រាជធានីភ្នំពេញ ៖ ជាការពិតណាស់ ការជ្រើសរើសគូស្រករជារឿងសំខាន់ក្នុងជីវិត ដែលគ្រប់គ្នាតែងប្រាថ្នាជីវិតគូស្រលាញ់គ្នា ដល់ចាស់កោងខ្នង។ ហេតុដូច្នេះហើយ ទើបឪពុកម្តាយ អាណាព្យាបាល តែងតែពិនិត្យយ៉ាងហ្មត់ចត់ទៅលើអនាគតកូនប្រសារស្រី…
រាជធានីភ្នំពេញ ៖ ជាការពិតណាស់ ការជ្រើសរើសគូស្រករជារឿងសំខាន់ក្នុងជីវិត ដែលគ្រប់គ្នាតែងប្រាថ្នាជីវិតគូស្រលាញ់គ្នា ដល់ចាស់កោងខ្នង។ ហេតុដូច្នេះហើយ ទើបឪពុកម្តាយ អាណាព្យាបាល តែងតែពិនិត្យយ៉ាងហ្មត់ចត់ទៅលើអនាគតកូនប្រសារស្រី ឬកូនប្រសារប្រុស ពិសេសសាមីខ្លួន គឺកាន់តែប្រុងប្រយ័ត្ននិងសម្លឹងមើលគ្រប់ជ្រុងជ្រោយ មុននឹងធ្វើការសម្រេចចិត្តទទួលយកនរណាម្នាក់មកក្នុងជីវិត។
ពាក្យចាស់តែងពោលថា ធ្វើស្រែខុសមួយរដូវ នៅមួយរដូវ ឬធ្វើស្រែខុស ឆ្នាំនេះ ឬ២ ឬ៣ ឆ្នាំ ក៏គង់ត្រូវ១ឆ្នាំ តែរើសគូស្រករតែខុសម្ដង គឺខុសមួយជីវិត «នេះជាពាក្យស្លោកខ្មែរយើងលើកឡើង ជាគតិដាស់តឿនដល់បេក្ខជនដែលមានបំណងរៀបអាពាហ៍ពិពាហ៍ដើម្បីស្វែងរកសុភមង្គលជីវិតរួមគ្នា»។
មួយវិញទៀត ចាប់ផ្តើមមានស្នេហាជាមួយនរណាម្នាក់ គឺមិនពិបាកនោះទេ ហើយការរៀបការជាមួយនរណាម្នាក់ក៏មិនពិបាកនោះដែរ តែអ្វីដែលពិបាកនោះ គឺថាតើធ្វើយ៉ាងណាឱ្យចំណងស្នេហានៅតែផ្អែមល្អែម រឹងមាំ និងក្តៅគគុក។ រៀបការមិនមែនជាទីបញ្ចប់នៃសេ្នហានោះទេ តែរៀបការគឺជាការចាប់ផ្តើមនូវជីវិតថ្មី ដែលទាមទារឱ្យបុរស-ស្ត្រី ត្រូវពួតដៃគ្នាឱ្យបានល្អ ទើបរក្សាចំណងស្នេហានិងអាពាហ៍ពិពាហ៍ឱ្យមានពន្លឺជានិរន្ត៍។ ក្នុងនោះមានកត្តារួមផ្សំ និងលក្ខណៈសម្បត្តិជាច្រើនជួយឲ្យស្នេហាមួយអាចដំណើរការដោយរលួនទៅបាន ។
ជាការពិត ពេលដែលត្រូវសម្លឹងរកអ្នកណាម្នាក់ជាគូ ការពិនិត្យតែរូបរាងខាងក្រៅ មិនគ្រប់គ្រាន់ទេ ។ បើយោងតាមសៀវភៅមហាសង្ក្រាន ឆ្នាំខាលចត្វាស័ក រៀបរៀងដោយឯកឧត្តម អ៊ឹម បុរិន្ទ អ្នកស្រាវជ្រាវវិជ្ជាហោរាស្ត្រខ្មែរ និងសកល បានបញ្ជាក់ថា តម្រាមើលមនុស្សប្រុសឬស្រី នៅជាមួយគ្នាមានសេចក្តីសុខឬទេ ឲ្យយកថ្ងៃកំណើត មនុស្សប្រុស និងមនុស្សស្រីបូកចូលគ្នា ហើយគុណនឹង៥ ហើយហារនឹង៧ រួចទាយតាមសំណល់ខាងក្រោម ៖ សេស១ មិនល្អមិនអាក្រក់ សេស២ ផ្នែកខាងស្រីមិនសូវមានភាពស្មោះត្រង់ សេស៣ មិនល្អមិនអាក្រក់ សេស៤ វត្ថុបំណងប្រាថ្នានឹងបានសម្រេច សេស៥,៦ ស្វាមីភរិយាស្រលាញ់គ្នាល្អណាស់ សេស០ ស្វាមីភរិយារមែងនឹងឈ្លោះវិវាទគ្នា ។
ចំពោះតម្រាមើលគូស្រករមានទ្រព្យ ឬយ៉ាងណាវិញ
ដើម្បីដឹងថា ស្វាមីភរិយានេះមានទ្រព្យសម្បត្តិ ឬក្រលំបាកយ៉ាងណានោះ ឲ្យនាំយកថ្ងៃកំណើតទាំង២បូកចូលគ្នាយក១២ គុណហើយយក៧ហារលព្ធឲ្យចោល ហើយមើលសំណល់ដូចខាងក្រោម ៖ សេស១ មានទ្រព្យសម្បត្តិច្រើន សេស២ មានទុក្ខពិបាកចិត្តច្រើន សេស៣,៤ ស្រលាញ់គ្នារហូតដល់ចាស់ជរា សេស៥,៦ មានគោ ក្របី ដំរីសេះ យ៉ាងច្រើន សេស០ មិនល្អឡើយ ។ ជាទៅទៅ ភាពទាក់ទាញនៃរូបសម្រស់ ជាកត្តាដំបូង មុននឹងឈានដល់ស្វែងយល់ចិត្តគ្នា តែក៏ត្រូវគិតទៀតថា ការយកគ្នាជាគូអនាគត មានន័យថា អ្នកនឹងរួមរស់ជាមួយគ្នាតទៅ រូបសម្រស់មិនបានឋិតថេរទេ មានតែចិត្តគំនិតទេ ដែលមិនចេះសឹករេចរិលទៅតាមអាយុកាល ៕
ចែករំលែកព័តមាននេះ