រាជធានីភ្នំពេញ ៖ ក្រោយការបែកបាក់ស្នេហាជាមួយកីឡាការិនីជម្រើសជាតិផ្នែកហែលទឹក កញ្ញា ហែមថុន វិទិនី កីឡាករល្បីឈ្មោះប្រចាំក្រុមបឹងកេតអង្គរ លោក ចាន់ វឌ្ឍនាកា មិនទាន់បើកចំហស្នេហាជាថ្មីនៅឡើយទេ បើទោះជា
រាជធានីភ្នំពេញ ៖ ក្រោយការបែកបាក់ស្នេហាជាមួយកីឡាការិនីជម្រើសជាតិផ្នែកហែលទឹក កញ្ញា ហែមថុន វិទិនី កីឡាករល្បីឈ្មោះប្រចាំក្រុមបឹងកេតអង្គរ លោក ចាន់ វឌ្ឍនាកា មិនទាន់បើកចំហស្នេហាជាថ្មីនៅឡើយទេ បើទោះជាមានការទម្លាយថា លោកបែកគ្នាពីសង្សារចាស់ ព្រោះតែមានអ្នកថ្មី ។ ក្នុងជំនួបចុងក្រោយលោកបានប្រកែកថា មិនទាន់គិតរឿងស្នេហាជាថ្មីនោះទេ ដោយលោកមិនចង់បែងចែកការគិតក្រៅពីការប្រកួតបាល់ទាត់ក្នុងពេលដែលលោកត្រូវឡើងចុះទៅហ្វឹកហាត់ និងប្រកួតឱ្យក្លិបជប៉ុននិងក្រុមជម្រើសជាតិកម្ពុជានោះទេ។
កីឡាកររូបនេះនៅតែស្ថិតក្នុងអារម្មណ៍មហាជន បន្ទាប់ពីលោកបានជួយឱ្យក្រុមបឹងកេតអង្គរមានលទ្ធផល១ស្មើជាមួយក្រុមឡាវកាលពីយប់ថ្ងៃទី៣១ មករា ដែលជាការចង់បានរបស់អ្នកគាំទ្រ ។ លោកគឺជាតារាឆ្នើមដែលត្រូវគេមើលឃើញថា ទទួលបានប្រជាប្រិយភាពខ្ពស់ជាងគេ ដោយសូម្បីតែរឿងឯកជនរបស់លោកក៏មានអ្នកតាមប្រមាញ់ច្រើនដែរ ជាពិសេសគឺរឿងស្នេហា ។ ប្រភពពីក្លិបបឹងកេតអង្គរដែលកីឡាករ ចាន់ វឌ្ឍនាកា ជ្រកកោនបានអះអាងថា កីឡាកររូបនេះមានហាងឆេងយ៉ាងខ្លាំង បន្ទាប់ពីលោក Jun Koyama ប្រធានក្លិបបាល់ទាត់ Fujieda MYFC បានចុះកុងត្រាជាមួយក្នុងលក្ខណៈខ្ចីជើងឱ្យទៅលេងនៅក្នុងប្រទេសជប៉ុនរយៈពេល១ឆ្នាំ ។ ទោះបីលោកមិនត្រូវបានក្លិប Fujieda MYFC ទិញយកទៅលេងផ្ដាច់មុខរយៈពេលកំណត់ដូចគ្នានឹងកីឡាករដែលលេងនៅក្នុងក្លិបជប៉ុនផ្សេងទៀតក្ដី ប៉ុន្តែមានការបញ្ជាក់ថា តម្លៃខ្លួនកីឡាករកម្ពុជារូបនេះ មិនក្រោមម៉ឺនដុល្លារទេ ដោយគ្រាន់តែខាងជប៉ុនខ្ចីជើងយកទៅលេងពេញមួយឆ្នាំ ។ តម្លៃខ្លួនរបស់ចាន់ វឌ្ឍនាកា រំពឹងថា បន្តឈានឡើងសម្រាប់ការព្រមព្រៀងក្នុងឆ្នាំទី២ និងពេលកីឡាករ ចាន់ វឌ្ឍនាកា អាចឈានទៅលេងក្នុងក្លិបលំដាប់អឺរ៉ុប និងពិភពលោក ក្រោយការអភិវឌ្ឍសមត្ថភាពនោះផង ទើបអ្នកណាៗក៏ចាត់ទុកវត្តមានទៅបង្ហាញខ្លួនក្នុងក្លិបជប៉ុនរបស់ជើងខ្លាំងកម្ពុជារូបនេះ ក្រៅពីជួយគេល្បីឈ្មោះ ក៏ធ្វើឱ្យគេសំបូរស្នេហ៍ណាស់ដែរ នៅក្នុងចង្កោមអ្នកគាំទ្រជានារីស្រស់ស្អាត ។
ប្រភពពីខាងកីឡាការិនី ហែមថុន វិទិនី បានអះអាងថា លោកបែកពីនាងដោយសារតែសំបូរស្នេហ៍ ហើយលែងអាល័យស្នេហ៍ចាស់ ។ ប៉ុន្តែសម្រាប់កីឡាកររូបនេះបានអះអាងថា ខ្លួនមិនទាន់គិតគូរ ។ លោកថា ខ្លួនបានច្រានចោលស្នេហា ដោយសារតែមិនទាន់ចង់មានស្នេហា បណ្ដាលឱ្យប៉ះពាល់ការងារ ។ យ៉ាងណាមិញ ការអះអាងយ៉ាងខ្លីរបស់លោកមិនធ្វើឱ្យអ្នកគាំទ្រភាគច្រើនជឿនោះទេ ក្នុងពេលដែលលោកក្រៅតែពីកាន់តែល្បីឈ្មោះ ក៏មើលទៅសង្ហារណាស់ដែរ ជាមួយនឹងឱកាសថតស្ប៉តជាបន្តបន្ទាប់នាពេលចុងក្រោយ ។ ក្នុងនោះដោយសារតែលោកគឺជាកូនសំណព្វចិត្តរបស់លោកអភិបាលខេត្តកំពតផង ទើបរឹតតែពិបាកជឿថា លោកនៅទំនេរ បេះដូងក្រោយបែកស្នេហ៍ចាស់ ។ កីឡាករ ចាន់ វឌ្ឍនាកា បញ្ជាក់ថា ខ្លួនមានស្រីច្រើន ប៉ុន្តែក្នុងចំណោមនារីទាំងនោះលោកមិនទាន់ទទួលយកជាម្ចាស់បេះដូងនោះទេ ក្នុងពេលដែលលោកមិនទាន់ចប់ការងារជាមួយភាគីជប៉ុនជាលក្ខណៈខ្ចីជើង ។ លោកបានលើកឡើងមិនខុសពីពេលមុនថា អត់ទាន់គិតទេ ចាំមើលការងារធូរស្រាលសិន ។ កីឡាកររូបនេះធ្លាប់បានប្រកាសថា អាជីពបាល់ទាត់មិនជួយឱ្យលោកមានពេលវេលាផ្ទាល់ខ្លួននោះទេ ដោយសូម្បីតែពេលញ៉ាំបាយជាមួយគ្រួសារ ក៏មិនមាននោះដែរ ទើបលោកបញ្ជាក់ថា បើមានស្នេហាក្នុងពេលស្ថានភាពការងារមមាញឹកខ្លាំង គឺពិតជាធ្វើឱ្យលោកទទួលលទ្ធផលដូចមុន ។
យ៉ាងណាមិញ លោកសារភាពថា មិនខ្វះមនុស្សស្រីដែលលោកសិក្សានោះទេ ដោយគ្រាន់តែលោករាប់អានក្នុងន័យមើលចិត្ត ស្របគ្នាដែលនារីទាំងនោះក៏ស្រឡាញ់រាប់អានលោកវិញ ក្នុងនាមជាអ្នកគាំទ្រ ។ លោកថា ការងារសំខាន់ជាងរឿងផ្ទាល់ខ្លួន ទើបលោកមិនទាន់ចង់ខ្វល់ខ្លាំងក្លាពាក់ព័ន្ធនឹងរឿងរ៉ាវនេះ ហើយចង់ឱ្យការងារមានភាពស្រឡះដៃសិន ចាំគិតដល់រឿងស្នេហាជាផ្លូវការតែម្ដង ។ លោកថា ក្រោយពេលសម្រាកពីការប្រកួតក្នុងស្រុក លោកត្រូវទទួលភារៈទៅហ្វឹកហាត់ និងចូលប្រកួតនៅក្នុងប្រទេសជប៉ុនទៀត ទើបសុទ្ធតែជាមូលហេតុពិបាកឱ្យលោកទទួលយកនារីណាម្នាក់ក្នុងពេលដែលលោកមិនមានពេលគ្រប់គ្រាន់ដើម្បីចងរឹតស្នេហា ។ ការអះអាងមួយនេះធ្វើឱ្យអ្នកគាំទ្រទុកចិត្តបន្តិច ដោយសារតែពេលកន្លងលោកក៏មិនដែលបង្ហាញវត្តមានជាមួយនារីប្លែកមុខណាម្នាក់ ក្រោយពីបែកបាក់ជាមួយ ហែមថុន វិទិនី ។ លោកថា បើមានស្នេហាលោកនឹងបើកចំហមិនលាក់លៀមទេ ដោយសារតែនោះគឺជារឿងសុភមង្គលរបស់លោក និងនារីដែលលោកស្រឡាញ់ ដែលមិនអាចនឹងលេងសើចបាន ។
គួរបញ្ជាក់ថា ចាន់ វឌ្ឍនាកា នឹងអាចបង្ហាញខ្លួននៅក្នុងប្រទេសជប៉ុនច្រើនជាងនៅកម្ពុជា ចាប់ពីដើមឆ្នាំ២០១៧នេះទៅ ដោយសារតែគេត្រូវប្រើពេលច្រើនស្វែងយល់បច្ចេកទេសតាមទម្រង់ជប៉ុន និងអឺរ៉ុប ដែលត្រូវបង្វឹកដោយភាគីជប៉ុន ។ យ៉ាងណាមិញ គេនៅតែបង្ហាញខ្លួនលេងឱ្យក្រុមជម្រើសជាតិកម្ពុជាសម្រាប់ព្រឹត្តិការណ៍ធំៗ បើទោះជាគេត្រូវជាប់ភារៈចេញទៅលេងនៅក្នុងប្រទេសជប៉ុន ជាលក្ខណៈខ្ចីជើងរហូតដល់ទៅមួយឆ្នាំក្ដី ។ ក្នុងនោះភាគីខាងជប៉ុន ក៏បានប្រកាសថា កម្ពុជានឹងមិនមានតែកីឡាកររូបនេះម្នាក់ ដើម្បីចេញទៅលេងនៅក្នុងប្រទេសជប៉ុននោះដែរ ដោយខាងជប៉ុន នឹងអាចសម្លឹងមើលកីឡាករល្អៗផ្សេងទៀត ដើម្បីផ្ដល់ឱកាស និងដើម្បីឱ្យជប៉ុនប្រមូលបានកីឡាករដែលមានជើងល្អនៅក្នុងតំបន់អាស៊ី ទៅលេងនៅក្លិបរបស់ខ្លួន ៕
ចែករំលែកព័តមាននេះ