្អទាំងក្រុមជម្រើសជាតិ រហូតដល់បណ្ដាក្លិបនៅទូទាំងប្រទេស ៕
ចែករំលែកព័តមាននេះ