ខេត្តកំពង់ស្ពឺ ៖ ក្រោយចេញផ្សាយព័ត៌មានដែលមានចំណងជើងថា ដូនចាស់មានជំងឺប្រចាំការ លើកម្រាមដប់សុំក្តីមេត្តាមុនពេលស្លាប់ រួចមកមានសប្បុរសជនជាច្រើនបានផ្ញើថវិកាតាមរយៈភ្នាក់ងារ«កោះសន្តិភាព»ជូនដល់លោកយាយជាបន្តបន្ទាប់ ដើម្បីលោកយាយទុកដោះស្រាយបញ្ហាចំពោះមុខ និងយកទៅព្យាបាលជំងឺ ។
សប្បុរសជនដែលបានផ្តល់អំណោយដល់ដូនចាស់ដែលមានជំងឺប្រចាំកាយរួមមាន ៖ ព្រះសុមេធវង្ស បណ្ឌិតសុខ ប៊ុនធឿន ព្រះចៅអធិការវត្តនន្ទមុនី ជាព្រះវិន័យធរ អនុគណខណ្ឌមានជ័យ និងជាប្រធាននាយកដ្ឋានពុទ្ឋិកឧត្តមសិក្សា នៃក្រសួងធម្មការ និងសាសនា ឧបត្ថម្ភ អង្ករ៥០គីឡូក្រាម, មី២កេស, ទឹកក្រូច២កេស ព្រមទាំងបច្ច័យ១៥ម៉ឺនរៀល, លោក វ៉ី សំណាង អភិបាលខេត្តកំពង់ស្ពឺ ឧបត្ថម្ភថវិកា២០ម៉ឺនរៀល, លោកឧត្តមសេនីយ៍ត្រី ជូ សារុន មេបញ្ជាការកងរាជអាវុធហត្ថខេត្ត ឧបត្ថម្ភថវិកា២០ម៉ឺនរៀល, លោក កង វណ្ណារ៉ូ នាយករដ្ឋបាលសាលាខេត្តឧបត្ថម្ភថវិកា ១០ម៉ឺនរៀល, លោក ទ្រី វណ្ឌី ប្រធានរតនាគារខេត្ត ឧបត្ថម្ភថវិកា១០ម៉ឺនរៀល, លោក ចឹក បូរិន្ទប្រធានមន្ទីរការងារខេត្ត ឧបត្ថម្ភថវិកា ១០ម៉ឺនរៀល, លោក ឃុន ស៊ីម៉ន មន្ត្រីកាំកុងត្រូល ឧបត្ថម្ភថវិកា ១០ម៉ឺនរៀល, លោក អ៊ុក វិច្ឆិកា រស់នៅត្រែងត្រយឹង ឧបត្ថម្ភថវិកា ១០ម៉ឺនរៀល, លោកចៅក្រម ម៉ែន វណ្ណៈ អនុប្រធានសាលាដំបូងខេត្តកំពង់ស្ពឺ ឧបត្ថម្ភថវិកា ១០ម៉ឺនរៀល, លោក តូង ពុទ្ឋារ៉ា ចៅក្រមស៊ើបសួរសាលាដំបូងខេត្តកំពង់ស្ពឺ ឧបត្ថម្ភថវិកា៨ម៉ឺនរៀល, លោកព្រះរាជអាជ្ញារង សឿ ឡងឌី ឧបត្ថម្ភថវិកា ៨ម៉ឺនរៀល, លោកស៊ឹម រតនៈ រស់នៅក្រុងច្បារមន ឧបត្ថម្ភថវិកា ១០ម៉ឺនរៀល ។ ដោយឡែកលោកស្រី ហុង ពៅពិសី ភរិយាលោក វង្ស សន បានឧបត្ថម្ភដល់លោកយាយមានដូចជាមីខ្លាឃ្មុំ២កេស, ទឹកត្រី២យួរ, ទឹកស៊ីអ៊ីវ២យួរ, ទឹកដោះគោឆៅ១យួរ, ស្ករស១គីឡូក្រាម, ប៊ីចេង១គីឡូក្រាម, ខ្ទឹម១គីឡូក្រាម, ម្រេចកន្លះគីឡូក្រាម, សាច់គោ និងសាច់ជ្រូក២គីឡូក្រាម, ត្រីប្រឡាក់១គីឡូក្រាម, ត្រីរស់១គីឡូក្រាម និងថវិកា ១០ម៉ឺនរៀល, លោកស្រី វេត ហស្សសីដា និងស្វាមី នៅភ្នំពេញឩបត្ថម្ភថ្នាំពេទ្យមួយចំនួន និងថវិកា២០ដុល្លារ, យុវតី ត្រា សុខេធីតា សិស្សសាលាសុវណ្ណភូមិ ថវិកា៤ម៉ឺនរៀល ។
នាឱកាសទទួលអំណោយពីសប្បុរសជន លោកយាយក៏បានសំដែងនូវការដឹងគុណដល់អស់លោកសប្បុរសជនទាំងអស់ដែលបានបរិច្ចាគថវិកាជូនដល់លោកយាយដើម្បីយកមកព្យាបាលជំងឺ ។ លោកយាយក៏បានបួងសួងដល់វត្ថុស័ក្តិសិទ្ធិក្នុងលោក សូមតាមជួយថែរក្សាក្រុមគ្រួសារអស់លោកសប្បុរសទាំងអស់ និងសូមជួបប្រទះតែសេចក្តីសុខ រកស៊ីមានបាន ត្រជាក់ត្រជុំ កុំឲ្យមានសត្រូវមកយាយីបៀតបៀនបានឡើយ ។
សូមបញ្ជាក់ថា លោកយាយ ខឹម សុខ គឺជាដូនចាស់ដែលទីទ័លក្រ ហើយមានជំងឺប្រចាំ សព្វថ្ងៃនេះគាត់រស់បានគឺដោយសារកូនស្រីមេម៉ាយដើរជីកក្តាមយកមកលក់ចិញ្ចឹម ព្រមទាំងបានអ្នកជិតខាងហុចបាយសម្លព្រឹកល្ងាចទើបអាចមានជីវិតដល់សព្វថ្ងៃ ៕
ចែករំលែកព័តមាននេះ