រាជធានីភ្នំពេញ ៖ កម្មវិធីប្រកួតប្រដាល់ជាលក្ខណៈមិត្តភាពអន្តរជាតិ៍នៅលើសង្វៀនទូរទស្សន៍ស៊ីអិនស៊ី នៅថ្ងៃទី២១ មករា ខាងមុខនេះប្រជុំដោយកីឡាករជើងខ្លាំង៣សាសន៍ គឺកម្ពុជា-បារាំង-ថៃ ។
រាជធានីភ្នំពេញ ៖ កម្មវិធីប្រកួតប្រដាល់ជាលក្ខណៈមិត្តភាពអន្តរជាតិ៍នៅលើសង្វៀនទូរទស្សន៍ស៊ីអិនស៊ី នៅថ្ងៃទី២១ មករា ខាងមុខនេះប្រជុំដោយកីឡាករជើងខ្លាំង៣សាសន៍ គឺកម្ពុជា-បារាំង-ថៃ ។
កីឡាករកម្ពុជា រិន សារដ្ឋ មកពីក្លិបខេត្តព្រៃវែង ត្រូវបានគេផ្គូផ្គងឱ្យជួបប្រកួតជាមួយកីឡាករបារាំងឈ្មោះ Huseyin Ozugur ក្នុងប្រភេទទម្ងន់៦៧គីឡូក្រាម ។ ព្រំ វី មកពីក្លិបកងទ័ពជើងទឹក ជួបប្រកួតជាមួយកីឡាករថៃឈ្មោះ កៅ ភោដាំ ហានរ៉ាវី ក្នុងប្រភេទទម្ងន់៥៧គីឡូក្រាម និង ឡុង សុភី មកពីក្លិបសាលវ័ន្តកីឡា ប្រកួតជាមួយកីឡាករថៃឈ្មោះ នឹង ត្រាក់កាន ក.កាមន្តវ៉ាត ក្នុងប្រភេទទម្ងន់៦៧គីឡូក្រាម ។
កីឡាករបារាំងរូបនេះ មិនត្រូវបានគេប្រាប់ឱ្យដឹងពីប្រវត្តិប្រកួតច្បាស់លាស់នោះទេ គ្រាន់តែដឹងថា គេហាត់នៅប្រទេសថៃ និងមានបទពិសោធន៍ប្រកួតយ៉ាងជោកជាំ ថែមទាំងធ្លាប់ ផ្ដួលកីឡាករថៃឱ្យសន្លប់នៅក្រោមកណ្ដាប់ដៃរបស់គេមិនតិចដងឡើយ ។ ប៉ុន្តែសម្រាប់ការមកជួបអ្នកប្រដាល់វាយក្នុងទ្រុង រិន សារដ្ឋ លើកនេះប្រហែលជាពិបាកបន្តិចហើយ ។ ទោះបីរិន សារដ្ឋ គ្រាន់តែជាអ្នកប្រដាល់ជើងថ្មីម្នាក់បទពិសោធន៍ប្រកួតនៅលើសង្វៀនមិនច្រើនណាស់ណាក៏គេអាចប្រកួតដោយទំនុកចិត្តបានដែរ ។
ចំណែក ព្រំ វី ធ្លាប់ប្រកួត៥៧ដង ឈ្នះ៤០ដង ចាញ់១៧ដង ត្រូវជួបប្រកួតជាមួយកីឡាករថៃដែលធ្លាប់ប្រកួត៦០ដង ឈ្នះ៥០ដង ចាញ់៩ដង និងស្មើ១ដង ។ គូនេះមិនអាចមើលស្រាល លើខាងណាម្នាក់បានឡើយ ដូច្នេះមានតែរង់ចាំមើលការប្រកួតជាក់ស្តែងប៉ុណ្ណោះ ។
មួយគូទៀត ឡុង សុភី ដែលធ្លាប់ប្រកួត១២០ដង ឈ្នះ៩០ដង ចាញ់២៦ដង ស្មើ៤ដង និងធ្លាប់ផ្ដួលគូប្រកួតឱ្យសន្លប់បាន៤៤ដង នឹងជួបប្រកួតជាមួយកីឡាករថៃដែលធ្លាប់ប្រកួត៦៧ដង ឈ្នះ៥៧ដង ចាញ់១០ដង ។ គូនេះគេមានជំនឿចិត្តលើឡុង សុភី ច្រើនជាង ទោះបីកីឡាករថៃរូបនេះធ្លាប់មកប្រកួតនៅលើសង្វៀនស្រុកខ្មែរហើយដឹងពីបច្ចេកទេសប្រកួតរបស់ ឡុង សុភី ខ្លះៗក្តី ។
