ប្រមុខ CAMSOC នឹងផ្ដល់កងទ័ពជាង៥ពាន់នាក់សម្រាប់ពិធីបើក-បិទស៊ីហ្គេម និងអាស៊ានប៉ារ៉ាហ្គេមឆ្នាំក្រោយ
- ភ្នំពេញ
រាជធានីភ្នំពេញ ៖ សម្ដេចពិជ័យសេនា ទៀ បាញ ប្រធានគណៈកម្មាធិការជាតិរៀបចំការប្រកួតកីឡា
រាជធានីភ្នំពេញ ៖ សម្ដេចពិជ័យសេនា ទៀ បាញ ប្រធានគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ (CAMSOC) បានសម្រេចដ៏ខ្ពង់ខ្ពស់ក្នុងការអនុញ្ញាតឲ្យប្រមូលកម្លាំងកងទ័ពចំនួន៥.២៧០នាក់សម្រាប់ជួយដល់កម្មវិធីផ្សេងៗរបស់គណៈកម្មាធិការជាតិCAMSOC ពិសេសចូលរួមសម្ដែងអបអរពិធីបើក-បិទព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ។
នេះជាការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC ក្នុងកិច្ចប្រជុំពិភាក្សាការងាររបស់គណៈកម្មការពិធីបើក-បិទ កាលពីព្រឹកថ្ងៃទី១៩ ខែសីហា ឆ្នាំ២០២២ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) ដោយពិភាក្សាលើរបៀបវារៈសំខាន់ៗចំនួន៣។
របៀបវារៈទី១-គឺពិភាក្សាលម្អិតស្ដីពីតម្រូវការកម្លាំងហ្វឹកហាត់ និងសម្ដែង របៀបវារៈទី២-គឺការត្រៀមរៀបចំផែនការហ្វឹកហាត់សម្ដែងនិងអ្នកទទួលខុសត្រូវ និងរបៀបវារៈទី៣ គឺការត្រៀមជ្រើសរើសទីតាំងហ្វឹកហាត់ និងសម្ដែងសាកល្បង។
ក្រោយទទួលបានការសម្រេចដ៏ខ្ពង់ខ្ពស់របស់សម្ដេចពិជ័យសេនាប្រធាន និងការអនុវត្តការងារជាប្រចាំរបស់ឯកឧត្តមបណ្ឌិតថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍ CAMSOC បានណែនាំឲ្យឯកឧត្តម វ៉ាត់ ចំរើន ជួបប្រជុំជាមួយភាគីពាក់ព័ន្ធដើម្បីពិភាក្សាពីរបៀបវារៈខាងលើដោយមានភាគីសំខាន់ៗ២ផ្នែកចូលរួមគឺភាគីគ្រប់គ្រងកម្លាំង ដឹកនាំដោយឯកឧត្តមឧត្តមសេនីយ៍ឯក ខៀវ ឆេន នាយកខុទ្ទកាល័យសម្តេចពិជ័យសេនា ទៀ បាញ់ និងជាអគ្គលេខាធិការរង CAMSOC និងភាគីប្រើប្រាស់កម្លាំងដឹកនាំដោយឯកឧត្តម ហ៊ី វីរៈ និងឯកឧត្តម ហាប់ ទូច រដ្ឋលេខាធិការក្រសួងវប្បធម៌ និងវិចិត្រសិល្បៈ។
ឯកឧត្តមវ៉ាត់ ចំរើន បន្ដថា ភាគីទាំងពីរបានធ្វើការសម្របសម្រួលគ្នានិងបញ្ជាក់ប្រាប់គ្នាទៅវិញទៅមកនូវចំនួនកម្លាំងដែលត្រូវការ ។ កម្លាំងទាំងអស់នេះ(៥.២៧០នាក់)ត្រូវបែងចែកទៅតាមផែននីមួយៗ ដែលត្រូវការបណ្ដុះបណ្ដាល និងអនុវត្តការហ្វឹកហ្វឺនផ្នែកសម្ដែង ផ្នែកទស្សនីយភាពផ្នែកជួយដល់កម្មវិធីទាំងមូលជាបណ្ដើរៗហើយនៅឡើយតែធ្វើការបន្ស៊ីគ្នាជាមួយការអនុវត្តផ្ទាល់តែប៉ុណ្ណោះ។
ក្រៅពីកម្លាំងយោធិនដែលត្រូវបានចាត់ទុកជាកម្លាំងពិតCAMSOCក៏ត្រូវការកម្លាំងជំនាញ និងស្ម័គ្រចិត្តជាច្រើនទៀត ដើម្បីផ្គុំជាកម្លាំងពិសេសមួយ ដូចជាកម្លាំងជំនាញសិល្បករ-សិល្បការិនី របស់ក្រសួងវប្បធម៌ និងវិចិត្រសិល្បៈ។
កម្លាំងសហព័ន្ធកីឡាគុនល្បុក្កតោកម្ពុជា និងកម្លាំងផ្សេងៗទៀតដើម្បីធានាបាននូវការសម្ដែងមួយដ៏អស្ចារ្យនិងទទួលបានជោគជ័យក្នុងព្រឹត្តិការណ៍ជាប្រវត្តិសាស្ដ្រដែលកម្ពុជាទន្ទឹងរង់ចាំអស់រយៈពេល ៦៤ឆ្នាំនេះ៕
ចែករំលែកព័តមាននេះ