រាជធានីភ្នំពេញ ៖ កីឡាករល្បីឈ្មោះ ប្រាក់ មុន្នីឧត្តម បានរៀបមង្គលការយ៉ាងអធឹកអធមនៅកោះពេជ្រ អគារA កាលពីថ្ងៃទី២២ ខែមករា ឆ្នាំ២០១៦ ព្រឹកម៉ិញនេះ ដោយមានមន្ត្រីសហព័ន្ធ និងកីឡាករយ៉ាងច្រើនកុះករចូលរួម ។ ក្នុងនោះគេឃើញ
រាជធានីភ្នំពេញ ៖ កីឡាករល្បីឈ្មោះ ប្រាក់ មុន្នីឧត្តម បានរៀបមង្គលការយ៉ាងអធឹកអធមនៅកោះពេជ្រ អគារA កាលពីថ្ងៃទី២២ ខែមករា ឆ្នាំ២០១៦ ព្រឹកម៉ិញនេះ ដោយមានមន្ត្រីសហព័ន្ធ និងកីឡាករយ៉ាងច្រើនកុះករចូលរួម ។ ក្នុងនោះគេឃើញវត្តមានអ្នកជំនួញច្រើនរូបដែលជាម្ចាស់ក្រុមហ៊ុន ជាពិសេសលោកជំទាវ ហ៊ុន ម៉ាណា អគ្គនាយិកានៃអគ្គនាយកដ្ឋានវិទ្យុ និងទូរទស្សន៍បាយ័ន និងលោកឧត្តមសេនីយ៍ ឌី វិជ្ជា ក៏បានផ្តល់កិត្តិយសអញ្ជើញចូលរួមក្នុងពិធីមង្គលការរបស់លោកដែរ ។
លោក ប្រាក់ មុន្នីឧត្តម និយាយថា លោករៀបការចំនួន៩០តុ តែភ្ញៀវភាគច្រើនមិនមែនជាការអញ្ជើញរបស់លោកសុទ្ធសាធនោះទេ គឺជាការរៀបចំរបស់ក្រុមគ្រួសារខាងស្រីប៉ុណ្ណោះ ។ លោកថា គ្រួសារខាងស្រីជាអ្នកមានមុខមាត់ ទើបមង្គលការដែលបានធ្វើឡើងមានភាពអធឹកអធម ដោយមានភ្ញៀវកិត្តិយសជាច្រើនត្រូវបានអញ្ជើញឱ្យចូលរួម ។ លោកថា ភ្ញៀវដែលបានអញ្ជើញមិនអស់នោះទេ ជាពិសេសអ្នករាប់អានលោក ។ រវាងខ្លួន និងកូនក្រមុំស្គាល់គ្នាចំនួន៣ឆ្នាំ ទើបសម្រេចចិត្តរៀបការ ដោយមិនមែនជាការចាប់ជល់ដោយចាស់ទុំនោះទេ ។ ភរិយារបស់លោកឈ្មោះ ប្រាក់ ស្រីរ័ត្ន គឺជានិស្សិត ទើបនឹងបញ្ចប់ការសិក្សាថ្នាក់មហាវិទ្យាល័យ តែលោកមានគម្រោងបើកជំនួញរួមគ្នាក្រោយពេលរៀបការរួច ។
មង្គលការរបស់លោកត្រូវគេកត់សម្គាល់ថា មានភាពគគ្រឹកគគ្រេងយ៉ាងខ្លាំងធ្វើឱ្យបរិវេណកោះពេជ្រត្រូវណែនណាន់តាន់តាប់ដោយភ្ញៀវកិត្តិយស មិនថា កីឡាករល្បីឈ្មោះនៅក្នុងពិភពបាល់ទាត់ គឺសូម្បីតែកីឡាករ-កីឡាការិនីល្បីឈ្មោះនៅក្នុងពិភពកីឡាផ្សេងទៀតដែលធ្លាប់រួមការងារជាមួយលោកក្នុងការប្រកួតជម្រើសជាតិនៅក្នុង និងក្រៅប្រទេសក៏មានចំនួនច្រើនដែរ ។ ប្រាក់ មុន្នីឧត្តម បញ្ជាក់ថា ភរិយាលោកស្រឡាញ់លោកក្នុងនាមជាកីឡាករម្នាក់ ទើបលោកបញ្ជាក់ថា បើទោះរៀបការរួចហើយ លោក និងភរិយាអាចធ្វើការរៀងខ្លួន ឬមានមុខជំនួញណាមួយ ក៏លោកមិនបោះបង់អាជីពកីឡាករបាល់ទាត់ដែរ ដោយលោកនឹងកាន់តែប្រឡូកស៊ប់ជាមួយការហ្វឹកហាត់ និងការប្រកួតលើសដើម ។ ជាមួយនឹងការបង្ហាញមង្គលការនេះ ធ្វើឱ្យអ្នកគាំទ្រអបអរសាទរចំពោះលោកយ៉ាងខ្លាំង ៕
ចែករំលែកព័តមាននេះ