រីឯគូប្រកួតមិត្តភាពធម្មតាវិញមានកីឡាករ សុខ វាសនា មកពីក្លិបឃ្លាំងមឿងកីឡា ប្រកួតជាមួយកីឡាករ ចាត ស៊ីចាន់ មកពីក្លិបអប់រំកាយស្រុកអន្លង់វែង ។
ដោយឡែក នៅលើសង្វៀនទូរទស្សន៍ស៊ីធីអិនថ្ងៃសៅរ៍នេះដែរ ក៏មានការប្រកួតប្រដាល់លក្ខណៈមិត្តភាពអន្តរជាតិជូនទស្សនិកជនបានទស្សនានាថ្ងៃសម្រាកចុងសប្តាហ៍ផងដែរ ។ សម្រាប់គូអន្តរជាតិមានកីឡាករ ចាន់ សំអាត មកពីក្លិបអប់រំកាយស្រុកអន្លង់វែង ដែលធ្លាប់ប្រកួត៤៥ដង ឈ្នះ២៨ដង ចាញ់១៦ដង ស្មើ១ដង និងផ្តួលគូប្រកួតឱ្យសន្លប់បាន១៥ដង ត្រូវជួបប្រកួតជាមួយកីឡាករថៃឈ្មោះភិតណាម ស.ប៉ាកន ក្នុងប្រភេទទម្ងន់៦០គីឡូក្រាម ។ កីឡាករថៃរូបនេះធ្លាប់ប្រកួតបាន៦៥ដង ឈ្នះ៥០ដង ចាញ់១៣ដង ស្មើ៤ដង និងធ្លាប់ផ្ដួលគូប្រកួតឱ្យសន្លប់បាន៨ដង ។ គូនេះមិនធ្លាប់ជួបគ្នាពីមុនមកនោះទេ ដូច្នេះគេមិនអាចទាយទុកមុនថាអ្នកណាខ្លាំងជាងអ្នកណាឡើយ ។
កីឡាករ ពៅ សក្ដិសិទ្ធិ មកពីក្លិបតាព្រហ្មមានជ័យ ដែលធ្លាប់ប្រកួតបាន៨០ដង ឈ្នះ៤៦ដង ចាញ់២៧ដង ស្មើ៦ដង និងធ្លាប់ផ្ដួលគូប្រកួតឱ្យសន្លប់បាន១៥ដង នឹងជួបប្រកួតជាមួយកីឡាករថៃឈ្មោះ ឆានឆ័យ ស៊ីតណាយុកថៃ ក្នុងប្រភេទទម្ងន់៧០គីឡូក្រាម ។ កីឡាករថៃរូបនេះធ្លាប់ប្រកួតបាន៩០ដង ឈ្នះ៦១ដង ចាញ់២៦ដង ស្មើ៣ដង ។ ទោះបីជាកីឡាករថៃរូបនេះ មានប្រវត្តិប្រកួតច្រើនជាងមែន ប៉ុន្តែ ពៅ សក្ដិសិទ្ធិ ប្រហែលជាមិនធ្វើឱ្យអ្នកគាំទ្រអស់សង្ឃឹមឡើយ ។
រីឯគូប្រកួតមិត្តភាពធម្មតាវិញមានកីឡាករ ហួត លីហ៊ុយ មកពីក្លិបកងទ័ពជើងទឹក ប្រកួតជាមួយកីឡាករ ហេង ពៅ មកពីក្លិបកងពលតូចលេខ៧០ ។ កីឡាករ ឡុង ឡា មកពីក្លិបអប់រំកាយស្រុកអន្លង់វែង ប្រកួតជាមួយកីឡាករ លីន វីរៈ មកពីក្លិបបូរីរាជសីហ៍ និងគូចុងក្រោយកីឡាករ សួង សុវណ្ណថា មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ វ៉ឺន វ៉ាន់ មកពីក្លិបពន្លឺសាមគ្គីខេត្តបាត់ដំបង ៕
ចែករំលែកព័តមាននេះ