រាជធានីភ្នំពេញ ៖ ក្រោយពីបញ្ចប់ពិធីមង្គលការកាលពីថ្ងៃទី២២ មករា គេកត់សម្គាល់ថា ចំណងស្នេហ៍របស់កីឡាកររូបនេះមានការខ្ចរខ្ចាយព័ត៌មានបានឆ្ងាយគួរសម ដោយត្រូវបណ្ដាញផ្សព្វផ្សាយនៅក្រៅប្រទេសមួយចំនួនចុះផ្សាយផងដែរ ។ អ្វីដែលគេចាប់អារម្មណ៍ គឺលោកបានបញ្ជាក់ថា មិនទទួលថតផ្សាយគ្រឿងស្រវឹង និងឈប់ថតកុនទៀតហើយ ដើម្បីកុំឱ្យបែកអារម្មណ៍ ហើយធ្វើឱ្យគុណភាពកីឡាបាល់ទាត់ធ្លាក់ចុះ ។
លោក ប្រាក់ មុន្នីឧត្តម និយាយថា ក្នុងរយៈពេលចុងក្រោយមានខាងផលិតករទាក់ទងឱ្យលោកថតកុនយ៉ាងច្រើន បន្ទាប់ពីលោកថតបានមួយរឿងកាលពីឆ្នាំ២០១៥ ហើយទទួលជោគជ័យ ។ ខ្សែរឿងដែលលោកសម្ដែងនោះជាលើកទី១ ប៉ុន្តែក៏ជាប្រវត្តិសាស្ត្រដែលជួយឱ្យលោកទទួលបានការគាំទ្រយ៉ាងពេញទំហឹងនៅក្នុងវិស័យសម្ដែងមិនធ្លាប់មានផងដែរ តែលោកបានបញ្ជាក់ថា គម្រោងថតជាថ្មីនៅតែមិនមាន ។
លោកថា ការថតរឿងក៏ជាចំណូលចិត្តរបស់លោកដែរ ប៉ុន្តែមកពីលោកមិនចង់ខាតពេលត្រៀមខ្លួនក្នុងការសម្ដែងរឿង និងមិនចង់ប្រឡាក់ប្រឡូសនាំឱ្យមានការរិះគន់ ទើបលោកសម្រេចចិត្តមិនទទួលយក ។ លោកនិយាយថា ៖ «ការថតកុនខ្ញុំស្រឡាញ់ដដែលតើ ប៉ុន្តែខ្ញុំចេះតែខ្លាចពេលយើងសម្ដែងអត់ដល់ប្លង់អីទៅ គេរិះគន់ ទើបសម្រេចចិត្តអត់ទទួល និយាយរួមឱ្យថ្លៃប៉ុន្មានក៏អត់ទទួលដែរ» ។ លោកថា ការសម្ដែង គឺជាចលករដែលជួយលោកឱ្យមានគេស្គាល់ច្រើន ប៉ុន្តែការសម្ដែងក៏ធ្វើឱ្យលោកខាតពេលហ្វឹកហាត់ប៉ះពាល់ការប្រកួតផងដែរ ជាពិសេសបន្ទាប់ពីលោកទទួលសម្ដែងភាពយន្តខ្នាតធំ កាលពីឆ្នាំ២០១៥ ហើយមានការប៉ះពាល់ការប្រកួតខ្លះៗ ។ លោកថា ខ្សែរឿងនោះមានចំណងជើងថា «មេកប់ស៊េរី» ដោយទទួលបានការគាំទ្រតាំងពីពេលដាក់បញ្ចាំងរហូតដល់ក្រោយពេលទម្លាក់ផ្លាក ដោយខាងផលិតករបានទទូចឱ្យលោកជួយសម្ដែង១រឿង២រឿងបន្ថែមនោះផង តែលោកសម្រេចចិត្តមិនទទួល ។ លោកថា ៖ «ផលិតករគាត់ហៅលេងច្រើនតាំងពីថតមួយរឿងហ្នឹង តែខ្ញុំឈប់លេងហើយ អត់ចង់ឱ្យគេថា យើងកីឡាករទៅថតកុនអីទៀតទេ!» ។ ជាមួយនឹងការប្រកាន់ជំហរមិនទទួលថតកុនដូចមុន លោកក៏ប្រកាសថា មិនទទួលថតស្ពតណាមួយដែលមានទម្រង់ជាការផ្សព្វផ្សាយស្រា ឬគ្រឿងស្រវឹងនោះដែរ »។
