សម្តេចតេជោ ហ៊ុន សែន នាយករដ្ឋមន្ត្រីកម្ពុជា នារសៀលថ្ងៃទី២១ ខែសីហា ឆ្នាំ២០២២ នេះ បានចេញបញ្ជាឱ្យមេបញ្ជាការអង្គរក្ស ស្នើសុំបណ្តេញ សាន ប៊ុនធឿន ចេញពីក្របខ័ណ្ឌកងទ័ព។ ការសម្រេចបញ្ចេញនេះធ្វើឡើង ក្រោយពីលោក សាន ប៊ុនធឿន
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នារសៀលថ្ងៃទី២១ ខែសីហា ឆ្នាំ២០២២ នេះ បានចេញបញ្ជាឱ្យឯកឧត្តម ហ៊ីង ប៊ុនហ៊ាង មេបញ្ជាការដ្ឋានកងអង្គរក្សរបស់សម្តេចបណ្តេញលោក សាន្ត ប៊ុនធឿន ចេញពីក្របខ័ណ្ឌកងទ័ព។ ការសម្រេចបញ្ចេញនេះធ្វើឡើង ក្រោយពីលោក សាន្ត ប៊ុនធឿន មិនព្រមកែប្រែចរឹកក្នុងការប្រើប្រាស់ពាក្យសម្តីមិនសមរម្យនៅក្នុងការ Live តាមបណ្តាញសង្គម និងបោកចានផងដែរ។
សម្តេចតេជោ បានទម្លាយការពិតថា ការបញ្ជាឱ្យបញ្ឈប់លោក សាន្ត ប៊ុនធឿន ដែលកន្លងមក មានរហ័សនាម «អ្នកសារព័ត៌មាន ABC» នោះ ដោយសារបុគ្គលរូបនេះ អស់កែប្រែចរឹកមិនល្អចេញ។
សម្តេចតេជោ ក៏បានទម្លាយការពិតថា កន្លងមក ដើម្បីជួយដល់ សាន្ត ប៊ុនធឿន និងប្រពន្ធកូន រូបសម្តេចនិងភរិយា (សម្តេចកត្តិព្រឹទ្ធបណ្ឌិត ប៊ុន រ៉ានី ហ៊ុន សែន) បានជួយលុយ ដើម្បី សាន្ត ប៊ុនធឿន ទិញផ្ទះនៅ ថែមទាំងផ្តល់លុយជូន សាន្ត ប៊ុនធឿន ចំនួន៥០០ដុល្លារក្នុងមួយខែតាំងពីឆ្នាំ២០១៨មក។
«ចរឹតពាលរបស់ សាន្ត ប៊ុនធឿន ប្រាកដជាមិនអាចកែប្រែបានឡើយ» ។ នេះជាការបញ្ជាក់របស់សម្តេចតេជោ ដោយសម្តេចបានបង្ហោះវីដេអូដែលលោក សាន្ត ប៊ុនធឿន កំពុង Live ផឹកស្រា និងប្រើពាក្យអសុរស ព្រមទាំងបោ.កកែវ បោ.កចាន រួចស្រែករកថា «នរណាខ្លាំង លោ.តចេញមក»។ នៅក្នុងវីដេអូ Live នោះ លោក សាន្ត ប៊ុនធឿន មិនត្រឹមតែប្រើប្រាស់ពាក្យសម្តីអសុរសនោះទេ តែក្នុងវីដេអូឃ្លីបនោះ លោកសាន្ត ប៊ុនធឿន ថែមទាំងបោកចានកំទេ.ចចោល ដោយសារតែលោកខឹងរឿងរកទិញក្តាមយកទៅក្លែមមិនបាន ដែលវីដេអូឃ្លីបមួយនេះ ត្រូវបានអ្នកប្រើប្រាស់បណ្តាញសង្គមសម្តែងការហួសចិត្តគ្រប់គ្នា។
«ខ្ញុំធ្លាប់បានអប់រំ សាន្ត ប៊ុនធឿន កុំឱ្យស៊ីផឹកជេរបញ្ចោរ តែចរឹតមនុស្សនេះកែមិនឡើងឡើយ។ ដើម្បីជៀសវាងនូវការយល់ច្រឡំណាមួយកើតឡើង ថ្ងៃនេះខ្ញុំបានបញ្ជាឱ្យមេបញ្ជាការអង្គរក្សស្នើសុំបណ្តេញ សាន្ត ប៊ុនធឿន ចេញពីក្របខណ្ឌ័កងទ័ព»។ នេះជាការបញ្ជារបស់សម្តេចតេជោ។
ការចេញបញ្ជារបស់សម្តេចនាយករដ្ឋមន្ត្រីខាងលើនេះ ទទួលបានការសាទរភ្លូកទឹកភ្លូកដី ក្នុងនោះអ្នកប្រើប្រាស់បណ្តាញសង្គមបានធ្វើការចែកចាយយ៉ាងផុសផុសនូវបទបញ្ជារបស់សម្តេចដែលបញ្ឈប់លោក សាន្ត ប៊ុនធឿន ពីក្រមខណ្ឌកងអង្គរក្ស។
