រាជធានីភ្នំពេញ ៖ នារី២នាក់ជាមុខសញ្ញាជួញដូរគ្រឿងញៀនយ៉ាងសកម្មនៅម្តុំផ្លូវរថភ្លើង ត្រូវបានកម្លាំងល្បាតរបស់នគរបាលប៉ុស្តិ៍ស្រះចកចាប់ឃាត់ខ្លួន ពេលដែលពួកគេកំពុងតែនាំគ្នាធ្វើសកម្មភាពថ្លឹង និងច្រករំលែកគ្រឿងញៀនជាកញ្ចប់ ដើម្បីធ្វើការចែកចាយនៅលើទូរថភ្លើងចាស់ៗមួយកន្លែង ដោយធ្វើការដកហូតបានគ្រឿងញៀនចំនួន២កញ្ចប់ធំ រួមទាំងវត្ថុតាងមួយចំនួនផងដែរ។
ប្រតិបត្តិការនេះ ធ្វើឡើងកាលពីវេលាម៉ោង០៥ និង៣០នាទីល្ងាចថ្ងៃទី២៤ មករា នៅលើទូរថភ្លើងមួយក្នុងភូមិ២ សង្កាតស្រះចក ខណ្ឌដូនពេញ។
លោកអនុសេនីយ៍ឯក កាន់ វណ្ណៈ នាយកនគរបាលប៉ុស្តិ៍ស្រះចកបានប្រាប់ឱ្យដឹងថា នារីវ័យក្មេងដែលជាមុខសញ្ញាជួញដូរគ្រឿងញៀនទាំងពីរនាក់ ដែលឃាត់ខ្លួនមានទី១-ឈ្មោះម៉េត ស្រីពៅ អាយុ១៨ឆ្នាំ មានទីលំនៅមិនពិតប្រាកដ ២-ឈ្មោះចាន់ សោភា អាយុ១៦ឆ្នាំស្នាក់នៅផ្ទះជួល ផ្លូវរថភ្លើងភូមិ៣ ក្នុងសង្កាត់ស្រះចក ខណ្ឌដូនពេញ។
មុនពេលកើតហេតុ កម្លាំងនគរបាលប៉ុស្តិ៍នាំគ្នាធ្វើការល្បាតជាធម្មតានៅក្នុងភូមិសាស្ត្ររបស់ខ្លួន ដើម្បីទប់ស្កាត់ និងបង្ការបទល្មើសផ្សេងដូចសព្វមួយដង ។ លុះមកដល់ចំណុចខាងលើ ក៏បានប្រទះឃើញនារីវ័យក្មេងទាំងពីរនាក់នៅខាងក្នុងទូរថភ្លើងចាស់មួយកន្លែង ដែលគេទុកចោលនោះ ដោយមានការសង្ស័យកម្លាំងរបស់លោកក៏ធ្វើការឆ្មក់ចូលទៅខាងក្នុង ខណៈពេលដែលពួកគេទាំងពីរនាក់កំពុងតែនាំគ្នាថ្លឹង និងច្រកដាក់ថង់តូចៗ ដើម្បីទុកធ្វើចែកចាយនោះ។
ក្នុងប្រតិបត្តិការនោះដែរ កម្លាំងលោកបានធ្វើការដកហូតបានគ្រឿងញៀនចំនួន២កញ្ចប់ធំ ជញ្ជីងថ្លឹងចំនួន២គ្រឿង ឧបករណ៍សំរាប់ប្រើប្រាស់ចំនួន២កំប្លេ រួមទាំងវត្ថុតាងមួយចំនួនទៀតផងដែរ ។ ប្រតិបត្តិបង្ក្រាបគ្រឿងញៀននេះដែរ គឺកម្លាងរបស់លោកបានធ្វើឡើងក្រោយពីទទួលបាននូវបទបញ្ជាដោយផ្ទាល់អំពីសំណាក់លោកនាយឧត្តមសេនីយ៍ ជួន សុវណ្ណ ស្នងការនគរបាលរាជ ធានីភ្នំពេញ ដើម្បីធ្វើយ៉ាងណាទប់ស្កាត់ និងបង្ការបទល្មើសផ្សេងៗអោយបានជាពិសេសការប្រយុទ្ធប្រឆាំងទៅនឹងការជួញដូរគ្រឿងញៀននេះតែម្តង។
ចែករំលែកព័តមាននេះ