លោក ប្រាក់ មុន្នីឧត្តម បញ្ជាក់ថា បើទោះជាលោកមិនបានរួមចំណែកជួយសង្គម តែលោកមិនធ្វើសកម្មភាពណាមួយដែលបំផុសឱ្យយុវវ័យ និងមហាជនជាអ្នកគាំទ្រចាប់អារម្មណ៍គ្រឿងស្រវឹងនៅគ្រប់វត្តមានរបស់លោកនោះដែរ ។ លោកថា កីឡាករដែលមានអ្នកគាំទ្រច្រើន និងតារាល្បីឈ្មោះ ការផ្សព្វផ្សាយបែបនេះមានឥទ្ធិពលខ្លាំងណាស់ទើបលោកប្រឆាំងដាច់ខាតមិនពាក់ព័ន្ធទេ ដើម្បីរួមចំណែកជួយដល់សង្គមដែលត្រូវការការកាត់បន្ថយគ្រោះថ្នាក់ចរាចរណ៍ ។ លោកប្រកាសថា មិនថាស្ពត មិនថាសកម្មភាពឱ្យលោកថតលេងនៅក្រោយផ្លាកយីហោគ្រឿងស្រវឹង គឺទោះជាត្រូវបានប្រាក់ប៉ុន្មានក៏លោកមិនថតនោះដែរ ដើម្បីគេចចេញពីការពង្វក់ដល់អ្នកគាំទ្រឱ្យចាប់អារម្មណ៍គ្រឿងស្រវឹងនោះ ។
អីុចឹងហើយទើបគេកត់សម្គាល់ថា សូម្បីតែពេលចូលរួមក្នុងកម្មវិធីផ្សេងលោកកម្រពិសាគ្រឿងស្រវឹង ហើយបើអ្នកសុំថតលើកកែវស្រា ឬដបស្រាមកថតជាមួយលោក គឺលោកសំណូមពរឱ្យទម្លាក់ចេញ ។ នេះជាជំហរកម្រមួយរបស់បុគ្គលល្បីដែលខុសពីតារាមួយចំនួនដែលប្រើកិត្តិស័ព្ទល្បីល្បាញរបស់ខ្លួនទទួលថតស្ពតស្រាបៀរក្នុងតម្លៃខ្លួនខ្ពស់ ដោយមិនខ្វល់ថា បានរួមចំណែកបំផុសឱ្យប្រើប្រាស់គ្រឿងស្រវឹងនៅក្នុងសង្គម ។ លោកថា ខ្លួនមិនទទួលថតកុន និងថតស្ពតគ្រឿងស្រវឹង គឺជាការយល់ឃើញរបស់ខ្លួន តែសម្រាប់បុគ្គលដែលគេថតបានលោកថា មិនមែនជារឿងដែលត្រូវរិះគន់នោះទេ ដោយសារតែនោះគឺជាការងាររបស់ពួកគាត់ ហើយពេលខ្លះដ្បិតថា តារា ឬបុគ្គលដែលមានប្រជាប្រិយភាពទទួលថតស្ពតស្រាបៀរអីុចឹងមែន តែចិត្តពួកគាត់ក៏មិនសូវគាំទ្រដែរ ។
ប្រាក់ មុន្នីឧត្តម បញ្ជាក់ថា ក្រោយបញ្ចប់ការប្រកួតលក់សំបុត្រយកលុយជួយមន្ទីរពេទ្យគន្ធបុប្ផានៅល្ងាចថ្ងៃទី២៦ មករា លោកមានគម្រោងនាំភរិយាថ្មោងថ្មីរបស់ខ្លួនទៅកម្សាន្តនៅប្រទេសថៃ ប៉ុន្តែលទ្ធផលចុងក្រោយប្រហែលមិនបានទៅច្រើនជាង ដោយសារតែចំឱកាសចូលឆ្នាំចិនដែលត្រូវជួបជុំសាច់ញាតិផង និងរវល់ហ្វឹកហាត់ត្រៀមប្រកួតផង ។ លោកថា គម្រោងចេញក្រេបទឹកឃ្មុំនៅក្រៅប្រទេសអាចនឹងត្រូវរំសាយ ប៉ុន្តែមិនមានន័យថា មិនមាននោះទេ គឺលោកនឹងនៅតែរកឱកាសចេញកម្សាន្តជាលក្ខណៈគូស្នេហ៍នៅពេលណាមួយ បន្ទាប់ពីការប្រកួតបានរយាល ។ លោកក៏បានឆ្លើយតបនឹងការលេចឮដែលថា លោក និងភរិយាទទួលបានចំណងដៃកប់ក្ដោងថា ជារឿងមិនពិតនោះដែរ ។ លោកថា មង្គលការខ្លួនបានចំណាយអស់ជាង៤ម៉ឺនដុល្លារ ហើយលទ្ធផលចំណងដៃដែលទទួលបាន គឺមិនគ្រប់សម្រាប់ចំណាយនោះទេ មិនដូចព័ត៌មានដែលថា លោកសល់ពីការចំណាយច្រើនម៉ឺននោះឡើយ ។ លោកថា មង្គលការនោះ បើសិនទូទាត់ គឺខាតតិចតួច តែលោកមិនចាត់ទុកថា នោះជារឿងធំដុំទេ សំខាន់គឺលោកសប្បាយចិត្តដែលមានបងប្អូនជាភ្ញៀវកិត្តិយសចូលរួមមង្គលការលោកច្រើន ៕
ចែករំលែកព័តមាននេះ