ក្នុងនោះអ្នកប្រើប្រាស់បណ្តាញសង្គមបានសរសេរសារគាំទ្រថា «សម្តេចពូ សំរេចត្រឹមត្រូវ បើទុកទៀតខូចឈ្មោះ ទាហាន police អស់ហើយ ខ្ញុំសូមជូនពរ សម្តេចពូ មានព្រះជន្ម យឺនយូរ គង់ជាម្លប់ដ៏ត្រជាក់ដល់ប្រជាពលរដ្ឋ ទូទាំងនគរកម្ពុជា»។ អ្នកប្រើប្រាស់បណ្តាញសង្គមហ្វេសប៊ុកខ្លះ ក៏បានចូលទៅបញ្ចេញមតិលើហ្វេសប៊ុកសម្តេចតេជោថា «ខ្ញុំមិននឹកស្មានថាលោកពូសាន ប៊ុនធឿន ដល់ថ្នាក់ហ្នឹងសោះ ! ក្លាយជាមនុស្សបំពុលសង្គម!» ។
បងប្អូនខ្លះ ក៏បានសាទរចំពោះចំណាត់ការរបស់សម្តេចថា «សូមគាំទ្រនូវចំណាត់ការរបស់សម្តេចអ៊ុំខ្លាំងណាស់ ហើយនឹងសូមអរគុណខ្លាំងបំផុតដែលសម្តេចអ៊ុំ សម្រេចដកបុគ្គលប្រមឹកនេះចេញពីក្របខ័ណ្ឌកងទ័ព។ ព្រោះបុគ្គលនេះឃើញថា ចរឹកក្អេងក្អាងខ្លាំងណាស់ »។
ក្រឡេកមើលហ្វេសប៊ុករបស់លោក សាន្ត ប៊ុនធឿនវិញ គិតត្រឹមម៉ោង៣រសៀលនេះ មិនឃើញមានការបង្ហោះសារអ្វីនោះទេ ក្រោយពីសម្តេចបញ្ជាឱ្យបញ្ឈប់លោកពីក្របខ័ណ្ឌទាហាន ។
តែនៅព្រឹកថ្ងៃទី២១ ខែសីហាម្សិលមិញ លោក សាន្ត ប៊ុនធឿន បានបង្ហោះរូបភាពមួយសន្លឹរបស់លោកអង្គុយថតជាមួយមិត្តភក្តិ និងបង្ហោះសារថា «ថ្ងៃទី 21/08/2022/នៅលើលោកយើងនេះ អ្វីដែលងាយ ហើយស្រួលបំផុត គឺរស់នៅបែបជីវិតសាមញ្ញៗធម្មតា ល្ងាចឡើងទំនេរពីការងារបបួលមិត្តភក្តិបងប្អូនដាក់ម៉ាយួរៗ ដើម្បីឱ្យជីវិតកាន់តែមានន័យជ្រៅ។ ជាចុងក្រោយលោកបណ្ឌិតចាងហ្វាង សាន្ត ប៊ុនធឿន ដកខ្លួនចេញពីពិភពគុនហើយ ហើយក៏លែងចង់ដឹងរឿងអ្នកដទៃទៀត នៅមុខផ្ទះដាំដើមគរ ហើយកាច់ធ្មុងដាក់ស្មុកទើបនៅស្រុកបាន»។
តែក៏មានអ្នកប្រើប្រាស់បណ្តាញសង្គមជាច្រើនបាន tag បទបញ្ជាសម្តេចដាក់ក្នុងហ្វេសប៊ុករបស់លោក សាន្ត ប៊ុនធឿនផងដែរ។
សូមបញ្ជាក់ថា នេះមិនមែនជាលើកទី១ទេ ដែលលោក សាន្ត ប៊ុនធឿន បានធ្វើការ Live តាមបណ្តាញសង្គមដោយផឹកស៊ីឡូឡា និងប្រើប្រាស់ពាក្យមិនសមរម្យនោះ។
គួររម្លឹកផងដែរថា លោកសាន្ត ប៊ុនធឿន ដែលជាចាងហ្វាងកាសែត ស្នេហាជាតិ ធ្លាប់ត្រូវបានសមត្ថកិច្ចបាច់ខ្លួននិងបញ្ជួនទៅតុលាការរាជធានីភ្នំពេញកាលពីឆ្នាំ២០១៦ តែត្រូវបានតុលាការធ្វើការដោះលែងឲ្យមានសេរីភាពវិញហើយ ក្រោយពីរូបលោកបានតម្កល់ប្រាក់មួយចំនួន។ ដែលកាលនោះ លោក សាន្ត ប៊ុនធឿន ត្រូវបានសមត្ថកិច្ច ខណ្ឌពោធិ៍សែនជ័យធ្វើការឃាត់ខ្លួន ដោយសារតែរូបលោកនិងដៃគូម្នាក់ទៀត បានសេពគ្រឿងស្រវឹងដែលមានជាតិអាល់កុល០,៦៤មីល្លីក្រាម ក្នុងមួយលីត្រខ្យល់ ពេលកំពុងបើកបរ ហើយលោកថែមទាំងបានប្រើពាក្យសម្តីប្រមាថ ថ្នាក់ដឹកនាំទៀត ក៏ដូចជាការប្រើពាក្យសម្តីមិនសមរម្យទៅលើក្រុមគ្រួសាររបស់ថ្នាក់ដឹកនាំ ជាពិសេសសម្តេច ហ៊ុន សែន និងសម្តេចក្រឡាហោម ស ខេង ដោយលោក សាន្ត ប៊ុនធឿន បានលើកឡើងថា ការប្រើពាក្យសំដីមិនសមរម្យនេះ ដោយសារតែលោកបានផឹកទឹកប្តូរនិស្ស័យ តែក្រោយមកលោកក៏បានចេញមុខសុំទោសថ្នាក់ដឹកនាំជាសាធារណៈផងដែរ៕
ចែករំលែកព័តមាននេះ