ចាត់ទុកជាតំណាងអាជីវករផ្សារអូរឬស្សីប្រមាណ១២០នាក់ ក្នុងចំណោមអាជីវករជាង៥ ០០០តូប នៅព្រឹកថ្ងៃទី១៥ ខែសីហា ឆ្នាំ២០២២នេះ ដឹកនាំដោយ
រាជធានីភ្នំពេញ ៖ ចាត់ទុកជាតំណាងអាជីវករផ្សារអូរឬស្សីប្រមាណ១២០នាក់ ក្នុងចំណោមអាជីវករជាង៥ ០០០តូប នៅព្រឹកថ្ងៃទី១៥ ខែសីហា ឆ្នាំ២០២២នេះ ដឹកនាំដោយឈ្មោះ គង់ វុទ្ធី បាននាំគ្នាទៅកាន់ខុទ្ទកាល័យសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ស្ថិតនៅក្បែរវិមានឯករាជ្យ សង្កាត់ចតុមុខ ខណ្ឌដូនពេញ រាជធានីភ្នំពេញ ក្នុងគោលបំណងទៅដាក់ញាតិឲ្យសម្តេចជួយអន្តរាគមន៍ បញ្ហារឿងថ្លៃបង់តម្លៃតូបលក់ដូររយៈពេល២ឆ្នាំទៅមុខទៀត ដោយគិតតាមតម្លៃតូបចាស់សុំបញ្ចុះតម្លៃនៅត្រឹម៥០% ។
ម៉ោងប្រមាណ៩ព្រឹក ក្រុមអាជីវករបានជួបជុំគ្នានៅមុខវត្តបទុម រួចបាននាំគ្នាដើរយកញាតិទៅកាន់ខុទ្ទកាល័យសម្តេច ដើម្បីដាក់ញាតិចូលខុទ្ទកាល័យសម្តេច ហើយខាងខុទ្ទកាល័យក៏បានអនុញ្ញាតិឲ្យតំណាងអាជីវករចូលដាក់ញាតិផងដែរ ។
មិនយូរប៉ុន្មាន លទ្ធផលខាងខុទ្ទកាល័យបានយល់ព្រមទទួលញាតិរបស់តំណាងអាជីករ ហើយនៅពេលតំណាងអាជីវករចេញមកវិញ ពួកគាត់ក៏បាននិយាយប្រាប់ក្រុមអាជីវករថា ខុទ្ទកាល័យបានសន្យាយកញាតិពួកគាត់ទៅជូនដល់ដៃសម្តេចផ្ទាល់ និងឲ្យពួកគាត់ត្រឡប់ទៅវិញសិន ដោយរង់ចាំស្តាប់ការជូនដំណឹងនៅពេលក្រោយ ។
លុះដល់ម៉ោងប្រមាណ១០និង៤៥នាទីព្រឹកថ្ងៃដដែល ក្រោយពេលទទួលបានការណែនាំខាងខុទ្ទកាល័យហើយ តំណាងអាជីវករប្រមាណ១២០នាក់នោះ ក៏បាននាំគ្នារំសាយនៅមុខខុទ្ទកាល័យសម្តេច ទៅប្រកបមុខរបរអាជីវកម្មរៀងៗខ្លួនទៅ ដោយពុំមានបាតុភាពអ្វីនោះទេ។
ទាក់ទិននឹងបញ្ហា អាជីវករនាំគ្នាយកញាតិទៅដាក់ខុទ្ទកាល័យសម្តេចខាងលើនេះ លោក ហ៊ត វ៉ាន់ធី ប្រធានគណៈកម្មការផ្សារអូឬស្សី បានថ្លែងឲ្យដឹងថា យើងបានដោះស្រាយនៅផ្សារ នៅខណ្ឌ និងនៅក្រុង អញ្ចឹងបានគោលការណ៍មកអស់ហើយ តែបងប្អូនយើងនឹង (អាជីវករ) គាត់មិនសុខចិត្ត គាត់នៅតែមិនអស់ចិត្ត ចង់ទៅជួបសម្តេចក្រែងបានច្រើនជាងនឹង អញ្ចឹងរបៀបចិត្តគាត់ ។ ការឯកភាពដូចបានឃើញស្រាប់ហើយ ពួកគាត់មិនបាន១០០នាក់ផងនឹង ហើយយកស្នាមមេដៃ១ ៣០០ ថា ជាស្នាមមេដៃ តៃផ្តិតតាំងពីលើកមុននោះ មិនមែនផ្តិតឥឡូវនេះបានទេ គេផ្តិតទុក២ច្បាប់ ទៅដល់សម្តេច ហើយចឹងយើងមិនដឹងត្រូវនិយាយយ៉ាងម៉េចទៀត មានតែរង់ចាំមើលដំណឹងបានគោលការណ៍ពីសម្តេច មកសរុបបញ្ចប់បណ្តោយ ។
លោក ហ៊ត វ៉ាន់ធី បន្តថា អ្វីដែលបានដោះស្រាយវាមានអញ្ចឹង តែបងប្អូនមិនអស់ចិត្តអញ្ចឹង ក៏ទៅទៀតទៅ គណៈកម្មការផ្សារធ្វើតាមសេចក្តីប្រកាសរបស់សាលារាជធានីភ្នំពេញ ដូចជាមិនខុសទេ ៕
ចែករំលែកព័តមាននេះ