ក្លិប Sarawak United របស់កីឡាករកុក បូរីស ជំពាក់ប្រាក់ឈ្នួលកីឡាករ៤ខែ ធ្វើឱ្យកីឡាករខ្លះគ្មានលុយបង់ផ្ទះ
- ភ្នំពេញ
រាជធានីភ្នំពេញ ៖ នាពេលថ្មីៗនេះ មានសេចក្ដីរាយការណ៍មកថា ក្លិប Sarawak United ស្ថិត
រាជធានីភ្នំពេញ ៖ នាពេលថ្មីៗនេះ មានសេចក្ដីរាយការណ៍មកថា ក្លិប Sarawak United ស្ថិត
ក្នុងលីគកំពូលម៉ាឡេស៊ី កំពុងជួបបញ្ហាវិបត្តិហិរញ្ញវត្ថុដោយជំពាក់ប្រាក់ឈ្នួលកីឡាករដល់ទៅ៤ខែ
មកហើយ ធ្វើឱ្យកីឡាករខ្លះគ្មានលុយបង់ការចំណាយផ្សេងៗជាពិសេសបង់ថ្លៃផ្ទះជួល ក្នុងនោះក៏មានខ្សែការពារជម្រើសជាតិកម្ពុជារបស់ក្លិបភ្នំពេញក្រោន កុក បូរីស ក៏ទទួលរងគ្រោះរឿងក្លិបមិនបើកប្រាក់ឈ្នួលឱ្យផងដែរ ។ ជាក់ស្ដែង កាលខែកក្កដា កន្លងទៅ FIFA បានពិន័យក្លិបមួយនេះមិនឲ្យដោះដូរកីឡាករពេលទីផ្សារដោះដូរបើកឱ្យដំណើរការទៀតផង។
ជុំវិញសេចក្ដីរាយការណ៍ខាងលើនេះ កាលពីល្ងាចថ្ងៃទី២៤ ខែសីហា ឆ្នាំ២០២២ ខ្សែការពារ កុក បូរីស បានបង្ហោះនៅលើគណនីហ្វេសប៊ុករបស់ខ្លួនថា៖«ខ្ញុំសុំទោសដែលខ្ញុំមិនបានផ្តល់ដំណឹងណាមួយដល់គ្រប់គ្នាអំពីខ្ញុំ! វាជារឿងផ្លូវការដែលក្លិប Sarawak មិនបានបើកប្រាក់ខែដល់កីឡាករ និងបុគ្គលិកទាំងអស់រយៈពេល៤ខែមកហើយ។ ទោះជាយ៉ាងណា កីឡាករនៅតែរក្សាអាកប្បកិរិយាប្រកបដោយវិជ្ជាជីវ:របស់ពួកគេក្នុងការប្រកួតទាំងអស់» ។
កុក បូរីស បន្តទៀតថា៖«សម្រាប់គ្រប់គ្នាគឺពិបាកណាស់ គ្មានលុយបង់ផ្ទះ, ថ្លៃអាហារ, បារម្ភអំពីគ្រួសារ។ គ្រប់គ្នារងទុក្ខច្រើន ប៉ុន្តែពួកយើងមិនដែលនិយាយតាមបណ្តាញសង្គមឡើយ ព្រោះយើងស្រឡាញ់ Sarawak United និងអ្នកគាំទ្រទាំងអស់។ យើងមិនបន្ទោសក្លិបឡើយ»។
គួរឱ្យដឹងផងដែរថា កុក បូរីស បានចាកចេញពីក្លិបបាល់ទាត់ភ្នំពេញក្រោន ទៅកាន់ក្លិប Sarawak United FC សមាជិកលីគកំពូលនៃប្រទេសម៉ាឡេស៊ី Malaysia Super League ក្នុងលក្ខខណ្ឌខ្ចីជើងចំនួន១រដូវកាល ខណៈរូបគេជាកីឡាករកម្ពុជាដំបូងគេដែលចេញទៅប្រកបអាជីពនៅក្រៅប្រទេសក្នុងឆ្នាំ២០២២ នេះ ៕
ចែករំលែកព័តមាននេះ