រាជធានីភ្នំពេញ ៖ សមាសភាពគូប្រកួតប្រដាល់នៅលើសង្វៀនទូរទស្សន៍ស៊ីអិនស៊ី ថ្ងៃអាទិត្យ ទី២២ មករា ខានស្អែកនេះ ប្រមូលផ្ដុំទៅដោយកីឡាករជើងចាស់ និងជើងថ្មីដែលត្រូវចូលខ្លួនមកសម្ដែងប្ញទ្ធិដាក់គ្នាជូនទស្សនិកជនបានទស្សនានាថ្ងៃសម្រាកចុងសប្តាហ៍ ។ ក្នុងចំណោមជើងខ្លាំងទាំង៦គូ គូដែលគេចាប់អារម្មណ៍ជាងគេមានចំនួន២គូ គឺកីឡាករ ចាត សីហា មកពីក្លិបអប់រំកាយ ស្រុកអន្លង់វែង ប្រកួតជាមួយកីឡាករ ផាន់ ផាត់យុទ្ធ មកពីក្លិបសាលវ័ន្តកីឡា និងកីឡាករ ជ័យ ប៊ុនសុង មកពីក្លិបគីសែមានរិទ្ធ ប្រកួតជាមួយកីឡាករ ឈាង សារុន មកពីក្លិបគជសារកីឡា ។
ចាត សីហា ជាអ្នកប្រដាល់ជើងខ្លាំងមួយរូបដែលមានបទពិសោធន៍ប្រកួតនៅលើសង្វៀនមិនតិចឆ្នាំទេ ហើយការប្រកួតមួយរយៈចុងក្រោយនេះ ទទួលលទ្ធផលល្អច្រើន ពោលគឺឈ្នះច្រើនជាងចាញ់ ។ រីឯ ផាន់ ផាត់យុទ្ធ ជាអ្នកប្រដាល់ជើងចាស់មានសមត្ថភាពខ្ពស់មិនងាយនរណាផ្ដួលគេបានឡើយ ។ ដូច្នេះការមកជួប ចាត សីហា លើកនេះ គេមិនសូវមានការបារម្ភប៉ុន្មានទេ ។ ចាំមើល ចាត សីហា អាចតស៊ូជាមួយ ផាន់ ផាត់យុទ្ធ ដល់ទឹកទី៥ បានឬអត់ ។
ចំណែកឯ ជ័យ ប៊ុនសុង ជួប ឈាង សារុន លើកនេះ ពិបាកវាយតម្លៃទុកមុនពីលទ្ធផលចុងក្រោយណាស់ ។ ជ័យ ប៊ុនសុង ជាអ្នកប្រដាល់ចាស់វស្សាមួយរូបដែលមានថ្វីដៃប្រកួតនៅលើសង្វៀនល្អខ្លាំងណាស់ តែគេមានចំណុចខ្សោយមួយត្រង់រាងឆេវឆាវបន្តិច ។ ទាំងស្នៀតកណ្ដាប់ដៃ និងស្នៀតជើង សុទ្ធតែអាចប្រើការបានយ៉ាងស្ទាត់ជំនាញបំផុត កម្លាំងស៊ុហ្វក៏ខ្លាំងអាចតស៊ូប្រកួតបាន៥ទឹកពេញដោយមិនលំបាក ។ ទោះបីជាយ៉ាងណាគេមិនអាចមើលស្រាលលើ ឈាង សារុន បានទេ ថ្វីដ្បិតតែកីឡាកររូបនេះមិនសូវលេចមុខនៅលើសង្វៀនញឹកញាប់មែន ប៉ុន្តែតាមតែគេធ្លាប់ដឹងកីឡាកររូបនេះមានថ្វីដៃប្រកួតនៅលើសង្វៀនល្អអាចតតាំងជាមួយ ជ័យ ប៊ុនសុង ឱ្យកក្រើករេញបាន។
ដោយឡែកគូប្រកួតមិត្តភាពផ្សេងទៀតមាន កីឡាករ ពីន ណាថៃ មកពីក្លិបកងទ័ពជើងទឹក ប្រកួតជាមួយកីឡាករ ពុយ ឈិន មកពីក្លិបឃ្លាំងមឿងកីឡា ។ កីឡាករ ឡុង ខេត្ត មកពីក្លិបខ្លារខិនមានរិទ្ធ ប្រកួតជាមួយកីឡាករ ទេស សុខហេង មកពីក្លិបកងពលតូចលេខ៧០ ។ កីឡាករ ស៊ុំ សុខឡេង មកពីក្លិបសាលវ័ន្តកីឡា ប្រកួតជាមួយកីឡាករ សិទ្ធ ចន្ទ្រា មកពីក្លិបសាមគ្គីកូនខ្មែរ និងគូចុងក្រោយ កីឡាករ ឌុម កែវដាំ មកពីក្លិបសុភានូមានជ័យ ប្រកួតជាមួយកីឡាករ ឡុង ចំរើន មកពីក្លិបខ្លារខិនមានរិទ្ធ ៕
ចែករំលែកព័តមាននេះ