រាជធានីភ្នំពេញ ៖ នៅរសៀលថ្ងៃសៅរ៍ ទី២៨ មករា ខានស្អែកនេះ កម្មវិធីប្រកួតប្រដាល់អន្តរជាតិរបស់ខារ៉ាបាវ វគ្គសន្សំពិន្ទុឈានទៅដណ្ដើមខ្សែក្រវាត់រដូវកាលទី២ រវាងកីឡាករកម្ពុជា និងបរទេសកាន់តែឡើងកម្ដៅយ៉ាងក្ដៅគគុក ។ សមាសភាពកីឡាករកម្ពុជាដែលឡើងប្រកួតដណ្ដើមយក៣ពិន្ទុនៅក្នុងសប្ដាហ៍នេះ មានកីឡាករ អ៊ុំ ចំរើន និងកីឡាករ ឡុង សុវណ្ណឌឿន ប្រកួតជាមួយកីឡាករថៃ និងឡាវ ដែលសុទ្ធតែជាជើងខ្លាំងដូចគ្នានៅលើសង្វៀន ។
ព្រឹត្តិការណ៍ប្រដាល់អន្តរជាតិដណ្ដើមខ្សែក្រវាត់របស់ភេសជ្ជៈខារ៉ាបាវវគ្គ២ នេះ ត្រូវគេមើលឃើញថា មានការគាំទ្រដាច់ឆ្ងាយតែម្ដង បើធៀបនឹងការប្រកួតអន្តរជាតិកាលពីវគ្គ១ ដោយសារតែសមាសភាពកីឡាករកម្ពុជា និងបរទេសសុទ្ធតែល្អ ហើយម្នាក់ៗបញ្ចេញថ្វីដៃមើលទៅគួរឱ្យទាក់ទាញរៀងខ្លួន ។
កីឡាករកម្ពុជា២រូប រួមមានជើងខ្លាំង អ៊ុំ ចំរើន និង ឡុង សុវណ្ណឌឿន នឹងក្លាយជាគូប្រកួតស៊ីសាច់ហុតឈាមជាមួយកីឡាករឡាវ និងថៃ។
អ្នករៀបចំការប្រកួតបានអះអាងថា កីឡាករទាំង៤រូប បានចាប់ឆ្នោតប៉ះគ្នាជាថ្មីសម្រាប់ព្រឹត្តិការណ៍អន្តរជាតិខារ៉ាបាវ ដោយអ្នកឈ្នះនឹងទទួលបាន៣ពិន្ទុ ហើយអ្នកចាញ់ទទួលបាន១ពិន្ទុ ។ ការប្រកួតរវាង ឡុង សុវណ្ណឌឿន និងគូប្រកួត អាចនឹងក្លាយជាការកាត់ក្ដី ដើម្បីកំណត់ថា កីឡាករខ្មែររូបនេះអាចបន្តការប្រកួត ឬធ្លាក់ហាលអាវ ។
លោកថា កីឡាករកម្ពុជាត្រូវបានអះអាងថា សម្ងំហ្វឹកហាត់មិនខុសគ្នានោះទេ ដោយសារតែចង់គ្រងតំណែងជាម្ចាស់ខ្សែក្រវាត់អន្តរជាតិខារ៉ាបាវ និងទទួលបានប្រាក់លាន អមដោយកិត្តិយសមុខមាត់ ។ ទោះបីយ៉ាងណា គេមិនទាន់ដឹងថា កីឡាករណាមួយនឹងមានលទ្ធភាពយកបាន៣ពិន្ទុនៅសប្ដាហ៍នេះទេ ដោយសារតែភាគីទាំងសងខាងសុទ្ធតែបានត្រៀមទុកពីចម្ងាយ ។
លោក ញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍បានប្រាប់ថា ក្នុងចំណោមកីឡាករកម្ពុជា ជើងខ្លាំង២រូបខាងលើ នឹងបើកឆាកប្រយុទ្ធសម្រាប់សប្ដាហ៍ទី៤ នៅក្នុងព្រឹត្តិការណ៍ដណ្ដើមខ្សែក្រវាត់ជើងឯកខារ៉ាបាវ ។ កីឡាករ អ៊ុំ ចំរើន មកពីក្លិបតាឡីដំរីមានរិទ្ធិ ប៉ះប្រកួតជាមួយកីឡាករឡាវឈ្មោះ ថាវ ពួឡាក់វង់ ក្នុងនាមជាគូបើកឆាកអន្តរជាតិដណ្ដើមពិន្ទុនៅក្នុងព្រឹត្តិការណ៍ ដោយជំនួបរវាងពួកគេ គឺបានកើតឡើងដោយសារតែការចាប់ឆ្នោត និងការរៀបចំរូបមន្តប្រកួតដែលចាត់ចែងឡើងដោយក្រុមគណៈកម្មការបច្ចេកទេស ។ លោកថា កីឡាករ អ៊ុំ ចំរើន ចាត់ទុកថា ជាជើងខ្លាំងម្នាក់នៅលើសង្វៀនប្រដាល់អន្តរជាតិនាពេលកន្លងមក បើទោះជា២ប្រកួតរបស់គេមិនទាន់បានឈ្នះមួយលើកនៅឡើយក្ដី ទើបលោកជឿថា ការប្រកួតរបស់គូនេះនឹងកន្ត្រាក់អារម្មណ៍មិនធម្មតា ។
លោកថា កីឡាករកម្ពុជា៤រូប និងបរទេស៤រូបសុទ្ធតែខ្លាំង និងមានសមត្ថភាព ហើយលោកក៏មិនទាន់ច្បាស់ភាគីណាមួយនឹងកាន់ពានសម្រាប់រដូវកាលនេះដែរ ក្នុងពេលមានការប្រកាសថា ស្ថានីយរបស់លោកមិនកាន់ជើងថាទាល់តែខ្មែរ ទើបឱ្យឈ្នះខុសពីបច្ចេកទេសប្រកួតជាក់ស្ដែងដែលកីឡាករម្នាក់ៗធ្វើបាននោះទេ ។ លោកជឿជាក់ថា កីឡាករ អ៊ុំ ចំរើន នឹងមិនភ្លាត់ឱ្យចាញ់សម្រាប់ការប្រកួតនេះទេ ទោះបីគេឈ្នះក៏មិនបានឡើងវគ្គពាក់កណ្ដាលផ្ដាច់ព្រ័ត្រ ។ លោកថា កីឡាកររូបនេះ ត្រូវការឈ្នះ ដើម្បីលុបលាងភាពអាម៉ាស់ ព្រោះបើចាញ់លើកនេះទៀត ពិតជាប៉ះពាល់ដល់ប្រជាប្រិយភាពមិនខាន ។
លោករំពឹងថា ការប្រកួតបើកឆាករបស់គូអន្តរជាតិនេះ នឹងទាក់ទាញចំណាប់អារម្មណ៍ខ្លាំងក្លា ដោយសារកីឡាករឡាវ គឺត្រូវការឈ្នះ ដើម្បីឈានឡើងទៅវគ្គបន្ត ហើយកីឡាករកម្ពុជា ក៏ត្រូវការសង្គ្រោះប្រជាប្រិយភាព ។ កីឡាករឡាវ ថាវ ពួឡាក់វង់ ធ្លាប់ប្រកួត១០៣លើក ឈ្នះ៨២លើក ចាញ់១៩លើក និងស្មើ២លើក ក្នុងពេលកីឡាករកម្ពុជាឆ្លងកាត់ការប្រកួតរហូតដល់១០២លើក ឈ្នះ៧០លើក និងចាញ់៣២លើក ។
សម្រាប់កីឡាករ ឡុង សុវណ្ណឌឿន លោកញាណ សុធី បញ្ជាក់ថា គេកាន់តែបញ្ចេញថ្វីដៃមិនធម្មតាក្នុងជំនួបជាមួយកីឡាករថៃឈ្មោះ កេង កាត់ ក្នុងព្រឹត្តិការណ៍អន្តរជាតិខារ៉ាបាវនេះ ។ លោកថា កាលពីលើកទី១ និងលើកទី២ កីឡាករ ឡុង សុវណ្ណឌឿន ជាអ្នកឈ្នះបាន៣ពិន្ទុជាប់រហូត ទើបលោករំពឹងថា ការប្រកួតថ្ងៃខានស្អែកក៏នឹងមានលទ្ធផលដដែល ។ លោកថា កីឡាករថៃធ្លាប់ប្រកួត៩២លើក ឈ្នះ៨១លើក ចាញ់១០លើក និងស្មើ១លើក ក្នុងពេលកីឡាករកម្ពុជាធ្លាប់ប្រកួតបានដល់៩៧លើក ឈ្នះ៨៣លើក ចាញ់៩លើក និងស្មើ៥លើក ទើបលោករំពឹងថា បទពិសោធន៍ល្អជាងរបស់កីឡាករកម្ពុជានឹងជួយឱ្យគេនៅតែមានពិន្ទុនាំមុខ ៕
ចែករំលែកព័តមាននេះ