មានបុរសម្នាក់ត្រូវចោរលួចយកម៉ូតូ១គ្រឿងទៅបាត់ កាលពីវេលាម៉ោងប្រមាណ៦និង៣០នាទីព្រឹកថ្ងៃទី១៥ ខែសីហា ឆ្នាំ២០២២ កន្លងទៅ ខណៈម្ចាស់ចតទុកនៅមាត់ទឹកបារាយណ៍ ខាងកើតវត្តស្វាយរមៀត
ខេត្តសៀមរាប ៖ បើតាមសេចក្តីរាយការណ៍ឲ្យដឹងថា មានបុរសម្នាក់ត្រូវចោរលួចយកម៉ូតូ១គ្រឿងទៅបាត់ កាលពីវេលាម៉ោងប្រមាណ៦និង៣០នាទីព្រឹកថ្ងៃទី១៥ ខែសីហា ឆ្នាំ២០២២ កន្លងទៅ ខណៈម្ចាស់ចតទុកនៅមាត់ទឹកបារាយណ៍ ខាងកើតវត្តស្វាយរមៀត ប្រហែល២០០ម៉ែត្រ ស្ថិតក្នុងភូមិបន្ទាយឈើ សង្កាត់ទឹកវិល ក្រុងសៀមរាប ។
ម្ចាស់ម៉ូតូឈ្មោះ ពេម ពង ភេទប្រុស អាយុ៥២ឆ្នាំ ជាកសិករ រស់នៅភូមិគោកដូង សង្កាត់ទឹកវិល ក្រុងសៀមរាប ហើយម៉ូតូដែលត្រូវចោរលួចយកទៅបាត់នោះ ម៉ាកហុងដាឌ្រីម សេ៊រីឆ្នាំ២០១៥ ពណ៌ខ្មៅ ពាក់ផ្លាកលេខ បាត់ដំបង១V-៩៤៨៣ ។
សេចក្តីរាយការណ៍ឲ្យដឹងទៀតថា នៅម៉ោងប្រហែល៦ព្រឹកថ្ងៃនោះ ជនរងគ្រោះបានជិះម៉ូតូចេញពីផ្ទះ ដើម្បីទៅសាមងដែលរាយចាប់ត្រីនៅស្ទឹងបារាយណ៍ ។ មងត្រូវបានដាក់រាយតាំងពីល្ងាចថ្ងៃទី១៤ ខែសីហា ហើយបានយកម៉ូតូទៅចតទុកនៅមាត់ទឹក រួចម្ចាស់ចុះទៅសាមង ។
លុះបានប្រហែលកន្លះម៉ោង ជនរងគ្រោះក្រឡេកទៅឃើញមនុស្ស២នាក់ ដើរចុះឡើងៗក្បែរម៉ូតូ ស្រាប់តែបន្តិចក្រោយក៏នាំគ្នាអូសម៉ូតូចេញទៅ ដោយម្នាក់អូស និងម្នាក់ទៀតរុញ ។ ពេលឃើញដូច្នោះ ម្ចាស់ម៉ូតូបានស្ទុះរត់ឡើងពីទឹកដេញតាមចោរ ប៉ុន្តែចោរ២នាក់នោះបានជិះម៉ូតូគេចខ្លួនបាត់ ។
បន្ទាប់មកជនរងគ្រោះក៏បានរត់ដេញតាម និងស្រែកថា «ចោរលួចម៉ូតូៗ» ពេលនោះក៏មានរ៉ឺម៉កម៉ូតូមួយគ្រឿងជិះកាត់ គាត់ក៏ប្រាប់អ្នករ៉ឺម៉កឲ្យជួយដេញចាប់ចោរ ។ នៅពេលនោះដែរ ក៏មានស្ត្រីម្នាក់ឮក៏ស្រែកប្រាប់ឲ្យទៅសួរប្ដីគាត់ ព្រោះប្តីគាត់មានអាយកូម ដើម្បីផ្តល់ព័ត៌មានទៅគោលដៅខាងមុខឲ្យជួយតាមចោរ ។
បន្ទាប់មក ប្តីគាត់បានហៅតាមអាយកូមទាក់ទងទៅប្រជាការពារ និងហៅតៗគ្នាទៅនគរបាលប៉ុស្តិ៍ និងនគរបាលបេតិកភណ្ឌជួយស្ទាក់ ។ បន្តិចក្រោយមក ក៏ឃើញមាននគរបាលមូលដ្ឋានទៅដល់ និងជួយស្វែងរកដែរ តែរកមិនឃើញនោះទេ ព្រោះដោយសារចោរទាំង២នាក់នោះជិះម៉ូតូគេចខ្លួនបាត់ទៅហើយ ។
ទោះជាយ៉ាងណា សមត្ថកិច្ចកំពុងចាត់វិធានការស៊ើបអង្កេត និងស្រាវជ្រាវវែកមុខចោរទាំង២នាក់
នេះ ដើម្បីនាំខ្លួនមកអនុវត្តទោសតាមច្បាប់ ៕
ចែករំលែកព័តមាននេះ