ចិនប្រឈមបញ្ហាផលិតផលក្លែងក្លាយកំពុងចរាចរលើទីផ្សារ
ប្រទេសចិន ៖ បញ្ហាផលិតផលក្លែងក្លាយរបស់ចិន មានរាប់បញ្ចូលទាំងទឹកជ្រលក់ និងគ្រឿងទេស ដែលមនុស្សទូទៅកំពុងប្រើប្រាស់ក្នុងម្ហូបអាហាររបស់ពួកគេជារៀងរាល់ថ្ងៃ ។
ប្រទេសចិន ៖ បញ្ហាផលិតផលក្លែងក្លាយរបស់ចិន មានរាប់បញ្ចូលទាំងទឹកជ្រលក់ និងគ្រឿងទេស ដែលមនុស្សទូទៅកំពុងប្រើប្រាស់ក្នុងម្ហូបអាហាររបស់ពួកគេជារៀងរាល់ថ្ងៃ ។
អាជ្ញាធរប្រទេសចិនភាគខាងជើងនិយាយថា ពួកគេបានចុះចាប់រោងចក្រក្រោមដីជាច្រើនកន្លែង ដែលបានផលិតផលិតផលក្លែងក្លាយរបស់យីហោដទៃដូចជា ទឹកស៊ីអុីវ និងគ្រឿងទេសផ្សេងៗ ។
ផលិតផលក្លែងក្លាយទាំងនោះត្រូវបានផលិតក្នុងតំបន់ Tianjin និងចែកចាយជាមួយផលិតផលពិតប្រាកដ ដោយក្រុមហ៊ុនធំៗជាច្រើន ។
ប៉ូលិសបានធ្វើសកម្មភាពបន្ទាប់ពីមានសេចក្តីរាយការណ៍មួយពីកាសែតក្នុងស្រុកដែលទម្លាយចេញព័ត៌មាននេះ ។ កាសែតនោះរាយការណ៍ថា ផលិតផលក្លែងក្លាយទាំងនោះត្រូវបានផលិតក្នុងទ្រង់ទ្រាយធំ ដោយប្រើប្រាស់ទឹកមិនស្អាត អំបិលឧស្សាហកម្មមិនស័ក្តិសមនឹងទទួលទាន និងគ្រឿងទេសត្រូវបានលក់ចេញក្នុងតម្លៃទាបចេញពីរោងចក្រដទៃ ។
កាសែតនេះព្យាករថា មានរោងចក្របែបគ្រួសារដែលផលិតផលិតផលក្លែងក្លាយនេះប្រមាណ៥០ឯណោះ និងរកប្រាក់ចំណូលបាន១៤លានដុល្លារជារៀងរាល់ឆ្នាំ ។ កាសែតនោះរាយការណ៍ទៀតថា ឧបករណ៍ត្រូវបានទុកដាក់នៅជិតកន្លែងចាក់សំរាមផងដែរ ។
រដ្ឋបាលផ្នែកអាហារ និងឱសថចិននិយាយក្នុងសេចក្តីថ្លែងការណ៍មួយថា ពួកគេបានបញ្ជាឲ្យមានការស៊ើបអង្កេតលើការអះអាងនេះហើយ ។
Nestle ជាក្រុមហ៊ុនដែលផលិតផលមួយចំនួនរបស់ខ្លួន កំពុងត្រូវបានចម្លងជាផលិតផលក្លែងក្លាយ និយាយថា ពួកគេប្រឆាំងនឹងរាល់ការក្លែងបន្លំដោយខុសច្បាប់នូវផលិតផលអាហារ និងភេសជ្ជៈ ។
អ្នកនាំពាក្យក្រុមហ៊ុនខាងលើ អ្នកស្រី Liu Ying និយាយថា ៖ « ពួកយើងកំពុងតែសហការយ៉ាងជិតដិតជាមួយអាជ្ញាធរដើម្បីស្វែងរក និងចាត់វិធានការលើអ្នកក្លែងបន្លំទាំងនោះដើម្បីការពារដល់អតិថិជន » ។
ចំណែកក្រុមហ៊ុន Lee Kum Kee បានជំរុញដល់អតិថិជនឲ្យទិញផលិតផលគ្រឿងទេស តាមរយៈបណ្តាញដែលអាចទុកចិត្តបានដូចជា ផ្សារទំនើប ។ ពួកគេនិយាយថា តាមបទពិសោធន៍កន្លងមក ផលិតផលក្លែងក្លាយភាគច្រើនត្រូវបានលក់ក្នុងហាងតាមផ្លូវ និងផ្សារបោះដុំ ។
យោងតាមកាសែតខាងលើឲ្យដឹងទៀតថា ខ្សែផលិតកម្មនៃផលិតផលក្លែងក្លាយទាំងនោះ គឺមានទ្រង់ទ្រាយធំ និងសន្តិសុខខ្ពស់បំផុត ។ រោងចក្រទាំងនោះមានបុគ្គលិកជាច្រើននាក់ និងមានបំពាក់ដោយកាមេរ៉ាសុវត្ថិភាព ក៏ដូចជាអ្នកឃ្លាំមើលនៅខាងក្រៅដើម្បីឲ្យសញ្ញាផងដែរ ។
គួរបញ្ជាក់ថា ប្រទេសចិនបានជួបប្រទះនឹងបញ្ហាសុវត្ថិភាពអាហារក្នុងរយៈពេលប៉ុន្មានឆ្នាំថ្មីៗនេះ ។
យោងតាមសេចក្តីរាយការណ៍កាលពីឆ្នាំ២០១៥ ឲ្យដឹងថា ជិតពាក់កណ្តាលនៃរោងចក្រផលិតអាហាររបស់ប្រទេសចិន គឺគ្មានស្តង់ដាអន្តរជាតិ ។ កាលពីឆ្នាំមុន សាច់ដែលត្រូវបានក្លាសេឲ្យកករាប់រយតោន ត្រូវបានលួចលក់ចេញក្នុងខេត្ត Hunan ហើយសាច់ខ្លះសល់តាំងពីឆ្នាំ១៩៧០ ឯណោះ ។
កាលពីខែធ្នូ រដ្ឋបាលផ្នែកអាហារ និងឱសថរបស់ប្រទេសចិននិយាយថា ពួកគេបានត្រួតពិនិត្យប្រមាណ១៥លានដងក្នុងរយៈពេល៩ខែដំបូងឆ្នាំ២០១៦ ដោយប្រទះឃើញមានការប្រព្រឹត្តខុសច្បាប់ច្រើនជាង៥០ម៉ឺនករណីទៅទៀត ៕
ចែករំលែកព័តមាននេះ