បុរសម្នាក់ត្រូវបានកម្លាំងនគរបាលហៅមកណែនាំ និងធ្វើកិច្ចសន្យា រួចវាស់កំពស់ ក្រោយពីបុរសរូបនេះបានចូលខមមិនថា «ចាប់ម៉េចអស់ បើអ្នកលក់
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា បុរសម្នាក់ត្រូវបានកម្លាំងនគរបាលហៅមកណែនាំ និងធ្វើកិច្ចសន្យា រួចវាស់កំពស់ ក្រោយពីបុរសរូបនេះបានចូលខមមិនថា «ចាប់ម៉េចអស់ បើអ្នកលក់គ្រឿងញៀ.នកូនចៅអ្នកចាប់ហ្នឹងឯង» ហេតុការណ៍ចាប់ខ្លួននេះបានកើតឡើងកាលពីថ្ងៃទី២១ ខែសីហា ឆ្នាំ២០២២ នៅស្នងការដ្ឋាននគរបាលខេត្តបន្ទាយមានជ័យ។
លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានប្រាប់ថា បុរសដែលត្រូវបានហៅមកណែនាំធ្វើកិច្ចសន្យាខាងលើនេះមានឈ្មោះ សៀង ធួន ហៅធន់ អាយុ៣៧ឆ្នាំ រស់នៅភូមិ-ឃុំឫស្សីក្រោក ស្រុកមង្គលបូរី។
លោកបានបញ្ជាក់ថា កាលពីថ្ងៃទី១៩ ខែសីហា ឆ្នាំ២០២២ កម្លាំងនៃស្នងការដ្ឋានគរបាលខេត្តបន្ទាយមានជ័យ បានបង្ក្រាបឃាត់ខ្លួនជនសង្ស័យប្រុស-ស្រីចំនួន៥នាក់ និងអាវុធខ្លី១ដើម រួមទាំងវត្ថុតាងគ្រឿងញៀ.ន ដែលបានចោទប្រកាន់ពីបទជួញ និងប្រើប្រាស់គ្រឿងញៀ.ន ហើយត្រូវបានកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមច្បាប់។
លោកឧត្តមសេនីយ៍ទោ សិទ្ធិ ឡោះ បានបញ្ជាក់ថា ក្រោយពីឃាត់ខ្លួនជនសង្ស័យប្រុសស្រីទាំង៥នាក់ពីបទជួញដូរ និងចែកចាយប្រើប្រាស់គ្រឿងញៀ.ន ហើយក៏ត្រូវបានអ្នកសារព័ត៌មាន និងបណ្តាញសង្គមបានចេញផ្សាយពីស្នាដៃកម្លាំងជំនាញដែលបង្ក្រាបបទល្មើសគ្រឿងញៀ.ន ស្រាប់តែមានអាក់ខោនហ្វេសប៊ុកឈ្មោះ Tung Haiheng បានចូលទៅខមមិនថា «ចាប់អ្នកលក់អោយអស់មើល» ហើយពេលនោះក៏មានអាក់ខោនឈ្មោះ សៀង ធួន ហៅធន់ បានចូលទៅខមមិនបន្តថា «ចាប់ម៉េចអស់ បើអ្នកលក់កូនចៅអ្នកចាប់ហ្នឹងឯង»។
ក្រោយពេលខមមិនប៉ះពាល់កិត្តិយសកងកម្លាំង ដែលខិតខំធ្វើការបង្ក្រាបបទល្មើស ដើម្បីបម្រើសង្គម និងប្រជាពលរដ្ឋ ទើបកម្លាំងជំនាញស្រាវជ្រាវ និងកោះហៅមកធ្វើកិច្ចសន្យាណែនាំអោយបញ្ឈប់ និងសុំទោសជាសាធារណៈ ហើយក៏អោយត្រឡប់ទៅផ្ទះវិញផងដែរ៕
ចែករំលែកព័តមាននេះ