ម៉ាឡេស៊ីមកបង្ហាត់កីឡាឡនប៊ូលដល់អត្តពលិកជនពិការកម្ពុជា

ថ្ងៃទី ២២ ខែ មករា ឆ្នាំ ២០១៧

ម៉ោង ០៣:៤៨

រាជធានីភ្នំពេញ ៖ ប្រទេសម៉ាឡេស៊ីដែលត្រៀមធ្វើជាម្ចាស់ផ្ទះប្រកួតកីឡាប៉ារ៉ាហ្គេមឆ្នាំ២០១៧នោះ បានមកបង្ហាត់ដល់អត្តពលិកជនពិការកម្ពុជារយៈពេល២ថ្ងៃកាលពីថ្ងៃទី១៩ និងទី២០ មករា កន្លងទៅនេះ នៅទីលានបាល់ទាត់សិប្បនិមិ្មត Premium ក្នុងខណ្ឌទួលគោក ។

លោក យី វាសនា អគ្គលេខាធិការសហព័ន្ធកីឡាប៉ារ៉ាឡាំពិកកម្ពុជាបានមានប្រសាសន៍ថា កីឡាឡនប៊ូលនេះជាប្រភេទកីឡាថ្មីដែលប្រទេសម៉ាឡេស៊ីទើបតែបង្កើតឡើងប៉ុណ្ណោះ ។ ដូច្នេះដើម្បីឱ្យមានដៃគូប្រកួតក្នុងឋានៈជាម្ចាស់ផ្ទះ គេបានបញ្ជូនអ្នកបច្ចេកទេសរបស់គេមកបង្ហាត់បង្ហាញពីរបៀបលេងដល់បណ្ដាប្រទេសដទៃទៀត ដែលជាសមាជិកនៅក្នុងតំបន់អាស៊ានឱ្យចេះពីរបៀបលេង ។

ឡនប៊ូលនេះមានរូបរាងស្រដៀងនឹងប៊ូលដែលលេងសព្វថ្ងៃនេះដែរ គ្រាន់តែធំជាងនិងសំប៉ែតបន្តិច រីឯកូនប៊ីក៏ធំជាងកូនប៊ីធម្មតាដែរហើយចម្ងាយបោះប៊ី និងការចូលប៊ូលត្រូវកំណត់រយៈចម្ងាយទៅតាមប្រភេទពិការរបស់កីឡាករជនពិការ ។ មានន័យថា បើកីឡាករមានប្រភេទពិការមិនធ្ងន់ធ្ងរទេនោះ គេអាចប្រើរយៈចម្ងាយឆ្ងាយអាចមានរហូតដល់ទៅ២០ម៉ែត្រក៏មាន តែបើជនពិការប្រភេទធ្ងន់ ឬមើលមិនសូវឃើញគេបោះកូនប៊ីជិតទៅតាមនោះដែរ ។ ការចូលប៊ូលគឺបោះឱ្យរត់រមៀលសំដៅកូនប៊ី បើចូលកាន់តែកៀកគឺបានពិន្ទុច្រើន ។

ប៉ុន្តែលក្ខខណ្ឌរបស់វាមានភាពស្មុគស្មាញណាស់បើទោះជាកូនប៊ូលរបស់គេនៅឆ្ងាយពីកូនប៊ីបន្តិចមែន តែកូនប៊ូលរបស់យើងដែលព្យាយាមបោះចូលកៀកកូនប៊ីបានសម្រេចហើយ តែធ្វើឱ្យប៉ះជាមួយកូនប៊ូលរបស់គេនោះកូនប៊ូលរបស់យើងគេឱ្យស្អុយតែម្ដង ។ ដូច្នេះលោកគិតថា គេមកបង្ហាត់យើងតែ២ថ្ងៃមានរយៈពេលខ្លីបំផុត តែសំខាន់វាអាស្រ័យទៅលើគ្រូបង្គោលរបស់យើងតែប៉ុណ្ណោះ ។ បើសិនជាពួកគាត់ឆាប់ចាប់បានគឺជារឿងល្អណាស់ ព្រោះថាទម្រាំដល់ពេលប្រកួតនៅឆ្ងាយដែរ បើកីឡាកររបស់យើងព្យាយាមហ្វឹកហាត់ដោយការយកចិត្តទុកដាក់នោះប្រហែលជាមិនមានបញ្ហាអ្វីឡើយ ។

គួររំលឹកថា បណ្ដាប្រទេសនីមួយៗគេមានសិទ្ធិគ្រប់គ្រាន់ក្នុងការបង្កើតឱ្យមានប្រភេទកីឡាថ្មីដើម្បីដណ្ដើមយកមេដាយ ។ ចំណែកកម្ពុជានៅពេលធ្វើម្ចាស់ផ្ទះប្រកួតកីឡាស៊ីហ្គេមឆ្នាំ២០២៣ខាងមុខនេះមិនដឹងថា បង្កើតវិញ្ញាសាអ្វីខ្លះនោះទេសម្រាប់ដណ្តើមមេដាយ ៕