កម្ពុជាគ្រោងធ្វើម្ចាស់ផ្ទះរៀបចំការប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍នៅខែមីនា ឆ្នាំ២០២៣
- ភ្នំពេញ
រាជធានីភ្នំពេញ ៖ សហព័ន្ធកីឡាវ៉ូវីណាមកម្ពុជា គ្រោងធ្វើម្ចាស់ផ្ទះរៀបចំការប្រកួតជ្រើសរើសជើងឯក
រាជធានីភ្នំពេញ ៖ សហព័ន្ធកីឡាវ៉ូវីណាមកម្ពុជា គ្រោងធ្វើម្ចាស់ផ្ទះរៀបចំការប្រកួតជ្រើសរើសជើងឯកអាស៊ីអាគ្នេយ៍នៅខែមីនា ឆ្នាំ២០២៣ បន្ទាប់ពីគណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ២០២៣(CAMSOC)អនុញ្ញាតជាផ្លូវការ។
យោងតាមសេចក្ដីជូនដំណឹងរបស់CAMSOC ចុះថ្ងៃទី២៦ សីហា ឆ្នាំ២០២២ឱ្យដឹងថា សម្ដេចពិជ័យសេនាទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានCAMSOCបានអនុញ្ញាតជាផ្លូវការឱ្យសហព័ន្ធកីឡាវ៉ូវីណាមរៀបចំការប្រកួតជ្រើសរើសជើងឯកអាស៊ីអាគ្នេយ៍ចាប់ពីថ្ងៃទី២៥ ដល់ថ្ងៃទី៣០ ខែមីនា ឆ្នាំ២០២៣នៅរាជធានីភ្នំពេញ ។ មិនតែប៉ុណ្ណោះCAMSOCបានឱ្យសហព័ន្ធសាមីរៀបចំបទបញ្ជាការប្រកួតជាភាសាអង់គ្លេស ដោយសហការជាមួយគណៈកម្មការហិរញ្ញវត្ថុ និងផ្គត់ផ្គង់គម្រោងចំណាយនិងធ្វើរបាយការណ៍ជូនCAMSOCក្រោយបញ្ចប់ការប្រកូត។
លោក អ៊ូ រតនា ប្រធានសហព័ន្ធកីឡាវ៉ូវីណាមកម្ពុជា ធ្លាប់បានបញ្ជាក់ឱ្យដឹងផងដែរថាការប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍គឺជាការវាស់ស្ទង់កម្រិតបច្ចេកទេសជាមួយបណ្ដាប្រទេសក្នុងតំបន់ ដើម្បីត្រៀមឆ្ពោះទៅប្រកួតកីឡាស៊ីហ្គេម នៅក្នុងអំឡុងខែឧសភា ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះព្រឹត្តិការណ៍កីឡាជាប្រវត្តិសាស្ត្រមួយនេះ ។ ចំពោះវិញ្ញាសាដែលត្រូវដាក់ឱ្យប្រកួតមានទាំងអស់ចំនួន៣០។
គួររំលឹកផងដែរថា សម្រាប់ការប្រកួតកីឡាស៊ីហ្គេមលើកទី៣១ ឆ្នាំ២០២១ (លើកមកធ្វើនាឆ្នាំ២០២២)នៅប្រទេសវៀតណាម ដែលទើបតែបានបញ្ចប់ទៅកាលពីពេលថ្មីៗនេះ ប្រភេទកីឡាវ៉ូវីណាមកម្ពុជាដណ្ដើមបានមេដាយច្រើនជាងគេ ក្នុងនោះមេដាយមាសចំនួន៣គ្រឿង មេដាយប្រាក់ចំនួន២គ្រឿង និងមេដាយសំរឹទ្ធចំនួន៩គ្រឿង សរុប១៤គ្រឿង ៕
ចែករំលែកព័តមាននេះ